ຈັບໄດ້ຄົນຂັບລົດໂດຍສານ ລັກລອບຂາຍຢາເສບຕິດ

103 ວັນຈັນ ເວລາ 10:40 ຂ່າວໜ້າ​ໜຶ່ງ

ໃນ​ທ້າຍ​ເດືອນ​ກຸມພາຜ່ານມາ ເຈົ້າ​ໜ້າທີ່​ໜ່ວຍ​ງານ​ສະກັດກັ້ນ ແລະ ຕ້ານ​ຢາ​ເສບ​ຕິດ ​ປກສ ເມືອງ​ຜົ້ງ​ສາລີ ສາມາດ​ກັກ​ຕົວທ້າວ ແສງ​ຄຳ ອາຍຸ 26 ປີ​ຢູ່​ບ້ານຜົ້ງ​ສາລີ ເມືອງ ແລະ ແຂວງ​ຜົ້ງສາລີ ທີ່​ລັກລອບ​ຊື້​ຂາຍ​ຢາ​ເສບຕິດ​ປະເພດ​ຢາ​ບ້າ ຢູ່​ຕາມ​ຄິວ​ລົດໂດຍສານ ພ້ອມ​ຢາ​ບ້າ​ຈຳນວນ 650 ເມັດ.

ເຈົ້າ​ໜ້າທີ່​ໜ່ວຍ​ງານ​ສືບສວນ-ສອບ​ສວນ​ຄະດີ​ອາຍາ ​ປກສ ເມືອງ​ຜົ້ງ​ສາລີ ​ໄດ້​ໃຫ້​ຮູ້​ວ່າ: ພາຍຫຼັງ​ໄດ້​ຮັບ​ຂ່າວ​ຈາກ​ແຫຼ່ງ​ຂ່າວວ່າ ມີ​ໂຊ​ເຟີ​ຂັບ​ລົດ​ໂດຍສານສາຍ​ຜົ້ງ​ສາລີ ລັກລອບ​ຊື້​ຂາຍຢາ​ເສບ​ຕິດ​ປະເພດ​ຢາ​ບ້າ ຢູ່​ບໍ​ລິເວນ​ຄິວ​ລົດ​ໂດຍສານ ຈຶ່ງ​ໄດ້​ແຕ່ງຕັ້ງ​ໜ່ວຍ​ງານ​ວິຊາ​ສະເພາະ​ລົງເກັບ​ກຳ​ຂໍ້​ມູນ ເຫັນ​ວ່າມີ​ມູນຄວາມ​ຈິງ ແລະ ໄດ້​ຂຶ້ນ​ເປົ້າໝາຍ ພ້ອມ​ທັງ​ກັກ​ຕົວ​ທ້າວ ແສງຄຳ ໃນ​ວັນ​ທີ 24 ກຸມພາ 2017 ພ້ອມ​ຢາ​ບ້າ​ຈຳນວນ 650 ເມັດ.

ຜ່ານ​ການ​ສອບ​ສວນ​ຂອງເຈົ້າ​ໜ້າທີ່ຜູ້ກ່ຽວ​ຮັບ​ສາລະພາບວ່າ: ຢາ​ບ້າ​ຈຳນວນ​ດັ່ງກ່າວ​ ແມ່ນໄດ້​ຕິດຕໍ່​ຊື້​ຢູ່​ແຂວງ​ອຸດົມ​ໄຊ ໂດຍນັດ​ຈຸດ​ຊື້​ຂາຍ​ຢູ່​ເຮືອນ​ພັກ​ແຫ່ງໜຶ່ງ ເຂດ​ຄິວ​ລົດ​ເກົ່າ​ແຂວງ​ອຸດົມໄຊ ສ່ວນ​ຢາ​ບ້າ​ຈຳນວນ​ດັ່ງກ່າວແມ່ນ​ຊື້​ໄວ້​ຂາຍ​ໃຫ້​ໝູ່ຄູ່ ແລະ ເອົາ​ໄວ້​ເສບ​ເອງ ແຕ່​ບໍ່​ທັນ​ໄດ້​ຂາຍ ກໍ່​ຖືກ​ເຈົ້າ​ໜ້າທີ່ ​ປກສ ເຂົ້າ​ກັກ​ຕົວ ພ້ອມ​ຢາ​ບ້າ​ຈຳນວນ​ດັ່ງກ່າວ​ໄປດຳເນີນ​ຄະດີ.

ຂ່າວທີ່ກ່ຽວຂ້ອງ