ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສປ ຈີນ ​ອົດ​ສະ​ຕຣາລີ

99 15 ກ.ພ. 2017 ຫົວຂໍ້ຂ່າວອື່ນໆ

ຄໍ​ລຳ​ປະ­ຈຳ​ວັນ​ນີ້​ຂໍ​ສະ­ເໜີ​ເລື່ອງ​ທາງ​ການ ສປ ຈີນ ວາງ​ມາດ​ຕະ­ການ​ປ້ອງ​ກັນ​ສະ­ພາບ​ຂາດ­ແຄນຢາ​ປົວ​ພະ­ຍາດ ແລະ ເລື່ອງ​ທາງ​ການ ​ອົດ​ສະ​ຕຣາລີ ປະ­ກາດ​ໃຊ້​ກົດ­ໝາຍ​ຄວບ​ຄຸມ​ເຮືອນ​ພັກ​ທີ່​ຜິດ​ກົດໝາຍ​ຢູ່​ໃນປະ­ເທດ​.

ທີ່ ສປ ຈີນ: ຂ່າວ​ຕ່າງ­ປະ­ເທດ​ຈາກ ສປ ຈີນ ໃນ​ຕົ້ນ​ເດືອນ​ມັງ­ກອນ​ປີ​ນີ້ ໄດ້​ເວົ້າ​ເຖິງ​ຄວາມ​ຈຳເປັນ​ຂອງ​ທາງ​ການ​ຈີນ​ ໃນການ​ວາງ​ມາດ​ຕະ­ການເພື່ອ​ປ້ອງ​ກັນ​ສະ­ພາບ​ຂາດ­ແຄນ​ຢາ​ປົວ​ພະ­ຍາດ​ຊະນິດ​ຈຳ­ເປັນ ​ທີ່​ມັກ​ຈະ​ຂຶ້ນ​ເປັນ​ໄລ­ຍະ ພາຍ​ໃຕ້ມາດຕະ­ການ​ໃໝ່​ນີ້ ທາງ​ການ​ຈີນ​ ໄດ້​ອອກ​ນະ­ໂຍ­ບາຍແຫ່ງ​ຊາດ ເພື່ອ​ສຸມ​ໃສ່​ຜະ­ລິດ​ຢາ​ປົວ​ພະ­ຍາດ​ທີ່​ຂາດແຄນ ໂດຍ​ເນັ້ນ​ແກ້​ໄຂ​ຂອດ​ຄ້າງ​ຄາ​ໃນ​ການ​ຜະ­ລິດ ແລະ ການ​ຈໍ​ລະ​ຈອນ​ຢາ ຄຽງ​ຄູ່​ກັບ​ການ​ປັບ­ປຸງຄຸ­ນະ­ພາບ ແລະ ປະ­ສິດ­ທິ­ພາບຂອງ​ຢາ​ປົວ​ພະ­ຍາດ ນະ­ໂຍ­ບາຍ​ການ​ຢາ​ແຫ່ງ​ຊາດ​ ຍັງ​ໄດ້​ກຳ­ນົດ​ການປະ­ຕິ­ບັດ​ງານ​ຕົວ​ຈິງ ເພື່ອ​ຮັບ­ປະ­ກັນ​ການ​ສະ­ໜອງຢາປົວ​ພະ­ຍາດ​ໃຫ້​ພຽງ­ພໍ​ກັບ​ຄວາມ​ຕ້ອງ­ການ ເຊັ່ນ: ການ​ປັບ­ປຸງ​ວຽກ​ງານ​ຕິດ­ຕາມ​ກວດ­ກາ​ການ​ຜະ­ລິດຢາ ການ​ເຮັດໃຫ້​ໄລ­ຍະ​ການ​ຕົກ­ລົງ​ຮັບ­ຮອງ​ການຢາ​ຊະ­ນິດ​ໃໝ່​ໄວ​ຂຶ້ນ ແລະ ປັບ­ປຸງ​ຄຸ­ນະ­ພາບ​ຂອງຢາ​ທີ່​ມີ​ຕົວ​ຈິງ​ສຳ­ລັບ​ນຳ​ໃຊ້ ນອກ­ຈາກ​ນັ້ນ ທາງການ​ກ່ຽວ­ຂ້ອງ​ຍັງ​ຕ້ອງ​ໄດ້​ກວດ­ກາ​ການ​ຈໍ​ລະ​ຈອນຢາ ລະ­ຫວ່າງ​ບໍ­ລິ­ສັດ​ຜະ­ລິດ​ຢາ ກັບ​ໂຮງ­ພະ­ຍາ­ບານ ແນ­ໃສ່​ຫຼຸດ­ຜ່ອນ​ລາ­ຄາ​ຢາ ກໍ່​ຄືງົບ­ປະ­ມານ​ສຳ­ລັບການ​ຜະ­ລິດ​ຢາ ຂ່າວ​ໃຫ້​ຊາບ​ຕື່ມ​ວ່າ ກ່ອນ​ໜ້ານັ້ນ​ໄດ້​ມີ​ລາຍ​ງານ​ເປັນຄັ້ງ​ເປັນ​ຄາວ​ກ່ຽວ​ກັບ​ສະພາບ​ຂາດ­ແຄນ​ຢາ​ປົວ​ພະ­ຍາດ​ຊະ­ນິດ​ທົ່ວ​ໄປ ແລະ ຊະ­ນິດ​ທີ່​ມີ​ຄວາມ​ຈຳ­ເປັນ​ ສະ­ເພາະ​ໃນຫຼາຍໆ​ພາກຂອງ​ປະ­ເທດ ຊຶ່ງ​ໄດ້​ສ້າງ​ຄວາມ​ກັງ­ວົນ​ໃຈ​ຂອງ​ສັງຄົມ ເຊັ່ນ: ການ​ຂາດ­ແຄນ​ຢາ​ໂປ​ຕາ​ມິນ ຊູນເຟດ (Protamine Sulfate) ທີ່​ມີ​ຄວາມ​ຈຳ­ເປັນສຳ­ລັບ​ການ­ຜ່າ­ຕັດ ​ເພື່ອ​ປິ່ນ­ປົວ​ບາງ​ພະ­ຍາດ ລວມທັງ​ພະ­ຍາດ­ຫົວ­ໃຈ ການຂາດ­ແຄນ​ຢາ​ຊະ­ນິດ​ນີ້ ໄດ້ເຮັດ​ໃຫ້​ການ­ຜ່າ­ຕັດ​ຫົວ­ໃຈ​ໃນ​ໂຮງ­ພະ­ຍາ­ບານຫຼາຍ​ແຫ່ງ​ຢຸດ​ສະ​ງັກ ສາ​ເຫດ­ການ​ຂາດ­ແຄນຢາ​ຊະນິດ​ຕ່າງໆ​ນັ້ນ ເກີດ​ມາ​ຈາກ​ການ​ໂຈະ​ການ​ຜະ­ລິດໃນ​ທ້າຍ​ປີ 2015 ເພື່ອ​ປັບ­ປຸງ​ຄຸ­ນະ­ພາບ​ຂອງ​ຢາ​ໃຫ້ໄດ້​ຕາມມາດ­ຕະ­ຖານ​ໃໝ່​ ຕາມ​ທິດ​ນຳ​ຂອງ​ຂະແໜງ​ສາ­ທາ­ລະ­ນະ​ສຸກ ຢາ​ປົວ​ພະ­ຍາດ​ຈຳ­ນວນຫຼາຍ​ທີ່​ຂາດ­ຕະ­ຫຼາດ​ນັ້ນ ແມ່ນ​ຢາສຳ­ລັບ​ເດັກ­ນ້ອຍ ສະ­ນັ້ນ ທາງ​ການ​ຈຶ່ງ​ໄດ້​ສະ­ເໜີ​ໃຫ້​ບໍ­ລິ­ສັດ​ຜະ­ລິດຢາ​ ສຸມ​ໃສ່​ຜະ­ລິດ​ຢາ 7 ຊະ­ນິດ ສຳ­ລັບ​ເດັກ​ໃຫ້​ພຽງພໍກັບ​ຄວາມ​ຕ້ອງ­ການ​ຕົວ​ຈິງ ໄປ​ຄຽງ​ຄູ່​ກັບ​ການ​ຜະລິດ​ຢາ​ຫຼວງ​ແລ້ວ ສປ ຈີນ ຍັງ​ສົ່ງ­ເສີມ​ການ​ຜະລິດ​ຢາ­ພື້ນ­ເມືອງ​ຢ່າງ​ຕັ້ງ­ໜ້າ ພາຍ­ຫຼັງ​ໄດ້​ມີ​ການພິ­ສູດ​ວ່າ­ ການ​ປິ່ນ­ປົວ​ດ້ວຍ​ຢາ­ພື້ນ­ເມືອງ​ມີ​ທ່າ​ອຽງດີ​ຂຶ້ນ​ຢ່າງ​ຕໍ່​ເນື່ອງ ແລະ ລາ­ຄາ​ກໍ່​ຖືກ​ກວ່າ​ການປິ່ນ­ປົວ​ດ້ວຍ​ການ​ແພດ​ສະ­ໄໝ​ໃໝ່ ໃນ​ປັດ­ຈຸ­ບັນ ສປ ຈີນ ມີ​ໝໍ​ຢາ­ພື້ນ­ເມືອງ​ຈຳ­ນວນ 450.000 ຄົນ ໃນທົ່ວ​ປະ­ເທດ ​ທີ່ພວມ​ຮ່ວມ​ມື​ກັນ​ພັດ­ທະ­ນາ​ຢາ​ພື້ນເມືອງ​ໃຫ້​ມີ​ຄຸ­ນະ­ພາບ ສາ­ມາດ​ປິ່ນ­ປົວ​ຫຼາຍ​ຊະ­ນິດພະ­ຍາດ ລວມ​ທັງ​ພະ­ຍາດ​ເອດ.

ທີ່ ​ອົດ​ສະ​ຕຣາ​ລີ: ໃນ​ຕົ້ນ​ເດືອນ​ກຸມ­ພາ​ປີ​ນີ້ມີ​ຂ່າວວ່າ ທາງ​ການ​ປະ­ເທດ​ອົດ​ສະ​ຕຣາ​ລີ ໄດ້​ບັງ­ຄັບ​ໃຊ້ກົດ­ໝາຍ​ຄວບ​ຄຸມການ​ຖື​ກຳ­ມະ­ສິດ​ອະ­ສັງ­ຫາ­ລິ­ມະຊັບ​ຂອງ​ຊາວ​ຕ່າງ­ປະ­ເທດ​ຢ່າງ​ເຂັ້ມ​ງວດ ຍ້ອນ​ວ່າມີ​ປາ­ກົດ­ການ​ຊື້-ຂາຍ​ເຮືອນ​ຂອງ​ຊາວ​ຕ່າງ­ປະ­ເທດ ແບບ​ຜິດ​ກົດ­ໝາຍ ​ທີ່​ມີ​ມູນ​ຄ່າ​ກວ່າ 100 ລ້ານ​ໂດ​ລາສະ­ຫະ­ລັດ ໃນ​ໄລ­ຍະ​ຫຼັງໆ​ມາ​ນີ້ ລາ­ຄາ​ອະ​ສັງ​ຫາລິມະ​ຊັບ ໄດ້​ຖີບ​ຕົວ​ຂຶ້ນ​ສູງ​ຫຼາຍ ໂດຍ​ສະ­ເພາະແມ່ນຢູ່​ເມືອງ​ໃຫຍ່ໆ ເຊັ່ນ: ນະ­ຄອນ​ຊິດ​ນີ ແລະ ເມ​ລເບິນ ອັນ​ເປັນ​ຜົນມາ​ຈາກ​ຊາວ​ຕ່າງ­ປະ­ເທດ​ຫັນ​ມາຊື້-ຂາຍ​ເຮືອນ​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ