ເລີ່ມເຈາະອຸບມຸງເສັ້ນທາງລົດໄຟ ລາວ-ຈີນ ຢູ່ບໍ່ເຕັນ

233 16 ມີ.ນ. 2017 ຂ່າວໜ້າ​ໜຶ່ງ

ໂອກາດ​ປະຊາຊົນ​ລາວ​ ຈະ​ໄດ້​ນັ່ງ​ລົດໄຟ​ຈາກ​ປະເທດ​ຂອງ​ຕົນ​ອອກ​ສູ່​ອາ​ຊຽນ ແລະ ເອີ​ຣົບ​ສົດໃສ​ຂຶ້ນ​ນັບ​ມື້ ເມື່ອ​ເຈົ້າ​ໜ້າທີ່​ວິຊາ​ສະເພາະ ແລະ ກຳມະກອນ​ຈຳນວນ​ຫຼາຍ​ຂອງ​ໂຄງການ​ກໍ່ສ້າງ​ເສັ້ນທາງ​ລົດໄຟ ລາວ-ຈີນ ໄດ້​ລົງມື​ເຈາະ​ອຸບ​ມຸງ​ເສັ້ນທາງ​ລົດໄຟ​ລອດ​ຢ່າງ​ເປັນ​ທາງ​ການ​ແລ້ວ ໃນ​ເດືອນ​ນີ້​ຢູ່​ເຂດ​ບໍ່​ເຕັນ ເມືອງ​ຫຼວງ​ນ້ຳ​ທາ ທ່ານ ຈັນທະ​ຈອນ ແກ້ວ​ລະຄອນ ຫົວໜ້າ​ຄະນະ​ປະສານ​ງານ​ໂຄງການ​ກໍ່ສ້າງ​ທາງ​ລົດໄຟ ລາວ-ຈີນ ປະຈຳ​ແຂວງ​ຫຼວງ​ນ້ຳ​ທາ ໄດ້​ໃຫ້​ສຳພາດ​ຕໍ່​ນັກ​ຂ່າວ​ສຳນັກ​ຂ່າວສານ​ປະເທດ​ລາວ ໃນ​ວັນ​ທີ 15 ມີນາ 2017 ນີ້​ວ່າ: ພາຍຫຼັງ​ໂຄງການ​ກໍ່ສ້າງ​ເສັ້ນທາງ​ລົດໄຟ ລາວ-ຈີນ ໄດ້​ວາງ​ສີ​ລາ​ລຶກ​ລົງມື​ກໍ່ສ້າງໃນ​ທ້າຍ​ປີ 2016 ຜ່ານ​ມາ​ຢູ່​ແຂວງ​ຫຼວງ​ພະ​ບາງ ເຫັນ​ວ່າ​ປັດຈຸບັນ​ນີ້ ​ໂຄງການ​ກໍ່ສ້າງ​ທາງ​ລົດ​ໄປ ລາວ-ຈີນ ໄລຍະ​ທີ 1 ມີ​ຄວາມ​ຄືບ​ໜ້າ​ໄວ​ເກີນ​ຄາດ ໂດຍ​ນັກວິຊາການ ແລະ ກຳມະກອນ​ສອງ​ຝ່າຍ​ປະມານ 300 ກວ່າ​ຄົນ ໄດ້​ລົງມື​ເຈາະ​ອຸບ​ມຸງ​ເສັ້ນທາງ​ລົດໄຟ​ລອດ​ຢ່າງ​ເຄັ່ງຮ້ອນ ເຊິ່ງ​ໂຄງການ​ໄລຍະ​ທີ 1 ນີ້ ແມ່ນ​ເລີ່ມຈາກ​ເຂດ​ບໍ່​ເຕັນ ແຂວງ​ຫຼວງ​ນ້ຳ​ທາ ຫາເມືອງ​ນາ​ໝໍ້ ແຂວງ​ອຸດົມ​ໄຊ ເຊິ່ງ​ມີ​ຄວາມ​ຍາວ 50 ກວ່າ​ກິໂລແມັດ ໃນ​ນັ້ນ ຜ່ານ​ແຂວງ​ຫຼວງ​ນ້ຳ​ທາ 16 ກວ່າ​ກິໂລແມັດ ມີ 2 ສະຖານີ​ຄື: ສະຖານີ​ບໍ່​ເຕັນ​ເປັນ​ສະຖານີນ້ອຍ​ສຳລັບ​ກວດ​ເຂົ້າ-ອອກ​ເມືອງ ແລະ ສະຖານີ​ນາ​ເຕີຍເປັນ​ສະຖານີ​ໃຫຍ່​ສຳລັບ​ຄ່ຽນ​ຖ່າຍ​ສິນຄ້າ ມີ​ຂົວ 7 ແຫ່ງ ຍາວ 4.000 ແມັດ ອຸບ​ມຸງ 3 ແຫ່ງ ຍາວ 10.000 ແມັດ (ອຸບ​ມຸງ​ມິດຕະພາບ ລາວ-ຈີນ ຍາວ 2.000 ແມັດ ອຸບ​ມຸງ​ບໍ່​ເຕັນ ຍາວ 6.000 ແມັດ ອຸບ​ມຸງ​ຕີນ​ຕົກ 1.000 ແມັດ).

ແນວໃດ​ກໍ່​ດີ ທ່ານ​ຍັງ​ຊີ້​ແຈງ​ວ່າ: ການຈັດຕັ້ງ​ປະຕິບັດ​ໂຄງການ​ກໍ່ສ້າງ​ເສັ້ນທາງ​ລົດໄຟ ລາວ-ຈີນ ນັ້ນແມ່ນ​ດຳເນີນ​ຄວບ​ຄູ່​ກັນ​ໄປ​ກັບ​ຫຼາຍ​ວຽກ​ປິ່ນ​ອ້ອມ ເຊິ່ງ​ປັດຈຸບັນ​ນີ້ ການ​ກໍ່ສ້າງ​ເຮືອນ​ພັກ​ພະນັກງານ-ກຳມະກອນ ສຳເລັດ 60% ວຽກ​ເກັບ​ກູ້​ລະເບີດ​ສຳເລັດ 12 ກວ່າ​ກິໂລແມັດ ການ​ໄກ່​ເກ່ຍ​ແກ້​ໄຂ​ຜົນ​ກະທົບ ແລະ ສິ່ງ​ກີດຂວາງ​ອອກ​ຈາກ​ແລວ​ທາງ​ລົດໄຟ​ແມ່ນ​ມີ​ຄວາມ​ຄືບ​ໜ້າ​ພໍ​ສົມຄວນ.

ສ່ວນ​ປະຊາຊົນ​ຜູ້​ທີ່​ໄດ້​ຮັບ​ຜົນ​ກະທົບ​ຈາກ​ໂຄງການ​ດັ່ງກ່າວ ກໍ່​ໄດ້​ສະເໜີ 4 ບັນຫາ​ຄື: 1.ຂໍ​ໃຫ້​ຊົດ​ເຊີຍ​ຕາມ​ຄວາມ​ເໝາະ​ສົມ ສາມາດ​ໄປ​ສ້າງ​ທີ່ຢູ່​ອາໄສ​ໃໝ່​ໃຫ້​ດີ​ກວ່າ​ເກົ່າ ຫຼື ເທົ່າ​ເດີມ 2. ສະເໜີ​ຈັດ​ສັນ​ທີ່ຢູ່​ອາໄສ​ບ່ອນ​ໃໝ່​ເປັນ​ທີ່​ຮຽບ​ຮ້ອຍ​ແລ້ວ ​ຈຶ່ງ​ຄ່ອຍ​ໃຫ້​ດຳເນີນ​ການ​ກໍ່ສ້າງ 3. ສະເໜີ​ພາກ​ລັດ​ໃຫ້​ກຳນົດ​ລາຄາ​ຫົວໜ່ວຍ​ຊົດ​ເຊີຍ​ໂດຍ​ໄວ ເພື່ອ​ສະດວກ​ຕໍ່​ການ​ໄກ່​ເກ່ຍ ແລະ 4. ສະເໜີ​ຄ່າ​ຊົດ​ເຊີຍ​ການ​ຍົກຍ້າຍ​ບ້ານ ນອກຈາກ​ເປັນ​ເງິນສົດ​ແລ້ວ ​ຄວນ​ຮູ້​ແບບ​ນະໂຍບາຍ​ອື່ນໆ​ອີກ​ເປັນຕົ້ນ ຈັດ​ສັນ ແລະ ປຸກເຮືອນ​ໃຫ້​ຄື​ກັບໂຄງການ​ເຂື່ອນ​ໄຟຟ້າ​ນ້ຳ​ທາ 1.

ເສັ້ນທາງ​ລົດໄຟ ລາວ-ຈີນ ມີ​ຄວາມ​ຍາວ​ທັງ​ໝົດ 417 ກິໂລແມັດ ມູນ​ຄ່າ​ການ​ກໍ່ສ້າງ​ປະມານ 6,8 ຕື້​ໂດ​ລາ ແລະ ຄາດ​ວ່າ​ຈະ​ສຳເລັດ​ພາຍ​ໃນ​ປີ 2020.

ຂ່າວທີ່ກ່ຽວຂ້ອງ