ກົມໃຫຍ່ຕຳຫຼວດ ຖະແຫຼງການຈັບກຸມພວກຄ້າຢາເສບຕິດ ຢູ່ໃນ 5 ກຸ່ມໃຫຍ່

248 16 ກ.ພ. 2017 ຂ່າວໜ້າ​ໜຶ່ງ

ກົມ​ໃຫຍ່​ຕຳຫຼວດ ກະຊວງ​ປ້ອງ​ກັນ​ຄວາມ​ສະຫງົບ ຖະແຫຼງ​ຂ່າວ​ຜົນສຳເລັດ​ການ​ທັບ​ມ້າງ ຈັບ​ກຸມ​ກຸ່ມ​ແກ້ງ​ຄ້າ​ຢາ​ເສບ​ຕິດ 5 ກຸ່ມ​ໃຫຍ່ ເຊິ່ງ​ໃນ​ນັ້ນ ລວມ​ມີ​ກຸ່ມ​ຂອງ​ທ້າວ ໄຊຊະນະ ແກ້ວ​ພິມ​ພາ ທີ່​ເອົາ​ຕົວ​ຫຼົບໜີ​ການ​ຈັບ​ກຸມ​ອອກ​ນອກ​ປະເທດ ແຕ່​ຖືກ​ເຈົ້າ​ໜ້າທີ່​ຕຳຫຼວດ​ໄທຈັບ​ໄດ້ ​ໃນ​ວັນ​ທີ 19 ມັງກອນ 2017.

ທ່ານ ​ພົ​ຈວ. ທອງ​ເຫຼັກ ມັງ​ໜໍ່​ເມກ ຫົວໜ້າ​ກົມ​ໃຫຍ່​ຕຳຫຼວດ ກະຊວງ​ປ້ອງ​ກັນ​ຄວາມ​ສະຫງົບ ໄດ້ຖະແຫຼງ​ຂ່າວ​ໃນ​ຕອນ​ບ່າຍ​ວັນ​ທີ 15 ກຸມພາ 2017 ກ່ຽວ​ກັບ​ເຫດການ​ແກ້​ໄຂ​ເຄືອ​ຂ່າຍ​ກຸ່ມ​ເປົ້າ​ໝາຍ​ຄ້າຂາຍ​ຢາ​ເສບ​ຕິດ ແລະ ຕິດ​ພັນ​ກັບ​ບັນຫາ​ອາວຸດ​ເສິກ ໃນ​ຄັ້ງ​ວັນ​ທີ 16 ກັນຍາ 2016 ເຖິງ​ວັນ​ທີ 24 ມັງກອນ 2017 ຜ່ານ​ມາ​ວ່າ: “ກົມ​ໃຫຍ່​ຕຳຫຼວດ ກະຊວງ​ປ້ອງ​ກັນ​ຄວາມ​ສະຫງົບ ​ໄດ້​ເປັນ​ເຈົ້າ​ການ​ດຳເນີນວຽກ​ງານ​ວິຊາ​ສະເພາະ​ຂອງ​ຕົນ ເພື່ອ​ເກັບ​ກຳ​ຂໍ້​ມູນ​ຢ່າງ​ເປັນ​ລະບົບ ຈາກ​ນັ້ນ ໄດ້​ປະສານ​ສົມທົບລະຫວ່າງເຈົ້າ​ໜ້າທີ່​ຕຳຫຼວດ​ສູນ​ກາງ​ກັບ​ທ້ອງຖິ່ນ ບັນດາ​ແຂວງ​ທົ່ວ​ປະເທດ ພ້ອມ​ກັບ​ອົງການ​ກ່ຽວຂ້ອງ ແລະ ອຳນາດ​ການ​ປົກຄອງ​ທຸກ​ຂັ້ນ ຈຶ່ງ​ໄດ້​ດຳເນີນ​ການ​ແກ້​ໄຂ​ເຄືອ​ຂ່າຍ​ກຸ່ມ​ເປົ້າ​ໝາຍ​ຊື້​ຂາຍ​ຢາ​ເສບ​ຕິດ ແລະ ຕິດ​ພັນ​ກັບ​ອາວຸດ​ເສິກ​ແຕ່​ເໜືອ​ຮອດ​ໃຕ້ ແລະ ສາມາດ​ຈັບ​ຕົວ​ຜູ້​ຖືກ​ຫາ​ໄດ້​ທັງ​ໝົດ 33 ຄົນ ແລະ ຍິງ 11 ຄົນ ຄື: ວັນ​ທີ 16 ກັນຍາ 2016 ເຈົ້າ​ໜ້າທີ່​ຕຳຫຼວດ​ໄດ້​ຈັບ​ຕົວ​ທ້າວ ກິ​ນ້ອຍ ຜາ​ໄຊ ຫຼື (ແອນ້ອຍ ຫຼື ນ້ອຍ​ອາກາດ) ອາຍຸ 34 ປີ ເຊື້ອ​ຊາດ-ສັນຊາດ​ລາວ ຢູ່​ບ້ານ​ອາກາດ ເມືອງ​ສີ​ໂຄດ​ຕະບອງ ນະຄອນຫຼວງ​ວຽງ​ຈັນ ພ້ອມ​ດ້ວຍ​ພັກ​ພວກຈຳນວນ 16 ຄົນ ຍິງ 4 ຄົນ ກຸ່ມ​ທີ 2 ໃນ​ວັນ​ທີ 11 ທັນວາ 2016 ເຈົ້າ​ໜ້າທີ່​ໄດ້​ຈັບ​ຕົວ (ຄູ່​ຜົວ​ເມຍ) ຄື: ທ້າວ ຫວາດ ພິລາ​ບັນ ອາຍຸ 41 ປີ ເຊື້ອ​ຊາດ-ສັນຊາດ​ລາວ ແລະ ນາງ ແກ້ວ ພິລາ​ບັນ ຫຼື (ກິ່ວ) ອາຍຸ 39 ປີ ເຊື້ອ​ຊາດ-ສັນຊາດ​ລາວ ຢູ່​ແຂວງ​ບໍ່​ແກ້ວ ກຸ່ມ​ທີ 3 ໃນ​ວັນ​ທີ 10 ມັງກອນ 2017 ເຈົ້າ​ໜ້າທີ່​ໄດ້​ຈັບ​ຕົວ​ທ້າວ ຄອນ​ປະສົງ ສຸກ​ກະເສີມ ຫຼື (ຊຽງ​ເທິ) ອາຍຸ 47 ປີ ເຊື້ອ​ຊາດ-ສັນຊາດ​ລາວ ຢູ່​ນະຄອນຫຼວງ​ວຽງ​ຈັນ ພ້ອມ​ດ້ວຍ​ພັກ​ພວກ 3 ຄົນ ເຊິ່ງ​ເປັນ​ຜູ້​ຄ້າຂາຍ​ຢາ​ເສບ​ຕິດ​ລາຍ​ໃຫຍ່ ແລະ ເປັນ​ລາຍ​ໃຫຍ່​ກວ່າ ໄຊຊະນະ ແກ້ວ​ພິມ​ພາ ຫຼື (ວັນ​ລົບ) ກຸ່ມ​ທີ 4 ທ້າວ ໄຊຊະນະ ແກ້ວ​ພິມ​ພາ ອາຍຸ 41 ປີ ສັນຊາດ​ລາວ ຢູ່​ແຂວງ​ຄຳ​ມ່ວນ ເປົ້າ​ໝາຍ​ນຳ​ຈັບ​ໄດ້​ຫຼົບໜີ​ເຈົ້າ​ໜ້າທີ່​ຕຳຫຼວດ ພວກ​ເຮົາ​ຈຶ່ງ​ໄດ້​ປະສານ​ງານ​ເຈົ້າ​ໜ້າທີ່​ຕຳຫຼວດ​ປະເທດ​ໄທ ຈຶ່ງ​ຈັບ​ຕົວ​ໄດ້​ໃນ​ວັນ​ທີ 19 ມັງກອນ 2017 ຢູ່​ສະໜາມ​ບິນ ສຸວັນນະ​ພູມ ປະເທດ​ໄທ ແລະ ເຈົ້າ​ໜ້າທີ່​ພວກ​ເຮົາ​ໄດ້​ຈັບ​ກຸມ​ພັກ​ພວກ​ຂອງ​ທ້າວ ໄຊຊະນະ ແກ້ວ​ພິມ​ພາ ຢູ່​ແຂວງ​ຄຳ​ມ່ວນ ແລະ ນະຄອນຫຼວງ​ວຽງ​ຈັນ ໃນ​ວັນ​ທີ 20 ມັງກອນ 2017 ໄດ້​ກັກ​ຕົວ​ເປົ້າໝາຍ​ຈຳນວນ 5 ຄົນ ຍິງ 1 ຄົນ ກຸ່ມ​ທີ 5 ຖືກ​ຈັບ​ຕົວ​ໃນ​ວັນ​ທີ 24 ມັງກອນ 2017 ຄື: ທ້າວ ຄອນ​ໄທ ໂຄດ​ສົມບັດ ຫຼື (ສີ້ວ) ບ້ານ​ຫຼັກ​ເມືອງ ເມືອງ​ສອງ​ຄອນ ແຂວງ​ສະຫວັນ​ນະ​ເຂດ ພ້ອມ​ດ້ວຍ​ພັກ​ພວກ 2 ຄົນ.

ຫົວໜ້າ​ກົມ​ໃຫຍ່​ຕຳຫຼວດ​ຍັງ​ຖະແຫຼງ​ໃຫ້​ຮູ້​ອີ​ກວ່າ: “ຜ່ານ​ການ​ປະຕິບັດ​ງານແຕ່​ວັນ​ທີ 16 ກັນຍາ 2016 ມາ​ຮອດ​ປັດຈຸບັນ ສາມາດ​ຢຶດ​ຂອງ​ກາງ​ໄດ້​ຫຼາຍ​ລາຍການ ເຊັ່ນ: ຢາ​ເສບ​ຕິດ​ຫຼາຍ​ຊະນິດ ອາວຸດ​ເສິກ (ປືນ) ຫຼາຍ​ກະບອກ ເງິນສົດ​ສະກຸນ​ຕ່າງໆ ວັດຖຸ​ມີຄ່າ​ຈຳນວນ​ໜຶ່ງ ແລະ ອື່ນໆ ໄດ້​ອາ​ຍັດ​ເຮືອນ ໂຮງແຮມ ຕະຫຼາດ ຮ້ານ​ອາຫານ ໂຮງ​ເຟີ​ນີ​ເຈີ ໂຮງງານ​ສັງກະສີ ສາງ ກະ​ລ້າ​ລົດ ຫ້ອງ​ແຖວ ປ້ຳນ້ຳມັນ ລົດ​ໃຫຍ່ ເຮືອ​ເຈັດ​ສະ​ກີ ແລະ ອື່ນໆ ຜ່ານ​ການ​ສືບສວນ-ສອບ​ສວນ​ຜູ້​ຖືກ​ຫາ ຜູ້ກ່ຽວ​ໄດ້​ຮັບ​ສາລະພາບ​ວ່າ ໄດ້​ຮ່ວມ​ກັນ​ຊື້-ຂາຍ ຂົນສົ່ງ ແລະ ມີ​ຢາ​ເສບ​ຕິດ​ໄວ້​ໃນ​ຄອບ​ຄອງ​ດັ່ງກ່າວ​ມາ​ເທິງ ແລະ ເຄື່ອງ​ຂອງ​ກາງ​ທີ່​ເຈົ້າ​ໜ້າທີ່​ກວດ​ພົບ​ນັ້ນ​ແມ່ນ​ເປັນ​ຂອງ​ພວກ​ກ່ຽວ​ແທ້ ນອກຈາກ​ນັ້ນ ວັນ​ທີ 14 ກຸມພາ 2017 ເຈົ້າ​ໜ້າທີ່​ກຳລັງ​ປ້ອງ​ກັນ​ຄວາມ​ສະຫງົບ ​ຍັງ​ໄດ້​ຕິດຕາມ ແລະ ກັກ​ຕົວ​ກຸ່ມ​ຄົນ​ທີ່​ແລ່ນ​ຊື້​ຈ້າງ ແລະ ໃຊ້​ສິນ​ບົນ​ເຈົ້າ​ໜ້າທີ່ ເພື່ອ​ປ່ອຍ​ຕົວ​ຜູ້​ເປັນ​ຫົວ​ໂປ່​ໂຕ​ການ​ດື້​ດ້ານ​ຊື້​ຂາຍ​ຢາ​ເສບ​ຕິດ​ລາຍ​ໃຫຍ່ ​ເປັນ​ເງິນ​ຈຳນວນ 30 ລ້ານ​ບາດ​ຕໍ່ 1 ຄົນ ໂດຍ​ຈະ​ຈ່າຍ​ເງິນ​ໃຫ້​ກ່ອນ 10 ລ້ານ​ບາດ ພາຍຫຼັງ​ປ່ອຍ​ຕົວ​ແລ້ວ ຈຶ່ງ​ຈະ​ໃຫ້​ຕື່ມ 20 ລ້ານ​ບາດ ຕໍ່​ເຫດການ​ດັ່ງກ່າວ ຄະນະ​ຮັບຜິດຊອບ​ດຳເນີນ​ຄະດີ​ ຍັງ​ສືບຕໍ່​ເປີດ​ກວ້າງ​ດຳເນີນ​ການ​ສືບສວນ-ສອບ​ສວນ ເກັບ​ກຳ​ຂໍ້​ມູນ​ຫຼັກ​ຖານ​ຂະຫຍາຍ​ຜົນ​ໄປ​ຫາ​ກຸ່ມ​ແກ້ງ​ເຄືອ​ຂ່າຍ​ທີ່​ຍັງ​ເຫຼືອ ເພື່ອ​ລົງໂທດ​ຕາມ​ລະບຽບ​ກົດໝາຍ​ຢ່າງ​ເຂັ້ມ​ງວດ ຕໍ່​ຜົນສຳເລັດ​ເບື້ອງ​ຕົ້ນ ​ໃນ​ການ​ແກ້​ໄຂ​ປາກົດການ​ຫຍໍ້ທໍ້​ຂອງ​ສັງຄົມ ເວົ້າ​ລວມ ເວົ້າ​ສະເພາະແມ່ນ​ການ​ແກ້​ໄຂ​ກຸ່ມ​ຊື້​ຂາຍ ຂົນສົ່ງ ແລະ ມີ​ຢາ​ເສບ​ຕິດ​ໄວ້​ໃນ​ຄອບ​ຄອງ ແມ່ນ​ການ​ປະກອບສ່ວນ​ຂອງ​ພົນລະ​ເມືອງ​ດີ ອຳນາດ​ການ​ປົກຄອງ​ທ້ອງຖິ່ນ ຊາວ​ນະຄອນຫຼວງ​ວຽງ​ຈັນ ແລະ ບັນດາ​ແຂວງ​ທົ່ວ​ປະເທດ ສະນັ້ນ ຂ້າພະເຈົ້າ​ຕາງໜ້າ​ໃຫ້​ກຳລັງ​ປ້ອງ​ກັນ​ຄວາມ​ສະຫງົບ ​ຂໍ​ຊົມເຊີຍ ແລະ ຂອບໃຈ​ຕໍ່​ການ​ປະກອບສ່ວນຂອງ​ທຸກ​ທ່ານ​ ໃນ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ​ເປັນ​ຢ່າງ​ດີ​ຕະຫຼອດ​ມາ”.

ຕໍ່​ຄຳ​ຖາມ​ຂອງ​ນັກ​ຂ່າວ​ທີ່​ວ່າ: ມີ​ສາເຫດ​ອັນ​ໃດ​ບໍ່ ​ທີ່​ທາງ​ລາວ​ເຮົາ​ບໍ່​ສາມາດ​ຖະແຫຼງ​ຂ່າວ​ແຕ່​ຫົວທີ ກໍລະນີທ້າວ ໄຊຊະນະ ແກ້ວ​ພິມ​ພາ ນັ້ນ ທ່ານ ​ພົ​ຈວ. ທອງ​ເຫຼັກ ມັງ​ໜໍ່​ເມກ ກ່າວ​ວ່າ: “ຍ້ອນ​ວ່າ​ມັນເປັນ​ເຄືອ​ຂ່າຍ​ທີ່​ໃຫຍ່ ກ່ຽວຂ້ອງ​ທຸກ​ແຂວງ ມັນ​ພົວພັນ​ກັບ​ຄະດີ​ອື່ນໆ ສະນັ້ນ ຖ້າ​ຖະແຫຼງ​ອອກ​ໄປ​ໃນ​ເວລາ​ທີ່​ບໍ່​ເໝາະ​ສົມ ຈະ​ເຮັດ​ໃຫ້​ເສຍ​ຮູບ​ຄະດີ ຖື​ວ່າການ​ຖະແຫຼງ​ຂ່າວ​ຄັ້ງ​ນີ້​ເໝາະ​ສົມ​ກັບ​ເວລາ​ແລ້ວ” ທ່ານ ​ພົ​ຈວ. ທອງ​ເຫຼັກ ມັງ​ໜໍ່​ເມກ ຍັງ​ໄດ້​ຕອບ​ຄຳ​ຖາມ​ຂອງ​ນັກ​ຂ່າວ​ທີ່​ຖາມ​ວ່າ ຜ່ານ​ມາ​ສື່​ອອນ​ລາຍ​ຂອງ​ໄທອອກ​ຂ່າວ​ວ່າ ການ​ຈັບ​ກຸມ​ຜູ້​ກ່ຽວຂ້ອງ​ຄັ້ງ​ດັ່ງກ່າວ ​ແມ່ນ​ໄດ້​ຮັບ​ການ​ຮ່ວມ​ມື ແລະ ປະສານ​ສົມທົບ​ກັນ​ກັບ​ຝ່າຍ​ລາວ ແລະ ວ່າ​ທາງ​ລາວ​ຈະ​ຂໍ​ເອົາ​ພວກ​ກ່ຽວ​ມາ​ດຳເນີນ​ຄະດີ​ຢູ່​ລາວ ແມ່ນ​ຄວາມ​ຈິງ ຫຼື ບໍ່ ນັ້ນ​ວ່າ “ການ​ປະສານ​ສົມທົບ​ກັບ​ເຈົ້າ​ໜ້າທີ່ ລາວ-ໄທ ພວກ​ເຮົາ​ມີ​ກົນ​ໄກ​ປະສານ​ງານ​ຢູ່​ແລ້ວ ລະຫວ່າງ​ກົມ​ໃຫຍ່​ຕຳຫຼວດ​ຂອງ​ລາວ ແລະ ຕຳຫຼວດ​ແຫ່ງ​ຊາດ​ຂອງ​ໄທ ເຊິ່ງ​ມີ​ການ​ແລກປ່ຽນ​ຂໍ້​ມູນ​ຂ່າວສານ​ນຳ​ກັນ​ເປັນ​ປົກກະຕິ ກ່ຽວ​ກັບ​ວ່າ​ຈະ​ນຳ​ຕົວ​ຜູ້​ຖືກ​ຫາ​ມາ​ດຳເນີນ​ຄະດີ​ຢູ່​ລາວ ຫຼື ບໍ່​ນັ້ນ ກໍ່​ຈະ​ຕ້ອງ​ໄດ້​ເບິ່ງ​ຄືນ​ກົດໝາຍ ແຕ່​ໃນ​ເວລາ​ນີ້​ພວກ​ເຮົາ​ບໍ່​ໄດ້​ຕັ້ງ​ເປັນ​ບັນຫາ” ຕໍ່​ກັບ​ຄຳ​ຖາມ​ຂອງ​ນັກ​ຂ່າວ​ທີ່​ວ່າ ທາງ​ລາວ​ເຮົາ​ມີ​ແຜນການ​ແນວໃດ​ຕໍ່​ເລື່ອງ​ນີ້ ທ່ານ​ຫົວໜ້າ​ກົມ​ໃຫຍ່​ຕຳຫຼວດ​ໄດ້​ໃຫ້​ຄຳ​ຕອບ​ວ່າ “ຈະ​ສືບຕໍ່​ເພີ່ມ​ທະວີ​ການ​ແກ້​ໄຂ​ປາກົດການ​ຫຍໍ້ທໍ້​ໃນ​ສັງຄົມ ສະເພາະ​ຄະດີ​ນີ້​ແມ່ນ​ຈະ​ສືບຕໍ່​ດຳເນີນ​ການ​ສືບສວນ-ສອບ​ສວນ ເພື່ອ​ເກັບ​ກຳ​ຂໍ້​ມູນ​ຫຼັກ​ຖານ ແລະ ສືບຕໍ່​ສອບ​ສວນ​ເປົ້າ​ໝາຍ​ທີ່​ຈັບ​ກຸມ​ໄດ້ ເພື່ອ​ດຳເນີນ​ຕາມ​ລະບຽບ​ກົດໝາຍ ສ່ວນ​ເຄືອ​ຂ່າຍ​ຕ່າງໆ​ກໍ່​ຈະ​ສືບຕໍ່​ດຳເນີນ​ການ​ສືບສວນ-ສອບ​ສວນ ເພື່ອ​ນຳ​ຕົວ​ຜູ້​ກະທຳ​ຜິດ​ມາ​ລົງໂທດ​ຕາມ​ລະບຽບ​ກົດໝາຍ”.

ເພື່ອ​ສືບຕໍ່​ເຮັດ​ໃຫ້​ນະຄອນຫຼວງ​ວຽງ​ຈັນ ກໍ່​ຄືບັນດາ​ແຂວງ​ທົ່ວ​ປະເທດ​ມີ​ຄວາມ​ສະຫງົບ​ປອດ​ໄພ ມີຄວາມ​ເປັນ​ລະບຽບ​ຮຽບ​ຮ້ອຍ​ໃນ​ສັງຄົມ ສືບຕໍ່​ແກ້​ໄຂ​ບັນຫາ​ປາກົດການ​ຫຍໍ້ທໍ້​ດ້ານ​ຕ່າງໆ​ຢູ່​ໃນ​ສັງຄົມ​ໃຫ້​ໝົດ​ໄປ ທ່ານ ​ພົ​ຈວ. ທອງ​ເຫຼັກ ມັງ​ໜໍ່​ເມກ ຍັງ​ຮຽກຮ້ອງ​ມາ​ຍັງ​ພະນັກງານ ທະຫານ ຕຳຫຼວດ ແລະ ປະຊາຊົນ​ບັນດາເຜົ່າ ຊາວ​ຕ່າງ​ດ້າວ ຊາວ​ຕ່າງປະເທດ​ທີ່​ດຳລົງ​ຊີວິດ ພັກ​ເຊົາ ດຳເນີນ​ທຸລະ​ກິດ​ຢູ່​ນະຄອນຫຼວງວຽງ​ຈັນ ແລະ ບັນດາ​ແຂວງ​ໃນ​ທົ່ວ​ປະເທດ ຈົ່ງ​ພ້ອມ​ກັນ​ເຄົາລົບ ແລະ ປະຕິບັດ​ກົດໝາຍ ມີ​ສະຕິ​ລະວັງ​ຕົວ ປ້ອງ​ກັນ​ຕົນ​ເອງ​ຈາກ​ກົນອຸບາຍ​ຂອງ​ກຸ່ມ​ຄົນ​ບໍ່​ດີ ຕັ້ງໜ້າ​ປະກອບສ່ວນ​ເຂົ້າ​ໃນ​ວຽກ​ງານ​ຮັກສາ​ຄວາມ​ສະຫງົບ ແລະ ຄວາມ​ເປັນ​ລະບຽບ​ຮຽບ​ຮ້ອຍ​ໃນ​ສັງຄົມ ເພື່ອ​ພ້ອມ​ກັນ​ເປັນ​ເຈົ້າ​ການ​ສ້າງສາພັດທະນາ​ປະເທດ​ເຮົາ​ໃຫ້​ມີ​ຄວາມ​ສະຫງົບ ມີ​ຄວາມ​ເປັນ​ລະບຽບ​ຮຽບ​ຮ້ອຍ​ທາງ​ສັງຄົມ ພ້ອມ​ທັງ​ຮຽກຮ້ອງ​ມາ​ຍັງ​ສຳນັກງານ ອົງການ ບັນດາ​ກະຊວງ ອຳນາດ​ການ​ປົກຄອງ​ທ້ອງຖິ່ນ​ທຸກ​ຂັ້ນ ຕະຫຼອດ​ຮອດ​ພໍ່​ແມ່​ປະຊາຊົນ​ບັນດາເຜົ່າ​ໃນ​ທົ່ວ​ປະເທດ ຈົ່ງ​ສະໜັບສະໜູນ​ພາລະກິດ​ປາບ​ປາມ ແລະ ແກ້​ໄຂ​ບັນຫາ​ຢາ​ເສບ​ຕິດ​ຢ່າງ​ເຕັມທີ່ ຈົ່ງ​ເປັນ​ຫູ​ເປັນຕາ​ຕິດຕາມປາກົດ​ເຫັນ​ຜູ້​ຄ້າຂາຍ ຂົນສົ່ງ​ຢາ​ເສບ​ຕິດ​ແລ້ວ​ລາຍ​ງານ​ໃຫ້​ເຈົ້າ​ໜ້າທີ່​ພວກ​ເຮົາ​ແກ້ໄຂ​ຢ່າງ​ທັນ​ການ ພວກ​ເຮົາ​ຈະ​ຮັກສາ​ຄວາມ​ລັບ ແລະ ໃຫ້​ຄວາມ​ປອດ​ໄພ​ຜູ້​ທີ່​ລາຍ​ງານ​ຂໍ້​ມູນ​ກ່ຽວ​ກັບ​ບັນຫາ​ຢາ​ເສບ​ຕິດ​ຢ່າງ​ດີ​ທີ່​ສຸດ.

ຂ່າວທີ່ກ່ຽວຂ້ອງ