ຮູ້ພາສາລາວ ມື້ລະຄຳ : ຄຳ​ລາວ​ເດີມ

101 17 ກ.ພ. 2017 ຫົວຂໍ້ຂ່າວອື່ນໆ

ຊ່າງ ໃນ​ພາ­ສາ​ລາວ​ມີ​ຫຼາຍຄວາມ​ໝາຍ ແລະ ເປັນ​ທັງ​ຄຳກິ­ລິ­ຍາ ແລະ ຄຳ​ວິ­ເສດ ຈຶ່ງ​ພົບເຫັນ​ໃຊ້​ປົກ­ກະ­ຕິ​ໃນ​ຊີ­ວິດ​ປະຈຳວັນ. ສຳ­ລັບ​ຄວາມ​ໝາຍໜຶ່ງ ແປ​ວ່າ ຊຳ­ນານ, ມີ​ສີ­ມື​ໃນສີ​ລະ​ປະ­ກຳ​ຕ່າງໆ.

ຕົວ­ຢ່າງ:

- ລາວ​ເປັນ​ຊ່າງ­ຕັດ­ຜົມ, ຂ້ອຍ​ເປັນ​ຊ່າງ​ແປງ​ລົດ, ໝູ່​ຂ້ອຍ​ພັດ​ຊ່າງ​ຮ້ອງ​ຊ່າງ​ລຳ.

- ເຂົ້າ​ເພິ່ນ​ຂາວ ລູກ​ສາວ​ເພິ່ນ​ແພງ ແກງ​ເພິ່ນ​ແຊບ ປາ­ແດກ​ເພິ່ນ​ນົວ ຜົວ​ເພິ່ນ​ດີ ຄອບ​ເມຍ​ເພິ່ນ​ຊ່າງ. (ຜະ­ຫຍາ)

ຖ້າ​ເປັນ​ຄຳ​ວິ­ເສດ ມັກ​ໃຊ້​ເປັນ​ຄຳ​ອຸ­ທານ​ໄດ້ ເຊິ່ງ​ໝາຍ​ເຖິງ ເວົ້າ​ແທ້, ເວົ້າ​ຖືກ, ເວົ້າ​ຄື, ສະ­ຫຼາດ... ເຊິ່ງ​ໃຊ້​ໄດ້​ທົ່ວ​ໄປ ແລະ ໃນ​ວັນ­ນະ­ຄະ­ດີ.

- ຊ່າງ​ວ່າ​ແທ້? ໂຕ​ຊ່າງ​ເຮັດ​ແນວ​ບໍ່​ມີ​ໃຜ​ເຮັດ​ໄດ້​ນໍ?

- ທັງ­ຫຼາຍ​ເພິ່ນ​ເມົາ​ເຫຼົ້າ ເມົາ​ກັນ­ຊາ​ຢາ­ຝິ່ນ ບາ­ດວ່າ​ຟັງ​ນ້ອງ​ເວົ້າ ຕົວ​ອ້າຍ​ພັດ​ຊ່າງ​ເມົາ. (ຜະ­ຫຍາ)

- ນ້ອງ​ຊ່າງ​ຕິ­ຖະ­ແຫຼງ​ເວົ້າ ເອົາ​ເລົາ​ເປັນ​ປ່າ ຊ່າງ​ວ່າ​ດົງ​ດ່ານ­ດ້າວ ເປັນ​ບ້ານ​ບ່ອນ​ແປນ. (ຜະ­ຫຍາ)

ນອກ­ຈາກ​ນີ້, ຍັງ​ເຫັນ​ໃຊ້​ເພື່ອ​ບອກ​ວ່າ ກະ​ຢ່າ, ປະ, ວາງ ທີ່ ບອກ​ເຖິງ​ຄວາມ​ຕັ້ງ­ໃຈ, ຄວາມ​ບໍ່​ສົນ­ໃຈ ຫຼື ການ​ປະ­ປ່ອຍ​ໄປ.                  

ຕົວ­ຢ່າງ:

- ຄັນ­ວ່າ​ເຮົາ​ເຮັດ​ແລ້ວ ເຂົາ​ຊິ​ຊັງ​ກະ​ຕາມ­ຊ່າງ ຄັນ​ເຮົາ​ເຮັດ​ແມ່ນ​ແລ້ວ ເຂົາ​ຊິ​ຍ້ອງ​ກະ​ຊ່າງ​ເຂົາ.

- ຕາມ­ໃຈ​ອ້າຍ ຊິ​ເອົາ​ໃຜ​ກະ​ຕາມ­ຊ່າງ ວ່າ​ແຕ່​ອ້າຍ​ຖິ້ມ​ພຸ້ນ ມາ​ພີ້​ຊິ​ບໍ່​ວາງ.

ຂ່າວທີ່ກ່ຽວຂ້ອງ