ສ້າງຕັ້ງບໍລິສັດເຊົ່າສິນເຊື່ອ ໂດຍການຮ່ວມມືທຶນ 3 ຫົວໜ່ວຍທຸລະກິດ

189 15 ກ.ພ. 2017 ຂ່າວໜ້າ​ໜຶ່ງ
ສ້າງຕັ້ງບໍລິສັດເຊົ່າສິນເຊື່ອ ໂດຍການຮ່ວມມືທຶນ 3 ຫົວໜ່ວຍທຸລະກິດ

ບໍລິສັດ ເຄ​ບີ ໂຄ​ລາວ ເຊົ່າສິນ​ເຊື່ອ ທີ່​ຕັ້ງ​ຢູ່​ຕຶກ​ອາ​ລຸນ​ໃໝ່ ເມືອງ​ໄຊ​ເຊດ​ຖາ ນະຄອນຫຼວງວຽງ​ຈັນ ໄດ້​ຈັດ​ພິທີ​ເປີດ​ຢ່າງ​ເປັນທາງ​ການ​ຂຶ້ນ ວັນ​ທີ 13 ກຸມພາ 2017 ທີ່​ໂຮງແຮມ​ແລນ​ມາກ ມີທ່ານ ສອນ​ໄຊ ສີ​ພັນ​ດອນ ຮອງນາຍົກລັດຖະມົນຕີ ທ່ານ ຄຳລຽນ ພົນ​ເສນາ ຮອງ​ລັດ​ຖະ​ມົນຕີ​ກະຊວງ​ແຜນການ ແລະ ການລົງທຶນ ທ່ານ ໂອ​ເຊ​ຢັອງ ປະທານ ບໍລິສັດ ໂຄ​ລາວ ບັນດາ​ຜູ້​ບໍ​ລິຫານ ເຄ​ບີ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ທ່ານ ຢຸນ​ຈົງ​ກຽວ ປະທານກຸ່ມ​ສະ​ຖາ​ບັນ​ການ​ເງິນ KB ໄດ້ກ່າວ​ວ່າ: ກຸ່ມ​ໂຄ​ລາວ ໄດ້​ເປີດ​ບໍ​ລິສັດ ເຄ​ບີ ໂຄ​ລາວ ​ເຊົ່າ​ສິນ​ເຊື່ອ ແມ່ນ​ການ​ຮ່ວມ​ທຶນ​ລະຫວ່າງບໍລິ​ສັດ ເຄ​ບີ ແຄັບ​ປີ​ໂຕລ (KB Capital) ຖື​ຮຸ້ນ 51% ກຸ່ມ​ບໍລິສັດ ເຄ​ບີ ກຸກ​ມິນ​ກາດ ຈຳກັດ (KB Kookmin Card Co.LTD) ຖື​ຮຸ້ນ 29% ແລະ ບໍລິສັດ ໂຄ​ລາວ ຖື​ຮຸ້ນ 20% ເຊິ່ງ​ຈະ​ໄດ້​ດຳເນີນໃຫ້​ບໍລິການ​ເຊົ່າ​ສິນ​ເຊື່ອ​ລົດ​ໃຫຍ່ ແລະ ການ​ລົງທຶນ​ຂະໜາດ​ໃຫຍ່ ໂດຍ​ຜ່ານ​ທາງ​ທະນາຄານ​ອິນ​ໂດຈີນ ຖື​ເປັນ​ບາດກ້າວ​ໜຶ່ງ​ໃນ​ດ້ານພັດທະນາ ເຊິ່ງ​ເປົ້າ​ໝາຍ​ສ້າງ​ໃຫ້ ​ສປປ ລາວ ເປັນ​ປະເທດ​ທີ່​ຢືນ​ຢູ່ແຖວ​ໜ້າ​ຂອງ​ພາກ​ພື້ນ​ອິນດູຈີນ ແລະ ບໍລິສັດ ເຄ​ບີ ໂຄ​ລາວ​ ເຊົ່າສິນ​ເຊື່ອ​ ກໍ່​ຈະ​ສະໜັບສະໜູນສ້າງ​ຄວາມ​ເຂັ້ມແຂງ​ໄປ​ພ້ອມໆກັນ.

ໂອກາດ​ນີ້ ທ່ານ ສອນ​ໄຊ ສິດ​ພະ​ໄຊ ຮອງ​ຜູ້​ວ່າ​ທະນາຄານ ແຫ່ງ ​ສປປ ລາວ ກ່າວ​ວ່າ: ຜ່ານການ​ຕິດຕາມ​ກວດກາ​ຂັ້ນ​ຕອນ ແລະ ຄວາມ​ພ້ອມ​ດ້ານ​ຕ່າງໆຢ່າງ​ມີ​ຄວາມ​ຫ້າວຫັນ​ຂອງ​ບໍ​ລິສັດ ເຄ​ບີ ໂຄ​ລາວ ເຊົ່າ​ສິນ​ເຊື່ອ ອັນ​ໄດ້​ນຳ​ມາສູ່​ການ​ເປີດ​ພິທີ​ໃນຄັ້ງ​ນີ້ ການ​ລົງທຶນ​ຂອງ​ບໍລິສັດທີ່​ເປັນ​ກຸ່ມ​ຂອງ​ສະ​ຖາ​ບັນ​ການເງິນ​ອັນ​ດັບ​ໜຶ່ງ​ຈາກ ສ ເກົາຫຼີ ຖື​ວ່າ​ເປັນ​ນິມິດ​ໝາຍ​ສຳຄັນ​ໜຶ່ງ ​ທີ່ຈະ​ສ້າງ​ຄວາມ​ໄວ້​ເນື້ອ​ເຊື່ອ​ໃຈ​ໃຫ້ກັບ​ນັກທຸລະກິດ​ເກົາຫຼີ ແລະ ຊ່ວຍ​ດຶງ​ດູດ​ເອົາ​ການ​ລົງທຶນ​ຈາກ​ນັກທຸລະກິດ​ເກົາຫຼີ ​ໃຫ້​ມາ​ລົງທຶນ​ຢູ່​ລາວ​ເພີ່ມ​ຂຶ້ນ ການ​ດຳເນີນ​ທຸລະກິດ​ຢູ່​ລາວ​ແມ່ນ​ມີ​ທັງ​ຂໍ້​ສະດວກ ແລະ ຂໍ້​ຫຍຸ້ງຍາກ ຫວັງ​ວ່າບໍ​ລິສັດຈະ​ສາມາດ​ຂ້າມ​ຜ່ານ​ໄປ​ໄດ້ ໃນ​ນາມ​ຜູ້​ຮັບຜິດຊອບ​ຂະແໜງການ​ນີ້ ພ້ອມ​ທີ່​ຈະ​ໃຫ້​ຄວາມຊ່ວຍເຫຼືອ ແລະ ໃຫ້​ຄຳ​ປຶກສາໃນ​ການ​ແກ້​ໄຂ​ບັນຫາ​ຕ່າງໆ ເພື່ອ​ໃຫ້​ບໍລິສັດ​ມີ​ຜົນສຳເລັດ​ໄປພ້ອມ​ກັບ​ການ​ພັດທະນາ​ເສດ​ຖະກິດ-ສັງຄົມ​ຂອງ ​ສປປ ລາວ.

ຂ່າວທີ່ກ່ຽວຂ້ອງ