ລາວຍົກສູງສາຍພົວພັນການທູດ ກັບບັນດາປະເທດເພື່ອນມິດສາກົນ

180 15 ກ.ພ. 2017 ຂ່າວໜ້າ​ໜຶ່ງ
ລາວຍົກສູງສາຍພົວພັນການທູດ ກັບບັນດາປະເທດເພື່ອນມິດສາກົນ

ວັນ​ທີ 14 ກຸມພາ 2017 ຢູ່ທີ່​ທຳ​ນຽບ​ປະທານ​ປະເທດ ທ່ານ ບຸນ​ຍັງ ວໍລະ​ຈິດ ປະທານ​ປະເທດ ແຫ່ງ ​ສປປ ລາວ ໄດ້​ໃຫ້​ກຽດຕ້ອນຮັບ​ການ​ເຂົ້າ​ຢ້ຽມ​ຄຳນັບ ແລະ ຍື່ນ​ສານ​ຕາ​ຕັ້ງ​ຂອງ​ບັນດາເອກ​ອັກ​ຄະ​ລັດ​ຖະ​ທູດ​ວິສາມັນ ຜູ້​ມີ​ອຳນາດ​ເຕັມ​ຄົນ​ໃໝ່ ປະຈຳລາວ ລະອຽດ​ມີດັ່ງນີ້.

ເວລາ 9:00 ໂມງ ຕ້ອນຮັບການ​ເຂົ້າ​ຢ້ຽມ​ຄຳນັບ ແລະ ຍື່ນສານ​ຕາ​ຕັ້ງຂອງ​ທ່ານ​ນາງ Maria Natalia Guterres Viegas Carascalao ເອກ​ອັກຄະ​ລັດ​ຖະ​ທູດ​ວິສາມັນ ​ຜູ້​ມີ​ອຳນາດ​ເຕັມ​ແຫ່ງ ສາ​ທານະ​ລັດ ປະຊາ​ທິ​ປະ​ໄຕ ຕິ​ມໍ​ເລສ​ເຕ ຄົນໃໝ່​ ປະຈຳ​ລາວ ເຊິ່ງ​ມີ​ສຳນັກງານ​ໃຫຍ່​ຕັ້ງ​ຢູ່​ນະຄອນຫຼວງ​ວຽງຈັນ.

ເວລາ 10:00 ໂມງ ຕ້ອນຮັບການ​ເຂົ້າ​ຢ້ຽມ​ຄຳນັບ ແລະ ຍື່ນສານ​ຕາ​ຕັ້ງ​ຂອງ​ທ່ານ Vladimir A Goshin ເອກ​ອັກ​ຄະ​ລັດ​ຖະ​ທູດວິສາມັນ ຜູ້​ມີ​ອຳນາດ​ເຕັມ​ແຫ່ງ ສາທາລະນະ​ລັດ ເບ​ລາ​ຣຸດສ ຄົນ​ໃໝ່ ​ປະຈຳ​ລາວ ມີ​ສຳນັກງານໃຫຍ່​ຕັ້ງ​ຢູ່​ນະຄອນຫຼວງ​ຮ່າ​ໂນ້ຍ ​ສສ ຫວຽດນາມ.

ເວລາ 10:30 ໂມງ ຕ້ອນຮັບ​ການ​ເຂົ້າ​ຢ້ຽມ​ຄຳນັບ ແລະ ຍື່ນ​ສານ​ຕາ​ຕັ້ງຂອງ​ທ່ານ Dudley Mckinley Thomas ເອກ​ອັກ​ຄະ​ລັດ​ຖະ​ທູດ​ວິສາມັນ ຜູ້​ມີ​ອຳນາດ​ເຕັມ​ແຫ່ງ ສາ​ທາ​ລະນະ​ລັດ ລິ​ເບີເຣຍ ຄົນ​ໃໝ່ ​ປະຈຳລາວ ມີ​ສຳນັກງານ​ໃຫຍ່​ຕັ້ງ​ຢູ່​ປັກກິ່ງ ​ສປ ຈີນ.

ເວລາ 11:00 ໂມງ ຕ້ອນຮັບການ​ເຂົ້າ​ຢ້ຽມ​ຄຳນັບ ແລະ ຍື່ນສານ​ຕາ​ຕັ້ງ​ຂອງ​ທ່ານ Philippe Kridelka ເອກ​ອັກຄະລາຊະທູດວິສາມັນ​ຜູ້​ມີ​ອຳນາດ​ເຕັມ ແຫ່ງ ຣາ​ຊະ​ອານາຈັກ ແບນ​ຊິກ ​ຄົນ​ໃໝ່ ປະຈຳ​ລາວ ມີ​ສຳນັກງານ​ໃຫຍ່ຕັ້ງ​ຢູ່​ບາງກອກ​ປະເທດ​ໄທ.

ໂອກາດ​ນີ້ ທ່ານ​ປະທານ​ປະເທດ ໄດ້​ໃຫ້ການ​ຕ້ອນຮັບ​ອັນ​ອົບອຸ່ນ ພ້ອມ​ທັງ​ສະແດງ​ຄວາມຍ້ອງຍໍ-ຊົມເຊີຍ ຕໍ່​ບັນດາ​ເອກອັກ​ຄະ​ລັດ​ຖະ​ທູດ​ຄົນ​ໃໝ່ ​ທີ່​ໄດ້​ຮັບຄວາມ​ໄວ້​ເນື້ອ​ເຊື່ອ​ໃຈ​ຈາກ​ລັດ​ຖະບານ ແລະ ປະຊາຊົນ​ຂອງ​ຕົນ ​ໃຫ້ມາ​ດຳລົງ​ຕ່ຳ​ແໜ່ງ​ທີ່​ສຳຄັນ ແລະ ມີ​ກຽດ​ຄັ້ງ​ນີ້ ເຊິ່ງ​ຖື​ເປັນການ​ປະກອບສ່ວນ​ສຳຄັນ ​ເຂົ້າ​ໃນການ​ເສີມ​ສ້າງ​ສາຍ​ພົວພັນ​ຮ່ວມມື​ກັນ ແລະ ກັນ ໃຫ້​ມີ​ຄວາມ​ເຕີບໃຫຍ່ ແລະ ເຂັ້ມແຂງ​ຮອບດ້ານ ໂດຍ​ພັກ-ລັດຖະບານ​ລາວ ມີຄວາມ​ຍິນ​ດີ​ເປັນ​ຢ່າງ​ຍິ່ງ​ ໃນ​ການເສີມ​ສ້າງ​ສາຍ​ພົວພັນ​ຮ່ວມ​ມືກັບບັນດາ​ປະເທດ​ເພື່ອນ​ມິດສາ​ກົນ ເພື່ອ​ຍົກ​ລະດັບ​ການ​ຮ່ວມ​ມື​ທາງດ້ານ​ການ​ທູດ ລວມ​ທັງ​ການ​ຊ່ວຍເຫຼືອ​ເຊິ່ງ​ກັນ ແລະ ກັນ​ໃຫ້​ນັບ​ມື້ສູງ​ຂຶ້ນ ບົນ​ພື້ນຖານ​ຕ່າງ​ຝ່າຍ​ມີປະໂຫຍດ ພ້ອມ​ນີ້ ທ່ານ ບຸນ​ຍັງ ວໍລະ​ຈິດ ຍັງ​ໄດ້​ສະແດງ​ຄວາມເຊື່ອ​ໝັ້ນ ແລະ ອວຍພອນ​ໃຫ້ບັນດາ​ທ່ານ​ເອກ​ອັກ​ຄະ​ລັດ​ຖະ​ທູດ ຄົນ​ໃໝ່ ​ປະຈຳ​ລາວ ປາ​ສົບ​ຜົນ​ສຳເລັດ ​ໃນ​ການ​ປະຕິບັດ​ໜ້າທີ່​ວຽກງານ ​ຕາມ​ທີ່​ໄດ້​ຮັບ​ມອບ​ໝາຍ​ອີກດ້ວຍ.

ຂ່າວທີ່ກ່ຽວຂ້ອງ