ຊ້າງລາວ ບໍລິການທ່ຽວຊົມວີວຕົວເມືອງນະຄອນຫຼວງ

207 15 ກ.ພ. 2017 ຂ່າວໜ້າ​ໜຶ່ງ
ຊ້າງລາວ ບໍລິການທ່ຽວຊົມວີວຕົວເມືອງນະຄອນຫຼວງ

ທ່ານ ວິໄລ​ສອນ ຫຼວງ​ອາ​ໄພ ຜູ້ອຳນວຍການບໍລິສັດ ຊ້າງລາວທ່ອງ​ທ່ຽວ ຈຳກັດ ໄດ້​ໃຫ້ສຳພາດ ວັນ​ທີ 10 ກຸມພາ 2017 ວ່າ: ບໍລິສັດ ຊ້າງ​ລາວທ່ອງ​ທ່ຽວ ຈຳກັດຜູ້​ດຽວ ໄດ້​ຮັບ​ການ​ສ້າງຕັ້ງ​ຂຶ້ນ​ກາງ​ປີ 2013 ມີ​ສຳນັກງານ​ຕັ້ງ​ຢູ່​ບ້ານອາ​ນຸ ເມືອງ​ຈັນທະ​ບູ​ລີ ນະຄອນຫຼວງ​ວຽງ​ຈັນ ເພື່ອ​ດຶງ​ດູດ​ນັກ​ທ່ອງ​ທ່ຽວ​ພາຍໃນ ແລະ ຕ່າງປະເທດ ​ມາ​ທ່ຽວຊົມ​ນະຄອນຫຼວງ​ວຽງ​ຈັນ​ໃຫ້​ນັບມື້​ຫຼາຍ​ຂຶ້ນ ສ້າງ​ລາຍ​ຮັບ​ທາງ​ກົງ ແລະ ທາງ​ອ້ອມ​ໃຫ້​ປະເທດ​ເຮົາ ດັ່ງນັ້ນ ຕົນ​ເອງ​ພ້ອມ​ໜ່ວຍ​ງານ ຈຶ່ງ​ໄດ້​ສຳ​ຫຼວດ​ການ​ທ່ຽວ​ທ່ອງຢູ່​ພື້ນ​ທີ່ນະຄອນຫຼວງ​ວຽງ​ຈັນ ເພື່ອ​ຊອກ​ຫາ​ຄວາມ​ເປັນ​ໄປ​ໄດ້ໃນ​ການ​ສ້າງ​ສີສັນ​ພາບ​ທີ່​ປະ​ທັບໃຈ ທີ່​ບໍ່​ທັນ​ມີ​ໃຜ​ເຄີຍ​ເຮັດ​ມາ​ກ່ອນ ໂດຍ​ໄດ້​ນຳ​ເອົາ​ບົດຮຽນ​ຈາກ​ຕ່າງປະເທດ​ມາ​ທົດ​ລອງ​ໝູນ​ໃຊ້ ຈຶ່ງສ້າງ​ໂຄງການ​ບໍລິການ​ລົດ​ບັດ​ຂະໜາດ 28-30 ບ່ອນ​ນັ່ງ ແລ່ນເສັ້ນທາງ​ສາຍ​ຫຼັກ ເພື່ອ​ໃຫ້​ນັກທ່ອງ​ທ່ຽວ​ໄດ້​ຊົມ​ວີວ​ຕົວ​ເມືອງວຽງ​ຈັນ ​ທີ່​ມີ​ຄວາມ​ປະຢັດ​ຄຸ້ມ​​ຄ່າ ໄດ້​ບັນຍາກາດ ແລະ ເຫັນ​ໄດ້​ວິຖີ​ການ​ດຳລົງ​ຊີວິດ​ຂອງ​ປະຊາຊົນ​ລາວ​ບັນດາເຜົ່າ ໂດຍ​ສະເພາະ ປະຊາຊົນ​ຊາວ​ນະຄອນຫຼວງ​ວຽງ​ຈັນ.

ໂຄງການ​ດັ່ງກ່າວ​ ໄດ້​ເລີ່ມ​ທົດລອງ​ມາ​ແຕ່​ເດືອນ​ສິງຫາ 2016 ແລະ ສິ້ນ​ສຸດ​ເດືອນ​ມັງກອນ 2017 ທີ່​ບໍລິການ​ບໍ່​ໄດ້​ເສຍ​ຄ່າ ແລະ ເລີ່ມ​ເກັບ​ຄ່າ​ບໍລິການ​ແຕ່ວັນ​ທີ 1 ກຸມພາ 2017 ເປັນຕົ້ນມາ ເສັ້ນທາງ​ແລ່ນ​ຈຸດ​ເລີ່ມ​ຕົ້ນຕໍ່ໜ້າ​ວັດ​ອິນ​ແປງ ຖະໜົນ​ເຊດ​ຖາທິ​ຣາດ ໄປ​ຕາມ​ເສັ້ນທາງ​ແຄມຂອງ​ສູ່​ຖະໜົນ​ທ່າ​ເດື່ອ-ໂຄ້ງ​ກັບວົງວຽນ​ຈີ່ນາຍ​ໂມ້-ເຂົ້າ​ສູ່​ໂສກປ່າ​ຫຼວງ ຖະໜົນ​ມິດຕະພາບ ລາວ-ໄທ ຜ່ານ​ສູນ​ການ​ຄ້າລາວ-ໄອ​ເຕັກ ເຂົ້າ​ສູ່​ເສັ້ນທາງ 4 ເລນ ເບື້ອງ​ຕາເວັນ​ອອກ​ຂອງ​ພະທາດຫຼວງ ເພື່ອ​ໃຫ້​ນັກ​ທ່ອງ​ທ່ຽວ​ຍ່າງທ່ຽວ​ຊົມ​ພະ​ທາດຫຼວງ​ກັບ​ສູ່​ວັດອິນ​ແປງ​ຈຸດ​ເລີ່ມ​ຕົ້ນ ເຊິ່ງ​ການ​ບໍລິ​ການມີ​ທຸກ​ມື້ ແລະ ມື້ໜຶ່ງ 2 ຖ້ຽວ​ຕອນ​ເຊົ້າ ເລີ່ມ​ເວລາ 8:30-11:30 ໂມງ ແລະ ພາກ​ບ່າຍ 13:30-16:00 ໂມງ ນັກ​ທ່ອງທ່ຽວ​ສາມາດ​ຂຶ້ນ-ລົງ​ຢູ່​ຈຸດ​ໃດ​ກໍ່ໄດ້ ລາຄາ 40.000 ກີບ​ຕໍ່​ຄົນ ຂີ່ໝົດ​ມື້.

ຂ່າວທີ່ກ່ຽວຂ້ອງ