ຈັດ​ແຂ່ງ­ຂັນ​ກີ­ລາ​ດຶງ­ເຊືອກ ຊີງ​ຂັນ​ປະ­ທານ​ສະ­ຫະ­ພັນ ປະ­ຈຳ​ປີ 2017

1.323 01 ມີ.ນ. 2017 ວົງຈອນກີລາ
ຈັດ​ແຂ່ງ­ຂັນ​ກີ­ລາ​ດຶງ­ເຊືອກ ຊີງ​ຂັນ​ປະ­ທານ​ສະ­ຫະ­ພັນ ປະ­ຈຳ​ປີ 2017

    ການ​ແຂ່ງ­ຂັນ​ກີ­ລາ​ດຶງ­ເຊືອກ ປະ­ຈຳ​ປີ 2017 ຊີງ​ຂັນ​ທ່ານ​ປະ­ທານ ສະ­ຫະ­ພັນ​ກີ­ລາ​ດຶງ­ເຊືອກ​ແຫ່ງ​ຊາດ​ລາວ ຈັດ​ຂຶ້ນ​ວັນ​ທີ 24 ກຸມ­ພາ 2017 ທີ່​ໂຮງ­ຮຽນ ມສ ວຽງ​ຈັນ ນະ­ຄອນ­ຫຼວງ​ວຽງ​ຈັນ​ໂດຍ​ມີ​ທ່ານ ອຸ­ໄທ ບັນ​ນາ​ວົງ ຮອງ​ປະ­ທານ​ສະ­ຫະ­ພັນ​ກີ­ລາ​ດຶງ­ເຊືອກ​ແຫ່ງ​ຊາດ​ລາວ ມີ​ບັນ­ດາ​ຄະ­ນະ​ນຳ ຄູ​ເຝິກ ແລະ ນັກ­ກີ­ລາ ຈາກ​ສະ­ໂມ­ສອນ​ຕ່າງໆ ຕະ­ຫຼອດ​ຮອດ​ນ້ອງ​ນັກ­ຮຽນ​ຈາກ ມສ ວຽງ​ຈັນ ເຂົ້າ​ຮ່ວມ.

    ທ່ານ ອຸ­ໄທ ບັນ​ນາ​ວົງ ກ່າວ​ວ່າ: ກີ­ລາ​ແມ່ນ​ວຽກ​ງານ​ໜຶ່ງ​ທີ່​ສຳ­ຄັນ ໂດຍ​ສະ­ເພາະ​ເຮັດ​ໃຫ້​ຮ່າງ ກາຍ​ມີ​ຄວາມ​ແຂງ­ແຮງ ຈິດ­ໃຈ​ສົດ­ໃສ​ແລ້ວ​ສາ­ມາດ​ປະ­ກອບ­ສ່ວນ​ເຂົ້າ​ໃນ​ການ​ປົກ​ປັກ​ຮັກ­ສາ ແລະ ສ້າງ ສາ​ພັດ­ທະ­ນາ​ປະ­ເທດ​ຊາດ ໃຫ້​ຮັ່ງ­ມີ​ເຂັ້ມ­ແຂງ ການ​ຫຼິ້ນ​ກີ­ລາ​ຍັງ​ສ້າງ​ຄວາມ​ສາ­ມັກ­ຄີ ສ້າງ​ສາຍ­ສຳ­ພັນ​ມິດ­ຕະ­ພາບ ສັນ­ຕິ­ພາບ ທັງ​ພາຍ​ໃນ ແລະ ຕ່າງ­ປະ­ເທດ​ໄດ້​ເປັນ​ຢ່າງ​ດີ ເຊິ່ງ​ກີ­ລາ​ດຶງ­ເຊືອກ​ກໍ່​ເປັນ 1 ໃນ​ຫຼາຍ​ປະ­ເພດ​ກີ­ລາ​ທີ່​ຄົນ​ມັກ​ຫຼິ້ນ ປັດ­ຈຸ­ບັນ​ກີ­ລາ​ດັ່ງ­ກ່າວ ໄດ້​ເຄື່ອນ​ໄຫວ​ຢ່າງ​ກວ້າງ­ຂວາງ ພາຍ​ໃຕ້​ການ​ບໍ­ລິ­ຫານ​ຄຸ້ມ​ຄອງ ຂອງ​ສະ­ຫະ­ພັນ​ກີ­ລາ​ດຶງ­ເຊືອກ​ແຫ່ງ​ຊາດ​ລາວ.

    ການ​ແຂ່ງ­ຂັນ​ກີ­ລາ​ຄັ້ງ​ນີ້ ກໍ່​ເພື່ອ​ເປັນ​ການ​ສ້າງ​ຂະ​ບວນ​ການ​ເຜີຍ­ແຜ່ ໃຫ້​ເຍົາ­ວະ​ຊົນ ຊາວ​ໜຸ່ມ ນັກ ຮຽນ ນັກ​ສຶກ​ສາ ໄດ້​ຮັບ​ຮູ້ ເຂົ້າ­ໃຈ ແລະ ເຂົ້າ​ຮ່ວມ​ການ­ເຄື່ອນ­ໄຫວ​ກິດ­ຈະ­ກຳ​ດຶງ­ເຊືອກ​ຢ່າງ​ເປັນ​ຂະ​ບວນ​ຫຼາຍ​ຂຶ້ນ ຈາກ​ນັ້ນ ກໍ່​ຈະ​ສ້າງ​ໂອ­ກາດ​ໃນ​ການ​ຄັດ​ເລືອກ​ເອົາ​ນັກ­ກີ­ລາ ທີ່​ມີ​ຄວາມ​ສາ­ມາດ​ດີ­ເດັ່ນ ເພື່ອ​ເປັນ​ຕົວ​ແທນ​ທີມ​ຊາດ ເຂົ້າ​ຮ່ວມ​ບັ້ນ​ແຂ່ງ­ຂັນ​ຕ່າງໆ ຢູ່​ທັງ​ພາຍ​ໃນ ແລະ ຕ່າງ­ປະ­ເທດ.

    ສຳ­ລັບ​ການ​ແຂ່ງ­ຂັນ​ຄັ້ງ​ນີ້ ມີ​ທີມ​ເຂົ້າ​ຮ່ວມ​ທັງ​ໝົດ 31 ທີມ ຍິງ 15 ທີມ ມີ​ນັກ­ກີ­ລາ​ທັງ​ໝົດ 320 ຄົນ ຍິງ 150 ຄົນ ທີ່​ມາ​ຈາກ​ສະ­ໂມ­ສອນ​ພາຍ​ໃນ ນະ­ຄອນ­ຫຼວງ​ວຽງ​ຈັນ ແຂວງ​ວຽງ​ຈັນ ແລະ ພິ­ເສດ ມີ 5 ສະ­ໂມ­ສອນ ຈາກ​ປະ­ເທດ​ໄທ ເຂົ້າ​ຮ່ວມ​ແຂ່ງ­ຂັນ​ມິດ­ຕະ­ພາບ ເຊິ່ງ​ການ​ແຂ່ງ­ຂັນ​ແມ່ນ​ດຳ­ເນີນ​ໃນ​ລະ­ຫວ່າງ​ວັນ​ທີ 24-26 ກຸມ­ພາ 2017.

ຂ່າວທີ່ກ່ຽວຂ້ອງ