ພົບກໍລະນີພະຍາດໄຂ້ຍຸງລາຍ 300 ກວ່າກໍລະນີ

101 16 ກ.ພ. 2017 ຂ່າວໜ້າ​ໜຶ່ງ

ພະຍາດ​ໄຂ້ຍຸງ​ລາຍ ​ເປັນ​ພະຍາດ​ທີ່​ສາມາດ​ປ້ອງ​ກັນ​ໄດ້​ ຖ້າ​ທຸກ​ຄົນ​ເອົາໃຈໃສ່​ປ້ອງ​ກັນ​ບໍ່​ໃຫ້​ຍຸງລາຍ​ມາ​ກັດ​ ຄຽງ​ຄູ່​ກັບ​ການ​ເອົາໃຈ​ໃສ່​ທຳລາຍ​ບ່ອນ​ເພາະ​ພັນໜອນ​ນ້ຳ​ຍຸງ​ລາຍ​ ເພື່ອ​ຕັດ​ວົງຈອນ ໂດຍ​ປະຕິບັດ​ຕາມ​ຫຼັກການ 5 ປ ທີ່​ກະຊວງ​ສາທາລະນະ​ສຸກວາງ​ອອກ​ເປັນ​ປະຈຳ ເຊິ່ງ 5 ປ ທີ່​ທຸກ​ຄົນ​ຄວນ​ປະຕິບັດ​ມີ: ປິດ​ຝາພາຊະນະ​ທີ່​ເກັບ​ນ້ຳ​ໃນ​ເຮືອນ ແລະ ນອກ​ເຮືອນ ເພື່ອ​ບໍ່​ໃຫ້​ຍຸງລາຍ​ມາ​ໄຂ່​ໃສ່ ປ່ຽນ​ນ້ຳ​ໃນ​ພາຊະນະ ເຊັ່ນ: ເຕົ້າ​ດອກ​ໄມ້ ນ້ຳຮອງ​ຕີນ​ຕູ້ ຖ້ານ​ຮອງ​ຈອກ​ນ້ຳ ແລະ ອື່ນໆ ປ່ອຍ​ປາ​ຫາງ​ນົກ​ຍຸງເພື່ອ​ກິນ​ໜອນ​ນ້ຳ ປັບປຸງ​ການ​ອະນາ​ໄມ​ສິ່ງແວດລ້ອມ​ອ້ອມ​ເຮືອນ ​ບໍ່​ໃຫ້​ມີ​ກະໂປະ​ກະ​ປ໋ອງ ຢາງ​ຕີນລົດ​ເກົ່າ​ທີ່​ມີ​ນ້ຳ​ຂັງ ແລະ ປະຕິບັດ​ໃຫ້​ເປັນ​ນິໄສ​ປະຈຳ​ທຸກໆ​ອາທິດ ຖ້າ​ເປັນໄຂ້​ໃຫ້​ໄປ​ພົບ​ແພດໝໍ​ດ່ວນ.

ອີງ​ຕາມ​ການ​ງານ​ລາຍ​ຂອງໜ່ວຍ​ງານ​ລະບາດ​ວິທະຍາ​ສູນ​ວິເຄາະ ແລະ ລະບາດ​ວິທະຍາ ກະຊວງ​ສາທາລະນະ​ສຸກ ໄດ້​ລາຍງານ​ໃຫ້​ຮູ້​ວ່າ: ນັບ​ແຕ່​ຕົ້ນ​ອາທິດທີ 1 ເລີ່ມ​ແຕ່​ວັນ​ທີ 31 ທັນວາ 2016 ຫາ ວັນ​ທີ 20 ກຸມພາ 2017 ທົ່ວ​ປະເທດ​ໄດ້​ມີ​ຄົນ​ເຈັບເປັນ​ພະຍາດ​ໄຂ້ຍຸງລາຍ ທັງ​ໝົດ 357 ກໍລະນີ ບໍ່​ພົບກໍລະນີ​ເສຍ​ຊີວິດ ໃນ​ນັ້ນ ນະຄອນຫຼວງ​ວຽງ​ຈັນ ມີ 104 ກໍລະນີ ແຂວງ​ຈຳປາ​ສັກ 94 ກໍລະນີ ອັດຕະ​ປື 92 ກໍລະນີ ບໍ​ລິ​ຄຳ​ໄຊ 18 ກໍລະນີ ສະຫວັນ​ນະ​ເຂດ 14 ກໍ​ລະນີ ແຂວງ​ເຊ​ກອງ 9 ກໍລະນີ ຄຳມ່ວນ 8 ກໍລະນີ ສາລະ​ວັນ 11 ກໍລະ​ນີ ວຽງ​ຈັນ 4 ກໍລະນີ ອຸດົມໄຊ 2 ກໍລະນີ ໄຊ​ຍະ​ບູ​ລີ 1 ກໍ​ລະນີ ສ່ວນ​ແຂວງ​ຫຼວງ​ພະ​ບາງ ຫຼວງນ້ຳ​ທາ ບໍ່​ແກ້ວ ໄຊ​ສົມບູນ ຜົ້ງ​ສາລີ ຊຽງ​ຂວາງ ແລະ ແຂວງ​ຫົວພັນ​ແມ່ນ​ຍັງ​ບໍ່​ພົບ​ກໍລະນີ​ຄົນ​ເຈັບທີ່​ຕິດເຊື້ອ​ພະຍາດ​ນີ້.

ຂ່າວທີ່ກ່ຽວຂ້ອງ