ສົງ­ຄາມ​ແບ້ ເທິງ​ໜ້າ​ເຟ​ສ​ບຸກ - ໂດຍ : ດັ້ນ​ກີບ​ເມກ

1.922 17 ກ.ພ. 2017 ນານາສາລະ

ມີ​ຫຼາຍ​ຄັ້ງ​ທີ່​ຄໍ​ລຳ​ເຮົາ​ເຄີຍ​ເວົ້າ​ເລື້ອຍໆ​ວ່າ ຢາກໃຫ້​ຜູ້​ບໍ­ລິ­ໂພກ​ຂ່າວ​ທາງ​ສື່​ອອນ​ລາຍ​ໃຫ້​ມີ​ສະ­ຕິ ກວດ​ສອບ​ເຖິງ​ສາ­ເຫດ​ທີ່ມາ​ວ່າ ຂ່າວ​ແຕ່​ລະ​ເລື່ອງທີ່​ມັນ​ເກີດ​ຂຶ້ນ​ນີ້​ ມີ​ຂໍ້​ມູນ​ຫຼັກ​ຖານ​ເປັນ​ຈິງ​ຫຼາຍໜ້ອຍ​ພຽງ​ໃດ? ເພາະ​ຖ້າ­ວ່າຜູ້​ບໍ­ລິ­ໂພກ​ສື່​ຫາກດ່ວນ​ຕັດ­ສິນ​ໃຈ​ວ່າ​ອັນ​ໃດ​ຖືກ-ຜິດຕາມ​ຂ່າວ​ໂລດ ອາດ​ເກີດ​ຄວາມ​ຜິດ­ພາດ​ຖົກ​ຖຽງ​ກັນ​ຂຶ້ນ ​ກາຍ­ເປັນບັນ­ຫາ ດັ່ງ​ນິ­ທານ​ເສິກ​ແບ້ ທີ່​ເກີດ​ຂຶ້ນ​ກັບ​ຊາຍສອງ​ຄົນ ​ທີ່​ຜູ້​ໜຶ່ງ​ຢາກ​ລ້ຽງ​ແບ້ ແລະ ຜູ້​ໜຶ່ງ​ຢາກປູກ​ໝາກ­ເຂືອ.

ຜູ້​ຂຽນ​ຢາກ​ເວົ້າ​ເລື່ອງ​ໃຫ້​ມີ​ສະ­ຕິ ​ຮູ້​ເທົ່າ​ທັນ​ເຫດການ​ທີ່​ເກີດ​ຂຶ້ນ ​ຈົນ​ກາຍ­ເປັນ​ຂ່າວ​ເທິງ​ໜ້າ​ເຟດ​ບຸກນັ້ນ ​ກໍ່​ເພື່ອ​ຢາກ​ໃຫ້ເປັນ​ການ​ປ້ອງ​ກັນ​ບໍ່​ໃຫ້​ສັງ­ຄົມສັບ­ສົນ ຄື​ດັ່ງ​ກໍ­ລະ­ນີ​ພໍ່­ຄ້າ​ຢາ​ເສບ​ຕິດ​ລາຍ​ໃຫຍ່​ທີ່ຖືກ​ຈັບ​ຢູ່​ປະ­ເທດ​ໄທ... ມີ​ຂ່າວ​ຕາມ​ໜ້າເຟດ​ບຸກ​ໃນແຕ່​ລະ​ມື້ ບາງ​ກໍ­ລະ­ນີ​ກໍ່​ລົງ​ຮູບ​ພາບ​ບໍ່​ເໝາະ​ສົມ ບ້ານ​ເຮົາ​ມີ​ລະ­ບຽບ​ການ​ຄຸ້ມ​ຄອງ​ສື່​ອອນ​ລາຍ​ທີ່ຮັດ­ກຸມເຄັ່ງຄັດ ​ເປັນ​ມາດ­ຖານ​ແກ່​ສັງ­ຄົມ ດັ່ງ­ນັ້ນ ຜູ້​ທີ່​ບໍ­ລິ­ໂພກ​ຂ່າວ ຫຼື ຜູ້​ປ່ອຍ​ຂ່າວ​ ຕ້ອງ​ໄດ້​ມີ​ສະ­ຕິ ເບິ່ງ​ໃຫ້​ລະ­ອຽດ ມີ​ຄວາມ​ອົດ­ທົນ ຫຼີກ­ເວັ້ນ​ສ້າງ​ກະແສ​ຢາກ​ດັງ​ໂດຍ​ບໍ່​ຄຳ­ນຶງ​ເຖິງ​ຄວາມ​ຖືກ­ຕ້ອງເໝາະ​ສົມ ເພາະ​ໃນ​ກົດ­ໝາຍ​ວ່າ​ດ້ວຍ​ສື່​ມວນ​ຊົນ ມາດ­ຕາ 13 ກໍ່​ໄດ້​ເວົ້າ​ຢ່າງ​ຊັດ​ເຈນ​ວ່າ: ເນື້ອ​ໃນ ແລະ ຮູບ​ການ​ຂອງ​ສື່​ມວນ​ຊົນ​ລາວ​ທຸກ​ປະ­ເພດ ຕ້ອງ​ປົກ​ປ້ອງ​ຄວາມ​ຖືກ­ຕ້ອງຂອງ​ແນວ­ທາງ​ນະ​ໂຍບາຍ​ຂອງ​ພັກ ລະ­ບຽບ​ກົດ­ໝາຍ​ຂອງ​ລັດ ຕຳ​ນິ​ວິຈານ​ປາ­ກົດ­ການ​ລະ­ເມີດ​ລະ­ບຽບ​ກົດ­ໝາຍ ສິ່ງ​ຫຍໍ້ທໍ້​ໃນ​ສັງ­ຄົມ ແລະ ຕອບ​ຕ້ານ​ຖ້ອຍ​ທຳ­ນອງ​ທີ່​ບິດເບືອນ​ໃສ່​ຮ້າຍ​ປ້າຍ​ສີ​ທີ່​ສ້າງ​ຄວາມ​ເສື່ອມ​ເສຍ​ຕໍ່ກຽດ​ສັກ​ສີ ຜົນ​ປະ­ໂຫຍດ​ຂອງ​ຊາດ ແລະ ປະ­ຊາຊົນ.

ເມື່ອ​ເວົ້າ​ເຖິງ​ລະ­ບຽບ​ກົດ­ໝາຍ​ບ້ານ​ເຮົາ​ກໍ່​ມີແນວ­ທາງ​ໄວ້​ແຈ້ງ­ວ່າ ການ​ຫັນ​ເຂົ້າ​ສູ່​ການ​ຄຸ້ມຄອງ​ລັດ​ວ່າ​ດ້ວຍ​ກົດ­ໝາຍ ດັ່ງ­ນັ້ນ ຢ່າ​ຟ້າວ​ລັ່ນປາກ​ເວົ້າ​ວ່າ ບ້ານ​ເຮົາ​ບໍ່​ມີ​ລະ­ບຽບ​ວິ­ໄນ​ເຄັ່ງ​ຄັດ ເພາະ​ກະ­ແສ​ໂລ­ກາ​ພິ​ວັດ ແລະ ໂລກ​ຂອງ​ສື່​ອອນລາຍ​ທີ່​ມາ​ແຮງ​ ຈົນ​ສ້າງ​ຄວາມ​ສັບ­ສົນ​ໃຫ​ແກ່​ຜູ້​ບໍ­ລິ­ໂພກ​ຂ່າວ​ທີ່​ຂາດ​ສະ­ຕິ​ ຫຼົງ​ເຊື່ອ ອາດ​ເຮັດ​ໃຫ້​ສັງຄົມ​ເກີດ​ຄວາມ​ສັບ­ສົນ​ຈົນ​ບໍ່​ຮູ້​ທາງ​ອອກ ບັນ­ຫາໂລກ​ແຕກ​ໃນ Face Book ນີ້​ບໍ່​ແມ່ນ​ແຕ່​ຢູ່​ປະ­ເທດເຮົາ ​ຢູ່​ປະ­ເທດ​ໃກ້​ຄຽງ ຫຼື ກະ​ໂຕ​ປະ­ເທດອາ​ເມ​ຣິ​ກາ ກໍ່​ເກີດ​ມີ​ຂ່າວ​ລືຂ່າວ​ປອມ​ເກີດ​ຂຶ້ນ ເຊິ່ງ​ເອີ້ນ​ວ່າ Fake News ແຮງ​ທີ່​ສຸດ​ແມ່ນ​ເວ­ລາ​ການ​ເລືອກຕັ້ງ​ປະ­ທາ­ນາ­ທິ­ບໍ­ດີ​ອາ​ເມ​ຣິ​ກາ ສະ­ນັ້ນ ກ່ອນ​ຈະ Comment ບັນ­ຫາ​ໃດ​ໜຶ່ງ​ຕ້ອງ​ເບິ່ງ​ຄວາມ​ເໝາະສົມ​ຄວາມ​ເປັນ​ຈິງ​ສາ­ກ່ອນ.

ເຫັນ​ວ່າສື່​ມວນ​ຊົນ​ເຮົາ​ຄວນ​ຊີ້​ແຈງ​ປ່າວ­ເຕືອນໃຫ້​ສັງ­ຄົມ​ຮູ້ ແລະ ກຸ່ມ​ຂອງ​ຜູ້​ຫຼິ້ນ​ເຟດ​ບຸກ ຫຼື ບໍ​ລິໂພກ​ຂ່າວ​ທາງ​ສື່​ອອນລາຍ ​ມີ​ຫຼາຍ​ປະ­ເພດ ຈາກພໍ່­ຄ້າ-​ປັນ­ຍາ​ຊົນ ຈົນ​ຮອດ​ປະ­ຊາ­ຊົນ​ຕາມ​ຊົນ­ນະ­ບົດ ດັ່ງ­ນັ້ນ ບາງ​ຂ່າວ​ອາດ​ເຮັດ​ໃຫ້​ພວກ​ເຂົາຫຼົງ​ເຊື່ອງ່າຍ ຂາດ​ຄວາມ​ຮູ້​ໃນ​ການ​ແຍກ​ແຍະ ເພາະ​ຖ້າເຂົ້າ­ໃຈ​ຜິດ​ກັນ​ຕັ້ງ­ແຕ່​ຕົ້ນ​ ອາດ​ກໍ່­ໃຫ້­ເກີດ​ສົງ­ຄາມແບ້​ເທິງ​ໜ້າເຟດ​ບຸກ​ກໍ່​ເປັນ​ໄດ້ !.

ຂ່າວທີ່ກ່ຽວຂ້ອງ