ແຕ່ງຕັ້ງ​ຄະນະ​ບໍລິຫານ​ງານ ​ສບລ ຊຸດ​ໃໝ່

1.544 02 ມີ.ນ. 2017 ວົງຈອນກີລາ
ແຕ່ງຕັ້ງ​ຄະນະ​ບໍລິຫານ​ງານ ​ສບລ ຊຸດ​ໃໝ່

ພິທີ​ປະກາດ​ແຕ່ງຕັ້ງ​ຄະນະ​ບໍ​ລິຫານ​ງານ​ສະຫະພັນ​ກີລາ​ບານສົ່ງ​ແຫ່ງ​ຊາດ​ລາວ (​ສບລ) ຊຸດໃໝ່​ ຈັດ​ຂຶ້ນ​ວັນ​ທີ 24 ກຸມພາ 2017 ທີ່​ສຳນັກງານ​ຫ້ອງການຄະນະ​ກຳມະການ​ໂອ​ແລມ​ປິກແຫ່ງ​ຊາດ​ລາວ ມີ​ທ່ານ ບົວ​ລານ ສິລິ​ປັນຍາ ຮອງລັດຖະມົນຕີ​ກະຊວງ​ສຶກ​ສາ​ທິ​ການ ແລະ ກີລາ (​ສສກ) ທ່ານ ແສງ​ພອນ ພົນ​ອາມາດ ຫົວໜ້າ​ກົມ​ກີລາ​ລະດັບສູງ​ ພ້ອມດ້ວຍ​ບັນດາ​ຄະນະ​ບໍ​ລິຫານ​ງານ ​ສບລ ຊຸດ​ເກົ່າ ແລະ ຊຸດ​ໃໝ່​ ເຂົ້າ​ຮ່ວມ.

ໃນ​ພິທີ ​ໄດ້​ມີ​ການ​ສະຫຼຸບ​ກ່ຽວກັບ​ການ​ນຳພາ​ຈັດ​ຕັ້ງ​ເຄື່ອນ​ໄຫວຂອງ ​ສບລ ໃນ​ຜ່ານ​ມາ ແລະ ແຜນການເຄື່ອນໄຫວປະຈຳ​ປີ 2017 ເຊິ່ງ​ເຫັນ​ວ່າ ​ນັບ​ແຕ່​ປີ 2012-2016 ໄດ້​ມີ​ການ​ເຄື່ອນໄຫວ​ທັງ​ພາຍ​ໃນ ແລະ ຕ່າງ​ປະເທດ​ຢ່າງ​ຕໍ່​ເນື່ອງ ເພື່ອ​ຍົກ​ສູງ​ບົດບາດ​ວົງ​ການ​ກີລາ​ບານສົ່ງ​ລາວ ໃຫ້​ນັບ​ມື້​ເຕີບ​ໃຫຍ່​ຂະຫຍາຍຕົວຂຶ້ນ​ເລື້ອຍໆ ສ່ວນ​ແຜນການເຄື່ອນ​ໄຫວປີ 2017 ຈະ​ໄດ້​ສົ່ງ​ກຳມະ​ການ​ຕັດສິນ​ເຂົ້າ​ຮ່ວມ​ເຝິກ​ອົບຮົມ​ຍົກ​ລະດັບ​ຄວາມ​ຮູ້ຄວາມສາມາດ​ລະດັບ​ສາກົນ ແລະ ສົ່ງທີມ​ນັກກີລາ​ເຂົ້າ​ຮ່ວມ​ການ​ແຂ່ງຂັນ​ນາໆຊາດ​ຫຼາຍ​ລາຍການ.

ສຳລັບ​ການ​ແຕ່ງຕັ້ງ​ຄະນະ​ບໍລິ​ຫານ​ງານ ​ສບລ ຊຸດ​ໃໝ່ ປະກອບ​ມີ​ທ່ານ ຄຳ​ສອນ ແພງ​ລັດຕະ​ນະ​ວົງ ແລະ ທ່ານ ແພງສະຫງວນ ຈູນ​ລະ​ມະນີ ປະທານ ​ສບລ ຄົນ​ເກົ່າ ເປັນ​ປະທານ​ທີ່​ປືກສາ ສ່ວນ​ທ່ານ ຈັນ​ສະໝອນ ຜອງ​ຈັນທາ ຮອງປະທານ ​ຂຶ້ນ​ເປັນປະທານ ​ສບລ ຄົນ​ໃໝ່ ແລະ ທ່ານ ສຸ​ລິ​ເນດ ໄຊ​ຍະ​ເດດ​ທ່ານ ສຸລິ​ຍາ ແກ້ວ​ພິລາ​ວົງ ແລະ ທ່ານ ປີ​ໄຊ ສຸວັນ​ໄຊ ເປັນ​ຮອງ​ປະທານ ນອກຈາກ​ນັ້ນ​ຍັງ​ມີ​ເລຂາທິການ ແລະ ຮອງ​ເລຂາທິການ ຮອງນາຍ​ຄັງ ຕະຫຼອດ​ຮອດ​ຄະນະກຳມະ​ການ​ອີກ 8 ທ່ານ.

ຂ່າວທີ່ກ່ຽວຂ້ອງ