ຜະລິດຕະພັນໄມ້ອັດລາວ ເປັນທີ່ຕ້ອງການຂອງຕະຫຼາດ

158 15 ກ.ພ. 2017 ຂ່າວໜ້າ​ໜຶ່ງ
ຜະລິດຕະພັນໄມ້ອັດລາວ ເປັນທີ່ຕ້ອງການຂອງຕະຫຼາດ

ທ່ານ ຄຳ​ໄພ ຄຳ​ພິລາ​ວົງ ອຳນວຍ​ການ​ລັດ​ວິ​ສາ​ຫະ​ກິດ​ການຄ້າ ຂາ​ອອກ-ຂາ​ເຂົ້າ ແຂວງ​ອັດຕະ​ປື​ ໄດ້​ກ່າວ​ວ່າ: ໂຮງງານ​ປຸງແຕ່ງ​ໄມ້​ຂອງ​ລັດ​ວິ​ສາ​ຫະ​ກິດ​ການຄ້າ ຂາ​ອອກ-ຂາ​ເຂົ້າ ແຂວງ​ອັດຕະ​ປື ຕັ້ງ​ຢູ່​ບ້ານຫາດ​ຊັນ ເມືອງໄຊ​ເຊດ​ຖາ ແຂວງອັດ​ຕະ​ປື ໄດ້ຮັບ​ໃບ​ທະບຽນ​ດຳເນີນ​ທຸລະ​ກິດ ປີ 2011 ສຳລັບ​ການ​ຜະລິດ​ຂອງໂຮງງານ​ແມ່ນ​ໄດ້​ຜະລິດ​ໄມ້​ແປຮູບ ກໍ່​ຄືໄມ້ອັດ​ກວມ 85% ສ່ວນທີ່​ເຫຼືອ​ແມ່ນ​ຜະລິດ​ໄມ້​ປູ​ພື້ນ ໄມ້ວົງ​ກົບ ຂາ​ໂຕະ​ຕັ່ງ ສຳລັບ​ໄມ້ອັດຂາຍ​ຕະຫຼາດ​ພາຍ​ໃນ 10% ຕະຫຼາດ​ຫວຽດນາມ 35% ສ່ວນ​ທີ່ເຫຼືອ​ສົ່ງ​ອອກ​ໄປ​ຕະຫຼາດ​ໄທ ສ່ວນໄມ້​ວົງ​ກົບ ແລະ ໄມ້​ປູ​ພື້ນ ສົ່ງຂາຍ​ສະເພາະ​ຕະຫຼາດ​ໄທ.

ໃນ​ປີ 2016 ຜ່ານ​ມາ ​ສາມາດຜະລິດ​ໄມ້ອັດ​ສົ່ງ​ຂາຍ​ໄດ້​ທັງ​ໝົດ 1 ພັນ​ແມັດ​ກ້ອນ ສຳລັບ​ປີ 2017 ໄດ້​ວາງ​ກຳລັງ​ການ​ຜະລິດ​ໄມ້ອັດປ້ອນ​ຕະຫຼາດ​ໄວ້​ທີ່ 2 ພັນ​ກວ່າແມັດ​ກ້ອນ ເພາະ​ໄມ້ອັດ​ນີ້​ຕະຫຼາດ​ຕ່າງປະເທດ​ແມ່ນ​ມີ​ຄວາມຕ້ອງການ​ສູງ ສະນັ້ນ ຈຶ່ງ​ມີ​ແຜນຂະຫຍາຍ​ການ​ຜະລິດ​ຕື່ມ ສຳລັບໄມ້​ທີ່​ນຳ​ມາ​ຜະລິດ​ນັ້ນ ​ແມ່ນ​ໄດ້​ຂໍອະນຸຍາດ​ຕາມ​ຂັ້ນ​ຕອນ​ລະບຽບການ​ຂອງ​ຂະແໜງ​ອຸດ​ສະຫະ​ກຳ ການ​ຄ້າ ແລະ ກະຊວງ​ກະສິກຳ ແລະ ປ່າໄມ້ ແລະ ໃນ​ແຕ່​ລະ​ປີ​ ໄດ້ປະກອບ​ພັນທະ​ອາກອນ​ໃຫ້​ແກ່ລັດ​ເປັນ​ປົກກະຕິ ເວົ້າ​ລວມ​ແລ້ວ ໂຮງງານ​ດັ່ງກ່າວ ​ໄດ້​ຂໍອະນຸຍາດນຳ​ເຂົ້າ​ໄມ້​ມາ​ຜະລິດ​ຖືກ​ຕາມ​ຂັ້ນການ​ຂໍອະນຸຍາດ​ຢ່າງ​ຄົບ​ຖ້ວນ.

ເພື່ອ​ຮອງ​ຮັບ​ການ​ຫຼຸດ​ລົງຂອງ​ໄມ້ ແລະ ຄວາມ​ຕ້ອງການຂອງ​ຕະຫຼາດ​ໃນ​ອະນາຄົດ​ທາງ​ບໍລິ​ສັດ​ດັ່ງກ່າວ ໄດ້​ມີ​ແຜນ​ຈະ​ຊຸກຍູ້​ສົ່ງເສີມ​ປະຊາຊົນ​ປູກ​ໄມ້ ​ໃນ​ຮູບແບບ​ປະຊາຊົນ​ມີ​ສ່ວນ​ຮ່ວມ ໂດຍບໍລິສັດ​ຈະ​ໃຫ້​ເບ້ຍ​ໄມ້ ແລະ ຮັບ​ຊື້ ສ່ວນ​ປະຊາຊົນ​ເປັນ​ເນື້ອທີ່​ດິນ ພ້ອມ​ທັງ​ໄດ້​ມີ​ແຜນ​ຕີ​ກາ​ໝາຍ​ຜະລິດ​ຕະ​ພັນ​ຂອງ​ບໍລິສັດ ເພື່ອ​ເພີ່ມສີສັນ​ໃນ​ການ​ຫຸ້ມ​ຫໍ່ ແລະ ໃຫ້​ຮູ້ໄດ້​ວ່າ ຜະລິດ​ຕະ​ພັນ​ດັ່ງກ່າວ ເປັນ​ຜະລິດ​ຕະ​ພັນ​ຂອງ​ລາວ.

ຂ່າວທີ່ກ່ຽວຂ້ອງ