ບຣາ​ຊີນ ລະ­ດົມ​ທະ­ຫານ ປະ­ມານ 9.000 ຄົນ ຮັບ​ມື​ກັບ​ການ​ນັດ​ຢຸດ​ງານ​ຂອງ​ຕຳ­ຫຼວດ

93 17 ກ.ພ. 2017 ຂ່າວຕ່າງປະເທດ
ບຣາ​ຊີນ ລະ­ດົມ​ທະ­ຫານ ປະ­ມານ 9.000 ຄົນ ຮັບ​ມື​ກັບ​ການ​ນັດ​ຢຸດ​ງານ​ຂອງ​ຕຳ­ຫຼວດ

ກະ­ຊວງ​ປ້ອງ​ກັນ​ປະ­ເທດ​ບຣາຊີນ ແຈ້ງ​ໃຫ້​ຮູ້­ເມື່ອ​ວັນ​ອັງ­ຄານ​ທີ່ຜ່ານ​ມາ​ວ່າ ໄດ້​ລະ­ດົມ​ທະ­ຫານປະ­ມານ 9.000 ຄົນ ໄປຍັງ​ນະຄອນ ​ຣີ​ໂອ ​ເດີ ຈາ​ເນ​ໂຣ ບ່ອນ​ຊຶ່ງຈະ​ຈັດ​ເທ​ສະ­ການ​ແຕ່ງ​ກາຍ Carnival ໃນ​ສອງ​ອາ­ທິດ​ຕໍ່­ໜ້ານີ້ ທັງ​ນີ້​ກໍ່​ເພື່ອ​ຮັບມື​ກັບ​ຄວາມເປັນ​ໄປ​ໄດ້​ທີ່​ຈະ​ເກີດ​ມີ​ການ​ນັດຢຸດ​ງານ​ຂອງ​ຕຳ­ຫຼວດ.

ລັດ­ຖະ­ມົນ­ຕີ​ປ້ອງ​ກັນ​ປະ­ເທດບຣາ​ຊີນ ຣາ​ອູນ ຈຸງ​ມານ ກ່າວ​ຕໍ່ຜູ້​ສື່​ຂ່າວ​ວ່າ ພົນ­ທະ­ຫານ​ເຫຼົ່າ­ນັ້ນ ຈະ​ໄດ້​ເວນ­ຍາມ​ຢູ່​ຕາມຖະ­ໜົນທຸກໆ​ສາຍຢູ່​ໃນ​ນະ­ຄອນ ​ຣີ​ໂອ ເດີ ຈາ​ເນ​ໂຣ ລວມ​ເຖິງ​ສອງ​ນະ­ຄອນທີ່­ຢູ່​ໃກ້​ຄຽງ ໄດ້­ແກ່​ນະ­ຄອນ ​ນີ​ເຕ ຣອຍ ແລະ ຊາວ​ກົງ​ກາ​ໂລ ໄປຮອດ​ໝົດ​ວັນ​ທີ 22 ກຸມ­ພາ ແລະ ອາດ​ຈະ​ໄດ້​ສືບ­ຕໍ່​ຜັນ​ຂະ­ຫຍາຍໄປຈົນ​ກວ່າ​ເທ​ສະ­ການ Carnival ຈະ​ສິ້ນ​ສຸດ​ລົງ.

ລັດ­ຖະ­ບານ​ບຣາ​ຊີນ ລະ­ດົມ​ທະຫານ​ໄປ​ຍັງ​ນະ­ຄອນ ​ຣີ​ໂອ​ເດີ ຈາ ເນ​ໂຣ ຫຼັງ​ຈາກ​ທີ່​ທ່ານ ລຸ​ອິ​ສ ເຟີນານ​ໂດ ເປ​ຊາ​ໂອ ຜູ້ວ່າ­ການ​ລັດນີ້ ສະ­ເໜີ​ໄປ​ຍັງ​ປະ­ທາ­ນາ­ທິ­ບໍ­ດີ ໄມ​ເຄິນ ເທ​ເມີ ໃຫ້​ເພີ່ມ​ທະ­ວີ​ການຮັກ­ສາ​ຄວາມ​ສະ­ຫງົບຢູ່​ໃນ ຣີ​ໂອ ເດີ ຈາເນ​ໂຣ ທີ່​ຕິດ​ກັບ​ລັດ ເອ​ສ​ປີຣີ​ຕູ ຊານ​ໂຕ ບ່ອນ​ຊຶ່ງ​ໃນ​ຫຼາຍວັນ​ທີ່​ຜ່ານ​ມາ ໄດ້​ເກີດ​ເຫດ­ການວຸ້ນ­ວາຍ​ຂຶ້ນ​ຫຼາຍ​ລາຍ ຫຼັງຈາກທີ່​ຕຳ­ຫຼວດພາ­ກັນ​ນັດ​ຢຸດ​ງານ ເປັນ​ເຫດ​ໃຫ້​ມີ​ຜູ້​ເສຍ​ຊີ­ວິດ​ຈາກເຫດ­ການ​ຮຸນ​ແຮງ​ໄປ​ແລ້ວ 150 ຄົນ ສ້າງ​ຄວາມ​ເສຍຫາຍ​ທາງດ້ານ​ເສດ­ຖະ­ກິດ ເປັນ​ມູນ​ຄ່າ 95 ລ້ານໂດ​ລາ​ສະ­ຫະ­ລັດ.

ກ່ອນ​ໜ້າ​ນັ້ນ ລັດ­ຖະ­ບານບຣາ​ຊີນ ໄດ້​ລະ­ດົມ​ທະ­ຫານ 3.000 ຄົນ ໄປ​ຮັບ​ມື​ກັບການ​ຈາລະ​ຈົນ ແລະ ຮັກ­ສາ​ຄວາມ​ສະຫງົບ​ຢູ່​ໃນ​ລັດ ເອ​ສ​ປີ​ຮີ​ຕູ ຊານ​ໂຕ ນັບ​ແຕ່​ຕົ້ນ​ເດືອນກຸມ­ພາ​ນີ້​ເປັນຕົ້ນ​ມາ ຕຳ­ຫຼວດ​ກວ່າ 10.000 ຄົນ ໃນ​ລັດ ເອ​ສ​ປີຮີ​ຕູ ຊານ​ໂຕ ໄດ້​ຈັດ​ຕັ້ງ​ການ​ນັດ​ຢຸດ​ງານ ເພື່ອທວງ​ໃຫ້​ເພີ່ມ​ເງິນ­ເດືອນ ລວມເຖິງ​ການ​ແກ້​ໄຂ​ເງື່ອນ­ໄຂ​ໃນ​ການເຮັດ​ວຽກ ຈົນ​ມາ​ເຖິງ​ປັດ­ຈຸ­ບັນ​ນີ້ ການ​ນັດ​ຢຸດ​ງານຍັງ​ບໍ່​ມີ​ທີ​ທ່າ​ວ່າຈະ​ສິ້ນ​ສຸດ​ລົງ ຍ້ອນ​ວ່າ​ທາງ​ການຍັງ​ບໍ່​ເຫັນ​ດີ​ນຳ​ການ​ເພີ່ມ​ເງິນເດືອນ​ຂຶ້ນ 43%.

ຂ່າວທີ່ກ່ຽວຂ້ອງ