ຫຼື​ວ່າ:... ຜີ​ບ້ານ​ພ້ອມ​ຜີ​ປ່າ... - ໂດຍ : ແນວ​ລາວ

1.996 01 ມີ.ນ. 2017 ນານາສາລະ

ເຂົ້າ​ສູ່​ລະ­ດູ­ແລ້ງ​ມາ​ນີ້ ບຸນ​ສິນ​ກິນ​ທານ​ຫຼາຍຂຶ້ນ ລວມ​ທັງ​ການ​ຊຸມ​ແຊວ​ຕ່າງໆ ສະ­ນັ້ນ ເພື່ອນຜູ້​ອ່ານ​ຈຶ່ງ​ສ່ອງ​ແສງ​ມາເລື່ອງ “​ສຽງ”​ ວ່າ​ເໝາະ​ສົມບໍ່? ໂດຍ​ສະ­ເພາະສຽງ​ກາງ­ແຈ້ງ​ທີ່​ເປີດ​ຍາມ​ຊຸມແຊວ.

- ຜູ້​ຂຽນ​ຊອກ​ຂໍ້​ມູນເລື່ອງ​ລະ­ບຽບ​ກົດ­ໝາຍກ່ຽວ​ກັບ​ສຽງ​ບໍ່​ຄ່ອຍ​ພົບ ຍ້ອນ​ວ່າຕົນ​ເອງ​ມີ​ຂໍ້​ມູນບໍ່​ພຽງ­ພໍ ສະ­ນັ້ນ ຈຶ່ງ​ອາ­ໄສເອ­ກະ­ສານ​ຄຳ​ສັ່ງ ແລະ ຄຳ​ແນະ­ນຳ​ຂອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ສະ­ບັບ​ເລກ​ທີ 001/ຈ​ນວ 002/ຈ​ນວ ແລະ 003/ຈ​ນວ ຈັດ​ພິມ​ໂດຍ​ອົງ­ການ​ປົກ­ຄອງ​ນະ­ຄອນ­ຫຼວງວຽງ​ຈັນ ໃນ​ໜ້າ​ທີ 13 ຂອງ​ເອ­ກະ­ສານ​ນັ້ນ ຂໍ້​ທີ 4 ໄດ້​ເວົ້າ​ເຖິງ​ການ​ຄຸ້ມຄອງ​ຫ້າງ​ຮ້ານ​ທຸ­ລະ​ກິດ​ບັນເທີງ ຮ້ານ​ອາ­ຫານ ແລະ ການ​ຄົບ­ງັນ​ບຸນ​ປະ­ເພ­ນີ ພິ­ທີ​ສ້າງ​ຄອບ­ຄົວ ຫຼື ພິ­ທີ​ອື່ນໆ ຕ້ອງ​ຮັບ­ປະ­ກັນການ​ໃຊ້​ສຽງ​ບໍ່​ໃຫ້​ດັງ​ເກີນ 100 db (ດີ​ຊີ​ເບວ) ແລະ ໃຫ້​ປິດ​ການ​ເສບ​ງັນ​ບໍ່​ໃຫ້​ເກີນ 23 ໂມງ 30 ນາ­ທີ... ໃນ​ມາດ​ຕະການ­ຈັດ­ຕັ້ງ​ປະ­ຕິ­ບັດ​ນັ້ນ​ມອບ​ໃຫ້​ບັນດາ​ທ່ານ​ເຈົ້າ­ເມືອງ ນາຍ­ບ້ານ ໜ່ວຍ​ຕຳ­ຫຼວດ​ສະເພາະ​ກິດ​ຂອງ​ບ້ານ ເປັນ​ເຈົ້າການ​ກວດ­ກາ​ຊຸກ­ຍູ້ ໃນ​ການ​ປະ­ຕິ­ບັດ... ນັ້ນ​ຄື​ຂໍ້​ມູນ​ທີ່​ຜູ້​ຂຽນ​ສັງ​ລວມໄດ້ ເຊິ່ງ​ເອ­ກະ­ສານ​ດັ່ງ­ກ່າວ​ນັ້ນ ອຳ­ນາດ​ການປົກ­ຄອງ​ບ້ານ​ຂາຍ​ໃຫ້​ຄອບ­ຄົວ​ໜຶ່ງ​ໃນ​ລາ­ຄາ 15.000 ກີບ.

ເມື່ອ​ອ່ານ​ເບິ່ງ​ເອ­ກະ­ສານ​ແລ້ວ​ເຫັນ​ວ່າມີ​ເນື້ອໃນ​ຄົບ​ຖ້ວນ ແລະ ຮັດ­ກຸມ​ດີ ທັງ​ມີ​ຄຳ​ແນະ­ນຳຈາກ​ຫ້ອງ​ວ່າ­ການ​ປົກ­ຄອງນະ­ຄອນ­ຫຼວງ​ນຳອີກ... ເອ­ກະ­ສານ​ນີ້​ມີ​ອາ­ຍຸ 5 ປີແລ້ວ (ພິມ​ປີ 2012).

- ຫາກ​ມາ​ເບິ່ງ​ຄວາມ​ເປັນ​ຈິງ​ແລ້ວ​ເຫັນ​ວ່າ ການ­ຈັດ­ຕັ້ງ​ປະ­ຕິ­ບັດ​ຄຳ​ສັ່ງ ຫຼື ຄຳ​ແນະ­ນຳ​ເຫຼົ່າ­ນັ້ນ ບໍ່​ມີ​ປະ​ສິດ­ທິ​ຜົນ​ສູງ​ພໍ​ເທົ່າ­ໃດ? ມັນ​ສະ­ແດງ​ອອກ ການ​ຄົບ­ງັນ​ກາຍ​ເວ­ລາ ບາງ​ບ່ອນ​ຊອດ​ແຈ້ງ ສຽງດັງ​ຈົນ​ແກ້ວ­ຫູ​ຊິ​ແຕກ ບໍ່​ທໍ່​ນັ້ນ ປີ​ໃໝ່​ຊາວ​ຈີນ+ ຫວຽດ­ນາມ​ຕ່າງ​ດ້າວ​ຜ່ານ​ມາ​ນີ້ ສຽງ​ຈູດ​ໝາກກະ­ໂພກ​ດັງ​ຂຶ້ນ​ໃນ​ຫຼາຍ​ຈຸດ ແລະ ແກ່­ຍາວ​ຮອດ 2-3 ໂມງ​ຂອງ​ມື້​ໃໝ່ ມີ​ຜູ້ໃຫ້​ຂໍ້​ສັງ­ເກດ​ວ່າ ​ຢູ່​ປະເທດ​ເຈົ້າ­ພາບ​ແທ້ໆ​ກໍ່​ບໍ່​ຊ່ຳ​ຢູ່​ນະ­ຄອນ­ຫຼວງ​ວຽງ​ຈັນ.

- ແລ້ວ​ຫຼາຍ​ຄົນ​ກໍ່​ຕັ້ງ​ບັນ­ຫາ​ວ່າ: ໃຜ​ຈະ​ກວດກາ ແລະ ເຂັ້ມ​ງວດ​ກ່ຽວ​ກັບ​ບັນ­ຫາ​ນີ້ ຫຼື​ວ່າ: “ຜີບ້ານ​ພ້ອມ​ຜີ​ປ່າ...” ຖ້າ​ຫາກສຶກ​ສາ​ເບິ່ງ​ເອ­ກະ­ສານແລ້ວ​ຈະ​ຮູ້​ໂລດ​ວ່າ ອຳ­ນາດ​ການ​ປົກ­ຄອງ​ບ້ານ​ນັ້ນ-ເມືອງ​ນັ້ນ ເຂັ້ມ​ງວດ​ເລື່ອງ​ນີ້​ສ່ຳ​ໃດ ສະ­ນັ້ນ ຈຶ່ງບໍ່ຈຳ­ເປັນ​ເວົ້າ​ຄືນ​ອີກ.

- ສິ່ງ​ທີ່​ຢາກ​ໄດ້​ແມ່ນ​ຢາກ​ໃຫ້ເຊື່ອມ​ຊຶມ​ຄືນເອ­ກະ­ສານ ແລະ ຄຳ​ສັ່ງຫຼ້າ​ສຸດ​ກ່ຽວ​ກັບ​ “ສຽງ” ຈາກ​ການ​ຄົບ­ງັນ​ຕ່າງໆ ແລ້ວຈັດ​ຕັ້ງ​ປະ­ຕິ­ບັດ​ຢ່າງເຂັ້ມ​ງວດ.

ມະ­ຕິ​ຄຳ​ສັ່ງ​ອອກ​ມາ​ຫຼາຍ ແຕ່​ການ­ຈັດ­ຕັ້ງ​ປະ­ຕິບັດ​ບໍ່​ເຂັ້ມ​ງວດ ບໍ່​ກວດ­ກາ ມັນ​ເຂົ້າ​ທຳ­ນອງ​ ບໍ່​ມີການ​ນຳ­ພາ ເພາະ​ພວກເຮົາ​ເຄີຍ​ໄດ້​ຍິນ​ນຳ​ກັນວ່າ: ບໍ່​ມີ​ການ​ກວດ­ກາ​ ກໍ່​ໝາຍ​ຄວາມ​ວ່າ ​ບໍ່​ມີ​ການນຳ­ພາ...

ຂໍ​ສະ­ເໜີ​ແລກ­ປ່ຽນ​ນໍ?

ຂ່າວທີ່ກ່ຽວຂ້ອງ