ຈັດກິດຈະກຳເພື່ອສົ່ງເສີມສິນຄ້າໂອດ໋ອບ

126 16 ກ.ພ. 2017 ຂ່າວໜ້າ​ໜຶ່ງ

ກົມ​ສົ່ງເສີມ​ການ​ຄ້າ ກະຊວງອຸດສາຫະກຳ ແລະ ການ​ຄ້າ ໄດ້ຈັດ​ຖະແຫຼງ​ຂ່າວ​ງານ​ວາງ​ສະແດງ​ສິນຄ້າ ​ໜຶ່ງ​ເມືອງ​ໜຶ່ງ​ຜະລິດຕະ​ພັນ​ແຫ່ງ​ຊາດ (ODOP) ທົ່ວປະເທດ ​ຄັ້ງ​ທີ 1 ຂຶ້ນ​ວັນ​ທີ 14 ກຸມພາ 2017 ທີ່​ສະມາຄົມ​ນັກ​ຂ່າວ ມີ​ທ່ານ ສົມ​ຫວັງ ນິນ​ທະ​ວົງ ຫົວໜ້າ​ກົມ​ສົ່ງເສີມ​ການ​ຄ້າ ທ່ານ ສົມ​ສະໜຸກ ມີ​ໄຊ ຮອງ​ປະທານສະມາຄົມ​ນັກ​ຂ່າວ​ແຫ່ງ ​ສປປ ລາວ ບັນດາ​ປະທານ​ສະມາຄົມເຟີ​ນີ​ເຈີ ຫັດຖະກຳ​ລາວ ແລະ ສື່ມວນ​ຊົນ​ເຂົ້າ​ຮ່ວມ.

ທ່ານ ສົມ​ຫວັງ ນິນ​ທະ​ວົງ ໄດ້​ໃຫ້​ຮູ້​ວ່າ: ກົມ​ສົ່ງເສີມ​ການ​ຄ້າ ຈະ​ໄດ້​ຈັດ​ງານ​ວາງສະແດງ​ສິນຄ້າ​ຂຶ້ນ​ລະຫວ່າງ​ວັນ​ທີ 22-26 ກຸມພາ 2017 ທີ່​ສູນ​ການ​ຄ້າ ລາວ-ໄອ​ເຕັກ ຄາດ​ວ່າ​ງານ​ດັ່ງກ່າວ​ ຈະ​ມີ​ຫົວໜ່ວຍ​ທຸລະ​ກິດ​ທີ່​ໄດ້ຮັບ​ກາ​ໝາຍ​ໂອ​ດ໋ອບ​ເຂົ້າ​ຮ່ວມ 129 ຫົວໜ່ວຍ​ຈາກ​ທົ່ວ​ປະເທດ ໃນ​ນັ້ນ​ມີ 472 ຜະລິດ​ຕະ​ພັນ ແລະ ຫ້ອງ​ວາງສະແດງ​ຫຼາຍກວ່າ 250 ຫ້ອງ ການ​ຈັດ​ງານຄັ້ງ​ນີ້ ​ເພື່ອ​ເປັນ​ການ​ນຳ​ສະເໜີ​ສິນຄ້າ​ໜຶ່ງ​ເມືອງ​ໜຶ່ງ​ຜະລິດ​ຕະ​ພັນແຫ່ງ​ຊາດ​ທົ່ວ​ປະເທດ ທັງ​ເປັນການ​ເປີດ​ໂອກາດ​ໃຫ້​ແກ່​ຫົວໜ່ວຍ​ທຸລະ​ກິດ​ໂອ​ດ໋ອບ ແລະ ຫົວໜ່ວຍ​ທຸລະ​ກິດ​ທີ່​ຍັງ​ບໍ່​ທັນ​ໄດ້​ຮັບກາ​ໝາຍ​ໂອ​ດ໋ອບ​ແຫ່ງ​ຊາດ ​ໃນຂອບ​ເຂດ​ທົ່ວ​ປະເທດ ໄດ້​ນຳ​ເອົາຜະລິດ​ຕະ​ພັນ​ຜົນງານ​ຂອງ​ຕົນເອງ​ ມາ​ວາງສະແດງ ແລະ ຈຳໜ່າຍ​ພົບ​ປະ​ແລກປ່ຽນ​ຖອດຖອນ​ບົດຮຽນ​ເຊິ່ງ​ກັນ ແລະ ກັນ ທັງ​ເປັນ​ການ​ໂຄສະນາ​ຜະລິດ​ຕະພັນ​ຂອງ​ຕົນ​ເອງ ​ໃຫ້​ແກ່​ແຂກ​ທີ່ມາ​ທ່ຽວ​ຊົມ​ໄດ້​ຮັບ​ຮູ້​ຢ່າງ​ທົ່ວ​ເຖິງ.

ງານ​ຄັ້ງ​ນີ້​ ນອກຈາກ​ມີ​ວາງ​ສະແດງ ແລະ ຈຳໜ່າຍ​ຜະລິດ​ຕະພັນ​ໂອ​ດ໋ອບ​ແລ້ວ ຍັງ​ມີ​ສິນຄ້າ​ພົ້ນເດັ່ນ​ຂອງ​ຫົວໜ່ວຍ​ທຸລະ​ກິດ​ທົ່ວປະເທດ ອາຫານ​ພື້ນເມືອງ ແລະ ກອງ​ປະຊຸມ​ຖອດ​ຖອນ​ບົດຮຽນວຽກ​ງານ​ໜຶ່ງ​ເມືອງ​ໜຶ່ງ​ຜະລິດ​ຕະ​ພັນ​ແຫ່ງ​ຊາດ ສຳ​ມະ​ນາ​ການ​ພັດທະ​ນາ​ຜະລິດ​ຕະ​ພັນ​ລາວ ແລະ ການ​ແຂ່ງຂັນ​ການສະແດງ​ສິລະປະ​ຂອງ​ນ້ອງ​ນ້ອຍ​ເຍົາວະ​ຊົນ ພິເສດ​ຍັງ​ຈະ​ໄດ້​ມີ​ການ​ແຂ່ງຂັນ​ກະຕ່າ​ຂອງຂວັນ​ສິນຄ້າ​ກາ​ໝາຍ​ໂອດ໋ອບ.

ເພື່ອ​ຜັນ​ຂະຫຍາຍ​ແນວທາງນະໂຍບາຍ​ສົ່ງເສີມ​ການ​ຜະລິດເປັນ​ສິນຄ້າດັ່ງນັ້ນ ທາງ​ກົມ​ສົ່ງເສີມ​ການ​ຄ້າ ກໍ່​ຄືຄະນະ​ຮັບ​ຜິດຊອບ​ງານ​ວາງສະແດງ​ ໄດ້​ມີ​ນະໂຍ​ບາຍ​ໃຫ້ການ​ສະໜັບສະໜູນຊ່ວຍເຫຼືອ​ຫົວໜ່ວຍ​ທຸລະ​ກິດ ສຳລັບ​ຫົວໜ່ວຍ​ທຸລະ​ກິດ​ທີ່​ໄດ້​ຮັບກາ​ໝາຍ​ໂອ​ດ໋ອບ​ ຈະ​ໄດ້​ຮັບ​ນະໂຍ​ບາຍຫ້ອງ​ວາງສະແດງ​ສິນຄ້າ ຈຳນວນ 1 ຫ້ອງ​ຕໍ່ 1 ບໍລິສັດ ແລະ ອາຫານ​ພື້ນເມືອງ​ລາວ 1 ຫ້ອງຕໍ່ 1 ບໍລິສັດ ບໍ່​ໄດ້​ເສຍ​ຄ່າ ນອກ​ນີ້ ຜະລິດ​ຕະ​ພັນ​ອື່ນໆ​ ທາງກົມ​ສົ່ງເສີມ​ຈະ​ໃຫ້ການ​ຊ່ວຍເຫຼືອຄ່າ​ຫ້ອງ​ວາງສະແດງ​ຈຳນວນ 25% ຕໍ່​ຫ້ອງ.

ຂ່າວທີ່ກ່ຽວຂ້ອງ