ບັນ­ດາ​ບໍ­ລິ­ສັດ​ຂອງ​ອິດ​ສະ​ຣາ​ແອນ ໄດ້​ກຳ­ໄລ​ຈາກ​ໂຄງ­ການ ເຮືອ­ບິນ F-35

344 17 ກ.ພ. 2017 ຂ່າວຕ່າງປະເທດ
ບັນ­ດາ​ບໍ­ລິ­ສັດ​ຂອງ​ອິດ​ສະ​ຣາ​ແອນ ໄດ້​ກຳ­ໄລ​ຈາກ​ໂຄງ­ການ ເຮືອ­ບິນ F-35

ກະ­ຊວງ​ປ້ອງ​ກັນ​ປະ­ເທດ​ອິດສະ​ຣາ​ແອນ ແຈ້ງ​ໃຫ້​ຮູ້­ເມື່ອ​ວັນ​ທີ 12 ກຸມ­ພາ​ຜ່ານ​ມາ ວ່າ​ນັບ​ແຕ່​ປີ 2010 ເປັນ­ຕົ້ນ​ມາ ບັນ­ດາ​ບໍ­ລິ­ສັດດ້ານ​ປ້ອງ​ກັນ​ຊາດ​ຂອງ​ອິດ​ສະ​ຣາແອນ ຫາ​ເງິນ​ມາ​ໄດ້​ເກືອບ 1,07 ຕື້ໂດ​ລາ​ສະ­ຫະ­ລັດ ຈາກ​ບັນ­ດາໂຄງ­ການທີ່​ພົວ­ພັນ​ເຖິງ​ໂຄງ­ການ ປະ​ລິດ​ເຮືອ­ບິນ​ສູ້​ຮົບ F-35 ຂອງ ສ ອາ​ເມ​ຣິ​ກາ.

ກະ­ຊວງ​ປ້ອງ​ກັນ​ປະ­ເທດ​ອິດ​ສະຣາ​ແອນ ກໍ່​ໃຫ້​ຮູ້​ວ່າ ໃນ​ປີ 2016 ບັນ­ດາ​ບໍ­ລິ­ສັດ​ດ້ານ​ປ້ອງ​ກັນ​ຊາດຂອງ​ປະ­ເທດ​ນີ້ ສັນ​ຫາສັນ­ຍາໃໝ່​ມາ​ໄດ້​ຫຼາຍ​ສະ­ບັບ ເປັນ​ມູນຄ່າ 258 ລ້ານ​ໂດ​ລາ​ສະ­ຫະ­ລັດ ຈາກ​ກຸ່ມ​ບໍ­ລິ­ສັດ​ຜະ­ລິດ​ເຮືອ­ບິນ Lockheed Martin ຊຶ່ງ​ເປັນ​ຜູ້ຜະ­ລິດ​ເຮືອ­ບິນ​ສູ້​ຮົບ F-35.

ໂຄງ­ການ​ຮ່ວມ​ມື​ໜຶ່ງທີ່​ມີ​ມູນຄ່າ​ປະ­ມານ 206 ລ້ານ​ໂດ​ລາ​ສະຫະ​ລັດ ກໍ່​ຫວັງ​ວ່າ​ຈະ​ໄດ້​ລົງ​ນາມລະ­ຫວ່າງ​ບໍ­ລິ­ສັດ Elbit Systems ຂອງ​ອິດ​ສະ​ຣາ​ແອນ ກັບບໍ­ລິ­ສັດ American Rockwell Collins ຂອງ ສ ອາເມ​ຣິ​ກາ ຊຶ່ງ​ຜະ­ລິດ​ໝວກ​ທີ່​ທັນສະ­ໄໝ​ທີ່​ສຸດ​ຂອງ​ນັກ​ບິນ ໂດຍ​ສະເພາະສຳ­ລັບ​ເຮືອ­ບິນ​ສູ້​ຮົບ  F-35  ນອກ­ຈາກ​ນັ້ນ­ແລ້ວ ບໍ­ລິ­ສັດ Elbit System ຍັງຈະ​ໄດ້​ຮັບ​ສັນຍາ​ສະ­ບັບ​ໜຶ່ງມູນ​ຄ່າ 16,6 ລ້ານໂດ​ລາ​ສະ­ຫະ­ລັດ ຊຶ່ງ​ພົວພັນ​ເຖິງ​ການ​ຜະ­ລິດ​ຕົວ​ເຮືອ­ບິນສູ້​ຮົບ F-35.

ສັນ­ຍາ​ສະ­ບັບ​ໜຶ່ງ​ທີ່​ມີ​ມູນ​ຄ່າເກືອບ 26 ລ້ານ​ໂດ​ລາ​ສະ­ຫະ­ລັດ ຈະ​ໄດ້​ລົງ​ນາມ​ໂດຍ​ກຸ່ມ​ບໍ­ລິ­ສັດການ­ບິນ​ອາ​ວະ​ກາດ​ອິດສະ​ຣາແອນ (IAI) ຊຶ່ງ​ພົວ­ພັນ​ເຖິງ​ການຜະ­ລິດ​ສ່ວນ​ປີກ​ຂອງ​ເຮືອ­ບິນ​ສູ້​ຮົບ F-35 ໃນ​ຂະ­ນະ​ດຽວ​ກັນ ອີກໂຄງ­ການ​ໜຶ່ງ​ທີ່ມີ​ມູນ​ຄ່າ​ປະ­ມານ 9,4 ລ້ານ​ໂດ​ລາ​ສະ­ຫະ­ລັດ ແມ່ນ​ຖືກ​ແບ່ງ​ໃຫ້​ອີກ​ບາງ​ບໍ­ລິ­ສັດດ້ານ​ປ້ອງ​ກັນ​ຊາດ ຊຶ່ງ​ພົວ­ພັນເຖິງ​ການຜະ­ລິດ​ຊຸດ​ສົນ­ທະ­ນາ ການ​ຕິດ­ຕໍ່ອຸ­ປະ­ກອນ​ໃນ​ຫ້ອງ​ຂັບ ແລະ ລາຍ­ການ​ອື່ນໆ​ຂອງ​ເຮືອບິນ​ສູ້​ຮົບ F-35.

ການ​ຜະ­ລິດ​ເຮືອ­ບິນ​ສູ້​ຮົບ F-35 ຖື​ວ່າ​ເປັນ​ໂຄງ­ການ​ຜະ­ລິດອາ­ວຸດ​ທີ່​ມີ­ຄ່າ​ແພງ​ທີ່​ສຸດ​ໃນ​ໂລກ ຍອດ​ຈຳ­ນວນ​ເງິນເພື່ອ​ຜະ­ລິດເຮືອ­ບິນ​ດັ່ງ­ກ່າວ ຈຳ­ນວນ 2.443 ລຳ ມີ​ເຖິງ 379 ຕື້​ໂດລາ​ສະ­ຫະ­ລັດ ໃນ​ຈຳ­ນວນ​ນັ້ນ ອິດ​ສະ​ຣາ​ແອນ ​ໄດ້​ສັ່ງ​ຊື້ 50 ລຳ ແລະ ຈຳ­ນວນ​ທີ່​ຍັງ​ເຫຼືອ​ເກືອບທັງ​ໝົດ ແມ່ນ​ຈະ​ໄດ້​ປະ­ກອບ​ໃຫ້ແກ່​ກອງ­ທັບ​ອາ­ກາດ ສ ອາ​ເມ​ຣິກາ ເມື່ອ​ເດືອນ​ທັນ­ວາ ​ປີ 2016 ອິດ​ສະ​ຣາ​ແອນ ​ໄດ້​ຮັບ​ມອບ​ເຮືອບິນ F-35 ງວດ​ທຳ​ອິດ​ໄປ​ແລ້ວ 2 ລຳ.

ຂ່າວ­ສານ AFP ລາຍ​ງານ​ວ່າ ທຳ​ນຽບ​ຫ້າ​ແຈ (ກະ­ຊວງ​ປ້ອງກັນ​ປະ­ເທດ ສ ອາ​ເມ​ຣິ​ກາ) ແຈ້ງໃຫ້​ຮູ້­ເມື່ອ​ວັນ​ທີ 27 ມັງ­ກອນ​ທີ່ຜ່ານ​ມາ​ວ່າ ລັດ­ຖະ­ມົນ­ຕີ​ປ້ອງ​ກັນປະ­ເທດ ສ ອາ​ເມ​ຣິ​ກາ ເຈມ ມາດ​ຕິ​ສ ໄດ້​ອອກ​ຄຳ​ສັ່ງ​ໃຫ້​ພິ​ຈາລະ​ນາ​ໂຄງ­ການເຮືອ­ບິນ​ສູ້​ຮົບ F-35 ທີ່​ບິນ​ໄດ້​ໄວ​ກວ່າ​ສຽງ​ນັ້ນຄືນ­ໃໝ່ (ຜະ­ລິດ​ໂດຍ Lockheed Martin) ຊຶ່ງ​ການ­ເຄື່ອນ­ໄຫວ​ນີ້ ມີຂຶ້ນຫຼັງ​ຈາກ​ທີ່​ປະ­ທາ­ນາ­ທິ­ບໍ­ດີ ສ ອາ​ເມ​ຣິ​ກາ ໂດ​ນາ​ລ ທຣັມ ຕຳ​ນິຢ່າງ​ແຮງ​ຕໍ່​ໂຄງ­ການ​ນີ້ ທີ່​ມີ​ມູນຄ່າ 400 ຕື້​ໂດ​ລາ​ສະ­ຫະ­ລັດ ຄຽງ ຄູ່​ກັນ​ນັ້ນ ທ່ານ ມາ​ຕິ​ສ ກໍ່​ໄດ້​ມີ​ຄຳສັ່ງ​ແນະ­ນຳ​ທີ່​ຄ້າຍ­ຄື​ກັນ​ນັ້ນ​ອອກມາ ໃນ​ການ​ພິ­ຈາ­ລະ­ນາ​ຄືນ­ໃໝ່ກັບ​ຄ່າ​ໃຊ້​ຈ່າຍ 4 ຕື້​ໂດ​ລາ​ສະຫະ​ລັດ ເພື່ອ​ພັດ­ທະ­ນາ​ເຮືອ­ບິນໃໝ່​ ຮັບ​ໃຊ້​ປະ­ທາ­ນາ­ທິ­ບໍ­ດີ​ ເປັນການ​ສະ­ເພາະ.

ຕາມ​ການ​ຄິດ­ໄລ່​ຂອງ​ຊ່ຽວຊານ​ແລ້ວ ຫຼັງ​ຈາກ​ທີ່​ເຂົ້າ​ສູ່​ການເຄື່ອນ​ໄຫວ ຍອດ​ຄ່າ​ໃຊ້​ຈ່າຍ​ໃຫ້ແກ່​ການ​ບຳ­ລຸງ​ຮັກ­ສາ ແລະ ການ​ໃຊ້​ຈ່າຍ​ອື່ນໆທີ່​ພົວ­ພັນ​ເຖິງຝູງ​ບິນ F-35 ທີ່​ມີ​ກຳ­ນົດ​ໃຊ້ຮອດ​ປີ 2070 ນັ້ນ ​ຈະ​ມີ​ເຖິງ 1.500 ຕື້ໂດ​ລາ​ສະ­ຫະ­ລັດ.

ຂ່າວທີ່ກ່ຽວຂ້ອງ