ນວ ສຸມໃສ່ຈັດຕັ້ງປະຕິບັດຄຳສັ່ງເລກທີ 15 ຢ່າງເຂັ້ມງວດ

138 16 ມີ.ນ. 2017 ຂ່າວໜ້າ​ໜຶ່ງ
ນວ ສຸມໃສ່ຈັດຕັ້ງປະຕິບັດຄຳສັ່ງເລກທີ 15 ຢ່າງເຂັ້ມງວດ

ກອງ​ປະຊຸມ​ຄົບ​ຄະນະ​ບໍ​ລິຫານ​ງານ​ພັກ​ ຮ່ວມ​ກັບ​ອົງການປົກຄອງນະຄອນຫຼວງ​ວຽງ​ຈັນ (ນວ) ຈັດ​ຂຶ້ນ​ລະຫວ່າງ​ວັນ​ທີ 15-17 ມີນາ 2017 ທີ່​ຫ້ອງ​ວ່າການປົກຄອງ ນວ ໂດຍ​ເປັນ​ປະທານຂອງ​ທ່ານ ສິນ​ລະ​ວົງ ຄຸດ​ໄພທູນ ກຳມະການ​ກົມ​ການເມືອງ​ສູນກາງ​ພັກ ເລຂາ​ຄະນະ​ພັກ ເຈົ້າຄອງ ນວ ບັນດາ​ການ​ນຳ ນວ ແລະ ພາກສ່ວນ​ກ່ຽວຂ້ອງ​ເຂົ້າຮ່ວມ.

ກອງ​ປະຊຸມ​ໄດ້​ຮັບ​ຟັງ​ລາຍງານ​ສະພາບ​ການ​ຊີ້​ນຳ-ນຳພາວຽກ​ງານ​ພົ້ນ​ເດັ່ນ​ຂອງ​ຄະນະ​ພັກ ປະຈຳ​ໄຕ​ມາດ I ແລະ ແຜນ​ວຽກງານ​ຈຸດ​ສຸມ​ໄຕ​ມາດ II ປີ 2017 ໃນ​ໄລຍະ 3 ເດືອນ​ຜ່ານ​ມາ ການຈັດ​ຕັ້ງ​ນຳພາ​ວຽກ​ງານ​ຂົງເຂດເສດຖະກິດ​ສືບຕໍ່​ຈັດ​ຕັ້ງ​ປະຕິບັດ ຄຳ​ສັ່ງ​ເລກ​ທີ 15/​ນຍ ແລະ ກວດກາ​ການເຄື່ອນໄຫວ​ກ່ຽວ​ກັບ​ທຸລະກິດ​ໄມ້ຢູ່​ບັນດາ​ເມືອງ​ຕ່າງໆ ພົບເຫັນ​ໂຕະ​ຊອຍ​ໄມ້​ທີ່​ບໍ່​ຖືກຕ້ອງຕາມ​ລະບຽບ 69 ໂຕະ ໂຮງງານເຟີ​ນີ​ເຈີ​ທີ່​ຜິດ​ຕໍ່​ກົດໝາຍ ແລະ ລະບຽບ​ການ 14 ເປົ້າ​ໝາຍ ສາງເກັບ​ມ້ຽນ​ໄມ້ 2 ແຫ່ງ ສັ່ງ​ປິດ​ຖາວອນ 8 ແຫ່ງ ແລະ ເຄື່ອງມື​ທີ່ໃຊ້​ເຂົ້າ​ໃນ​ການ​ຕັດ​ໄມ້​ຈຳນວນໜຶ່ງ ຈັດ​ງານ​ວາງສະແດງ​ຜະລິດຕະ​ພັນ​ສິນຄ້າ​ຄອບຄົວ​ຕົວ​ແບບໂອ​ດ໋ອບ ປະຈຳ​ປີ 2017 ຢູ່​ບັນດາເມືອງ​ທີ່​ມີ​ໜໍ່​ແໜງ​ການ​ຜະລິດ​ສິນຄ້າ ແລະ ວຽກ​ງານ​ອື່ນໆ.

ສຳລັບ​ແຜນ​ວຽກ​ຈຸດ​ສຸມ​ຕໍ່ໜ້າ​ສືບຕໍ່​ຄົ້ນຄວ້າ​ເຊື່ອມ​ຊຶມ ​ຈິນຕະ​ນາ​ການ​ໃນ​ການ​ພັດທະນາເສດຖະກິດ​ຕາມ​ກົນ​ໄກ​ຕະຫຼາດ ໃນ​ການ​ເຊື່ອມ​ໂຍງ​ອາ​ຊຽນ ການເປີດ​ປະຕູ​ສູ່​ສັງຄົມ​ອອນ​ລາຍ​ໃນການ​ສ້າງ​ຄວາມ​ເອກະລາດ ເປັນເຈົ້າ​ຕົນ​ເອງ​ເພິ່ງ​ຕົນ​ເອງ ແລະ ສ້າງ​ຄວາມ​ເຂັ້ມແຂງ​ດ້ວຍ​ຕົນເອງ ຈິນຕະນາການ​ຂ້າມ​ຜ່ານໄປ​ສູ່​ຈຸດໝາຍ​ສັງຄົມ​ນິຍົມ ​ສົ່ງເສີມ​ຄົ້ນຄວ້າ​ຮ່ຳຮຽນການ​ຫັນເປັນ​ທັນ​ສະໄໝ ICT ສືບຕໍ່​ຕິດຕາມ​ກວດກາ ແລະ ກວດ​ສອບການ​ຈັດ​​ຕັ້ງ​ປະຕິບັດ​ແຜນ​ພັດ​ທະນາ​ເສດຖະກິດ-ສັງຄົມ ແຜນ​ງົບປະມານ​ແຫ່ງ​ລັດ ແຜນການ​ລົງທຶນ​ຂອງ​ລັດ​ຂອງ​ບັນດາ​ພະ​ແນກການ ອົງການ​ທຽບ​ເທົ່າ​ລົງ​ຮອດ​ຂັ້ນ​ເມືອງ ແລະ ບ້ານ ເພື່ອ​ຮັບ​ປະກັນ​ໃຫ້ການ​ປະຕິບັດ​ແຜນການດັ່ງກ່າວ ​ໄປ​ຕາມ​ລະບຽບ​ກົດໝາຍທີ່​ວາງ​ອອກ​ຢ່າງ​ເຂັ້ມ​ງວດ ປຸກ​ລະດົມ​ນຳພາ​ສ້າງ​ຊຸມ​ຊົນ​ກາຍເປັນເມືອງ​ສາກົນ​ແຫ່ງ​ໜຶ່ງ ກາຍເປັນສູນ​ລວມ​ຈິດໃຈຊາດ​ລາວ​ເອກະລາດ​ໜຶ່ງ​ດຽວ ​ຕິດ​ພັນ​ກັບ​ການເສີມ​ສ້າງ​ຊຸມ​ຊົນ​ສາມັກຄີ​ປອງດອງ ປຸກລະດົມ​ກຳລັງ​ແຮງ​​ທົ່ວສັງຄົມ ​ເຂົ້າ​ໃນ​ການ​ຈັດ​​ຕັ້ງ​ປະຕິບັດ​ທິດ​ນຳ 5 ຮ່ວມ ແລະ ແກ້​ໄຂປາກົດການ​ຫຍໍ້ທໍ້.

ຂ່າວທີ່ກ່ຽວຂ້ອງ