ສ້າງຄວາມເຂົ້າໃຈການຄຸມຄ້ອງຜະລິດຕະພັນໄມ້

109 17 ກ.ພ. 2017 ຂ່າວໜ້າ​ໜຶ່ງ

ວັນ​ທີ 16 ກຸມພາ 2017 ທີ່ໂຮງແຮມ​ລາວ​ພລາ​ຊາ ນະຄອນຫຼວງ​ວຽງ​ຈັນ ກົມ​ອຸດສາຫະກຳ ແລະ ຫັດຖະກຳ ກະຊວງ​ອຸດ​ສາຫະ​ກຳ ແລະ ການ​ຄ້າ ຈັດ​ກອງປະຊຸມ​ຮັບ​ຟັງ​ການ​ເຜີຍແຜ່​ຂໍ້​ຕົກລົງ ວ່າ​ດ້ວຍ​ການ​ຮັບຮອງ​ເອົາລາຍການ (ບັນຊີ) ຜະລິດ​ຕະພັນ​ໄມ້​ເພື່ອ​ສົ່ງ​ອອກ ແລະ ຫ້າມສົ່ງ​ອອກ ແລະ ແຈ້ງ​ການ​ແບບຟອມ​ເອກະສານ​ການ​ຢັ້ງຢືນ​ຜະລິດ​ຕະ​ພັນ​ໄມ້​ທຳ​ມະ​ຊາດ ແລະ ຜະລິດ​ຕະ​ພັນ​ໄມ້​ສວນ​ປູກ​ເພື່ອ​ສົ່ງອອກ ເປັນ​ປະທານ​ຂອງ​ທ່ານ ມະໂນ​ຮັກ ຣາ​ຊະ​ຈັກ ກົມ​ອຸດ​ສາ​ຫະກຳ ແລະ ຫັດຖະກຳ ມີ​ຕາງໜ້າຈາກ​ກົມ​ກອງ ສູນ​ພັດທະນາ ແລະ ສະມາຄົມ​ທີ່​ກ່ຽວຂ້ອງ​ເຂົ້າຮ່ວມ.

ບັນດາ​ຜູ້​ທີ່​ເຂົ້າ​ຮ່ວມ​ໃນ​ກອງປະຊຸມ​ຄັ້ງ​ນີ້ ແມ່ນ​ໄດ້​ຮັບ​ຟັງ​ການເຜີຍແຜ່​ນິຕິ​ກຳ​ເພື່ອ​ໃຫ້​ມີ​ຄວາມຮັບ​ຮູ້ ແລະ ເຂົ້າໃຈ​ເປັນ​ເອກະພາບ​ກັນ.

ກົມ​ອຸດສາຫະກຳ ແລະ ຫັດຖະ​ກຳ ອອກ​ແຈ້ງ​ການ​ໃຫ້​ພະແນກ​ອຸດສາຫະກຳ ແລະ ການຄ້າ​ແຂວງ ນະຄອນຫຼວງ ເປັນເຈົ້າ​ການ​ໃນ​ການ​ກວດກາ ແລະ ຢັ້ງຢືນ​ຜະລິດ​ຕະ​ພັນ​ໄມ້​ຈາກ​ທຳມະ​ຊາດ ແລະ ຢັ້ງຢືນ​ຜະລິດ​ຕະພັນ​ໄມ້​ຈາກ​ສວນ​ປູກ ເພື່ອ​ສົ່ງອອກ​ໃຫ້​ຖືກຕ້ອງ ແລະ ສອດຄ່ອງ​ຕາມ​ທີ່​ໄດ້​ກຳນົດ​ໄວ້​ໃນເອກະສານ​ຊ້ອນ​ທ້າຍ 01 ຂອງຂໍ້​ຕົກລົງເລກ​ທີ 1833/​ອຄ ຄື: ການ​ຢັ້ງຢືນ​ຜະລິດ​ຕະ​ພັນ​ໄມ້​ຈາກທຳ​ມະ​ຊາດເພື່ອ​ສົ່ງ​ອອກ​ ແມ່ນໃຫ້​ນຳ​ໃຊ້​ແບບ​ຟອມ (ອ.ຄ 01) ໂດຍ​ສົມທົບ​ກັບ​ຄະນະ​ກຳ​ມະການ​ຈາກ​ຂະແໜງການ​ເງິນ ແລະ ຂະແໜງ​ກະສິກຳ ແລະ ປ່າໄມ້ ແລະ ການ​ຢັ້ງຢືນ​ຜະລິດຕະ​ພັນ​ໄມ້​ຈາກ​ສວນ​ປູກເພື່ອ​ສົ່ງອອກ ​ແມ່ນ​ໃຫ້​ນຳ​ໃຊ້​ແບບ​ຟອມ (ອ.ຄ 02) ໂດຍ​ສົມ​ທົມ​ກັບ​ຄະນະ​ກຳມະການ​ຈາກ​ຂະແໜງ​ກະສິ​ກຳ ແລະ ປ່າໄມ້.

ຂ່າວທີ່ກ່ຽວຂ້ອງ