ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ອົດ​ສະ​ຕຣາ​ລີ ຫວຽດ­ນາມ

77 14 ມີ.ນ. 2017 ຫົວຂໍ້ຂ່າວອື່ນໆ

ຄໍ​ລຳ​ປະ­ຈຳ​ວັນ​ນີ້ ມີ​ເລື່ອງ​ກ່ຽວ​ກັບ​ບັນ­ຫາ​ສິດຂອງ​ເດັກ​ຂອງ ອົດ​ສະ​ຕຣາ​ລີ ໃນ​ການ​ເຂົ້າ​ເຖິງ​ການ​ສັກຢາ ແລະ ບັນ­ຫາ​ໃຫຍ່ເລື່ອງ​ຕົ້ນ­ໄມ້​ຖືກ​ວາງ­ຢາ​ພິດ ຢູ່​ ຫວຽດ­ນາມ.

ທີ່ ອົດ​ສະ​ຕຣາ​ລີ: ຂ່າວ​ຕ່າງ­ປະ­ເທດ​ໃນ​ຕົ້ນ​ອາ­ທິດທີ​ສອງ​ຂອງ​ເດືອນ​ມີ­ນາ​ນີ້​ ໃຫ້​ຊາບ​ກ່ຽວ​ກັບ​ບັນ­ຫາເດັກ​ອົດ​ສະ​ຕຣາ​ລີ ທີ່ບໍ່​ໄດ້​ສັກ​ຢາ​ກັນ​ພະ­ຍາດ​ທົ່ວ​ໄປ ຕາມ​ກຳ­ນົດຖືກ​ປະ­ຕິ­ເສດ​ການ​ປິ່ນ­ປົວ​ຈາກ​ທ່ານ­ໝໍ ຜ່ານ​ການ​ລົງ​ສຳ­ພາດ​ຜູ້​ເປັນ​ພໍ່​ແມ່ ຈຳ­ນວນ 2.000 ຄົນ ໂດຍ​ຄະ­ນະ​ເກັບ​ກຳ​ຫາງ​ສຽງ​ກ່ຽວ​ກັບ​ສຸ​ຂະພາບ​ຂອງ​ເດັກ (The Australian Child Health Poll) ໃຫ້​ຊາບ​ວ່າ 1 ໃນ​ຈຳ­ນວນ​ເດັກ 6 ຄົນ​ໃດ​ທີ່​ບໍ່ໄດ້​ຜ່ານ​ການ​ສັກ​ຢາ​ກັນ​ພະ­ຍາດ​ນັ້ນ ​ຖືກ​ປະ­ຕິ­ເສດສິດ​ເຂົ້າ​ເຖິງ​ການ​ປິ່ນ­ປົວ​ຈາກ​ທ່ານ­ໝໍ ດ້ວຍ​ຂໍ້​ອ້າງວ່າ ຢ້ານ​ເດັກ​ທີ່​ບໍ່​ໄດ້​ຜ່ານ​ການ​ສັກ​ຢາ​ຈະ​ແຜ່​ພະຍາດ​ທີ່​ສາ­ມາດ​ປິ່ນ­ປົວ​ໄດ້​ໃສ່​ຄົນ​ອື່ນ ການ​ປະ­ຕິ­ເສດການ​ປິ່ນ­ປົວ​ສຳ­ລັບ​ເດັກ​ທີ່​ບໍ່​ໄດ້​ຜ່ານ​ການ​ສັກ​ຢາ​ກັນພະ­ຍາດ​ມາ​ກ່ອນ​ນັ້ນ ໄດ້​ສ້າງ​ຄວາມ​ກັງ­ວົນ​ໃຈ​ຢ່າງໜັກ­ໜ່ວງໃນ​ສັງ­ຄົມ​ອົດ​ສະ​ຕຣາ​ລີ ເຖິງ​ຂັ້ນ​ທ່ານ ໄມເກິນ ແກນ​ນອນ ປະ­ທານ​ສະ­ມາ­ຄົມ​ການ​ແພດ​ອົດສະ​ຕຣາ​ລີ ໄດ້​ອອກ​ມາ​ຖະ­ແຫຼງ​ຕໍ່​ອົງ­ການ​ຂ່າວ Fairfax Media ວ່າ ເປັນ​ຫ່ວງ​ເລື່ອງ​ເດັກ​ຖືກ​ປະ­ຕິເສດ​ການ​ປິ່ນ­ປົວ ແຕ່​ກໍ່​ຮັບ​ວ່າ­ຄວາມ​ຮັບ­ຜິດ­ຊອບຕົ້ນ­ຕໍ​ນັ້ນຕົກ​ເປັນ​ພູດ​ຂອງ​ຜູ້​ເປັນ​ພໍ່​ແມ່​ ທີ່​ບໍ່​ພາ​ເດັກໄປ​ສັກ​ຢາ​ຕາມ​ນະ­ໂຍ­ບາຍ ທ່ານ​ປະ­ທານ​ສະ­ມາ­ຄົມການ​ແພດ​ບອກວ່າ “ຂ້າ­ພະ­ເຈົ້າ​ຮູ້­ສຶກ​ເສຍ​ໃຈ​ຢ່າງສຸດ​ຊຶ້ງ​ຕໍ່​ກໍ­ລະ­ນີ​ເດັກ​ຖືກ​ປະ­ຕິ­ເສດ​ສິດ​ເຂົ້າ​ເຖິງ​ການປິ່ນ­ປົວ ບໍ່​ວ່າ​ຈະ​ດ້ວຍ​ເຫດ­ຜົນ ຫຼື ເງື່ອນ­ໄຂ​ໃດໆ​ກໍ່​ຕາມ ການ​ປະ­ຕິ­ເສດ​ການ​ປິ່ນ­ປົວ​ສຳ­ລັບ​ເດັກ​ທີ່​ບໍ່​ໄດ້ສັກ​ຢາ​ກັນ​ພະ­ຍາດ​ມາ​ກ່ອນ​ນັ້ນ ເປັນ​ການ​ກະ­ທຳ​ທີ່ຝືນ​ຈັນ​ຍາ​ບັນ​ຂອງ​ແພດ” ການ​ລົງ​ເກັບ​ກຳ​ສະ­ຖິ­ຕິກ່ຽວ​ກັບ​ສຸ­ຂະ­ພາບ​ຂອງ​ເດັກ​ ຍັງ​ພົບ​ວ່າ ​ຜູ້​ເປັນ​ພໍ່​ແມ່ 1 ໃນ 10 ຄົນ​ໃດ ເຊື່ອ​ວ່າ­ການ​ສັກ​ຢາ​ກັນ​ພະ­ຍາດທົ່ວ​ໄປ​ນັ້ນ​ມີ​ສ່ວນ​ເຮັດ​ໃຫ້​ເດັກ​ມີ​ຄວາມ​ຜິດ​ປົກ­ກະ­ຕິທາງ​ດ້ານ​ຈິດ­ໃຈ ​ທີ່​ເອີ້ນ​ກັນ​ວ່າ ພະ­ຍາດ​ໂອ​ຕິດ (ພະຍາດ​ໄບ້) (Autism) ທັ້ງໆທີ່​ທາງ​ການ​ແພດ​ຢັ້ງຢືນ​ວ່າ ​ບໍ່​ມີ​ມູນ​ຄວາມ​ຈິງ ຜູ້​ເປັນ​ພໍ່​ແມ່​ຈຳ­ນວນ 3 ໃນ 4 ມີ​ຄຳ​ເຫັນ​ວ່າ ທາງ​ການ​ຄວນ​ແຈ້ງ​ໃຫ້​ພວກເຂົາ­ເຈົ້າ​ຊາບ​ໃນ​ກໍ­ລະ­ນີ​ມີ​ເດັກ​ທີ່​ບໍ່​ໄດ້​ຜ່ານ​ການ​ສັກຢາ​ກັນ​ພະ­ຍາດ​ເຂົ້າ​ຮ່ວມຮຽນ​ໃນ​ໂຮງ­ຮຽນ​ດຽວ​ກັນ​ກັບ​ລູກ​ຂອງ​ພວກ​ເຂົາ­ເຈົ້າ ແລະ ຜູ້​ເປັນ​ພໍ່​ແມ່​ອີກ ຈຳ­ນວນ 70% ບອກ​ວ່າ ຖ້າ​ບໍ່​ໄດ້​ຮັບ​ການແຈ້ງ​ດັ່ງຂ້າງ​ເທິງ​ນີ້ ພວກ​ເຂົາ​ຈະ​ຍ້າຍ​ລູກໆ​ຂອງ​ພວກ​ຕົນໄປ​ຮຽນ​ຢູ່​ບ່ອນ​ໃໝ່ ໃນ​ປີ 2016 ລັດ­ຖະ­ບານ​ອົດສະ​ຕຣາ​ລີ ໄດ້ອອກ​ນະ­ໂຍ­ບາຍ​ຢຸດ​ການ​ໃຫ້​ເງິນ​ອຸດໜູນເບິ່ງ­ແຍງ​ລູກ­ເຕົ້າ​ສຳ­ລັບ​ພໍ່​ແມ່​ທີ່​ບໍ່​ເອົາ​ລູກ​ໄປສັກ​ຢາ​ກັນ​ພະ­ຍາດ ແຕ່​ກໍ່​ມີ​ພໍ່​ແມ່ຈຳ­ນວນ​ໜຶ່ງ​ບໍ່​ຍອມ​ປະ­ຕິ­ບັດ​ຕາມ ຍ້ອນ​ຢ້ານ​ພວກ​ລູກໆ​ຂອງ​ຕົນ​ມີ​ຜົນ​ກະ­ທົບ​ທາງ​ຈິດ­ໃຈ ຍ້ອນ​ການ​ສັກ​ຢາ​ດັ່ງ­ກ່າວ.

ທີ່ ຫວຽດ­ນາມ: ມີ​ຂ່າວ​ຈາກ​ແຂວງ​ໄຕ​ນິນ ​ວ່າ ຫ້ອງ­ການ​ປ້ອງ​ກັນ​ປ່າ­ໄມ້​ຂອງ​ແຂວງ​ນີ້​ໄດ້​ພົບ​ຕົ້ນໄມ້​ຫຼາຍ​ຮ້ອຍ​ຕົ້ນ​ຖືກວາງ­ຢາ​ພິດ ໂດຍ​ມີ​ຮອຍ​ເຈາະຊອດ​ເປືອກ​ເຂົ້າ​ໄປ​ເຖິງ​ແກນ​ ແລ້ວ​ພົບ​ສານ­ພິດເພື່ອເຮັດ​ໃຫ້​ຕົ້ນ­ໄມ້​ຕາຍ ດ້ວຍ​ວິ­ທີ​ວາງ­ຢາດັ່ງ­ກ່າວ ຕົ້ນໄມ້​ຈະ​ແຫ້ງ​ຫ່ຽວ ແລະ ຕາຍ­ພາຍ​ໃນ 15 ວັນ ໃນຂະ­ນະ​ເລື່ອງ​ນີ້​ຕົກ​ເປັນ​ຂ່າວ​ຢູ່​ນັ້ນ ການ​ສືບ­ສວນ​ບັນຫາ​ໄດ້ດຳ­ເນີນ​ໄປ​ຢ່າງ​ຂຸ້ນ­ຂ້ຽວ ນອກ­ຈາກ​ນັ້ນ ຄະນະ​ປົກ​ປ້ອງ​ປ່າ­ໄມ້​ຍັງ​ພົບ​ການ​ລັກ­ລອບ​ຕັດ​ໄມ້​ເປັນຈຳ­ນວນ​ຫຼວງ­ຫຼາຍ ເຊື່ອກັນ​ວ່າ ການ​ວາງ­ຢາ​ທຳລາຍ​ປ່າ­ໄມ້ ແມ່ນ​ສີ­ມື​ຂອງ​ພວກ​ລັກ­ລອບ​ຕັດ​ໄມ້ ແລະ ພວກ​ບຽດ​ຢຶດ​ດິນ​ເຂດ​ປ່າ­ໄມ້ ເພື່ອ​ການ​ກະ​ສິກຳ ດັ່ງ­ນັ້ນ ທາງ​ແຂວງ​ຈຶ່ງ​ໄດ້​ຈັດ​ຕັ້ງ​ໜ່ວຍ​ປະ­ຕິ­ບັດງານ​ເຄື່ອນ​ທີ່​ ເພື່ອ​ຕິດ­ຕາມ​ປາບ​ປາມ​ກຸ່ມ​ທຳ­ລາຍປ່າ​ດັ່ງ­ກ່າວ.

ຂ່າວທີ່ກ່ຽວຂ້ອງ