ເສີມສ້າງສາຍພົວພັນມິດຕະພາບ ແລະ ການຮ່ວມມື

156 16 ກ.ພ. 2017 ຂ່າວໜ້າ​ໜຶ່ງ
ເສີມສ້າງສາຍພົວພັນມິດຕະພາບ ແລະ ການຮ່ວມມື

ວັນ​ທີ 14 ກຸມພາ 2017 ທີ່ທຳ​ນຽບ​ປະທານ​ປະເທດ ທ່ານ ພັນ​ຄຳ ວິພາ​ວັນ ຮອງ​ປະທານປະເທດ ໄດ້​ຕ້ອນຮັບ​ການ​ເຂົ້າຢ້ຽມ​ຄຳນັບ​ອຳ​ລາ​ຂອງ​ທ່ານ Grula Jacota ເອກ​ອັກ​ຄະລັດ​ຖະ​ທູດ​ລູ​ມາ​ນີ ປະຈຳ​ລາວ ທີ່ມີ​ສຳນັກງານ​ສະຖານທູດ​ຕັ້ງ​ຢູ່ບາງກອກ ປະເທດ​ໄທ ໂອກາດສຳເລັດ​ໜ້າທີ່​ການ​ທູດ​ຢູ່​ລາວ.

ໂອກາດ​ນີ້ ທ່ານ​ຮອງ​ປະທານປະເທດ ໄດ້​ສະແດງ​ຄວາມ​ຊົມເຊີຍ​ທີ່​ທ່ານ​ທູດ​ສຳເລັດ​ໜ້າທີ່​ຢູ່ລາວ​ຄັ້ງ​ນີ້ ເຊິ່ງ​ຕະຫຼອດ​ໄລຍະຂອງ​ການ​ປະຕິບັດ​ໜ້າທີ່ ແລະ ປະກອບສ່ວນ​ຢ່າງ​ຕັ້ງໜ້າ ​ໃນການ​ເສີມ​ສ້າງ​ສາຍ​ພົວພັນ​ມິດຕະພາບ​ ການ​ຮ່ວມ​ມື​ທີ່​ມາ​ແຕ່​ດົນນານ​ໃຫ້​ນັບ​ມື້​ແຕກ​ດອກ​ອອກຜົນ ປະກອບສ່ວນ​ພັດທະນາ​ວຽກງານ​ການ​ທູດ​ທັງ​ສອງ​ປະເທດ ​ໃຫ້ໄດ້​ຮັບ​ການ​ພັດທະນາ​ດ້ວຍ​ດີ ພ້ອມ​ອວຍພອນ​ໃຫ້​ທ່ານ​ເດີນທາງ​ກັບ​ຄືນ​ປະເທດ​ດ້ວຍ​ຄວາມສະຫວັດດີ​ພາບ ແລະ ມີ​ຜົນ​ສຳເລັດ​ໜ້າທີ່​ວຽກ​ງານ​ອັນ​ໃໝ່.

ພ້ອມ​ນີ້ ທ່ານ​ທູດ​ໄດ້​ສະແດງຄວາມ​ຂອບໃຈ​ຕໍ່​ທ່ານ​ຮອງ​ປະທານ​ປະເທດ ທີ່​ໃຫ້ການ​ຕ້ອນຮັບຢ່າງ​ອົບ​ອຸ່ນ​ຄັ້ງ​ນີ້ ແລະ ສະແດງຄວາມ​ຍ້ອງຍໍ​ຊົມເຊີຍ​ຕໍ່​ຜົນງານຂອງ​ລັດຖະບານ​ລາວທີ່​ຍາດ​ມາໄດ້ ​ໃນ​ການ​ສ້າງສາ​ພັດທະນາ​ປະເທດ​ຊາດ​ໃນ​ໄລຍະ​ຜ່ານ​ມາ ພ້ອມທັງ​ຂອບໃຈ​ພັກ-ລັດຖະບານ​ລາວ ທີ່​ໃຫ້ການ​ສະໜັບສະໜູນ​ອຳນວຍ​ຄວາມ​ສະດວກ ​ໃຫ້​ແກ່​ການປະຕິບັດ​ໜ້າທີ່​ຄັ້ງ​ນີ້ ​ຈົນ​ປະສົບ​ຜົນສຳເລັດ ແລະ ພ້ອມ​ຈະ​ສືບຕໍ່​ໃຫ້ການ​ຊຸກຍູ້​ສົ່ງເສີມ​ສາຍ​ພົວພັນມິດຕະພາບ ແລະ ການ​ຮ່ວມ​ມືທີ່​ມີ​ມາ​ໃຫ້​ມີ​ບາດກ້າວ​ອັນ​ໃໝ່.

ຂ່າວທີ່ກ່ຽວຂ້ອງ