ສໍ້​ລາດ​ບັງ​ຫຼວງ - ໂດຍ: ດັ້ນ​ກີບ​ເມກ

1.943 21 ມີ.ນ. 2017 ນານາສາລະ

ສ່ວນ​ໃຫຍ່​ພວກ​ເຮົາ​ໄດ້​ຍິນ​ວ່າ ສໍ້​ລາດ​ບັງຫຼວງ ​ເຊິ່ງ​ເຂົ້າ­ໃຈ​ວ່າ​ທັງ​ສອງ​ປະ­ການ ເປັນ​ການ​ລັກ​ໂລບ​ສໍ້​ໂກງ​ຈາກ​ສອງ​ຝ່າຍ ຈາກ​ລຸ່ມ​ຫາ​ເທິງ ແລະ ຈາກ​ເທິງລົງ​ລຸ່ມ ຖ້າ​ເປີດ​ກົດ­ໝາຍ​ວ່າ​ດ້ວຍ​ການ​ຕ້ານການສໍ້​ລາດ​ບັງ​ຫຼວງ ຫຼື ປຶ້ມ​ຄູ່​ມື​ຕ້ານ​ການ​ສໍ້ລາດບັງ​ຫຼວງ ກໍ່​ປາ­ກົດ​ວ່າ: ໃນ​ມາດ­ຕາ 10 ກໍ່​ຂຽນ​ໄວ້ກວມ​ລວມ​ຢ່າງ​ຄົບ​ຖ້ວນເຖິງ​ສອງ​ພຶດ­ຕິ​ກຳ ​ທັງ​ສໍ້ລາດ​ບັງ​ຫຼວງ ແລະ ສໍ້​ຫຼວງ​ບັງ​ລາດ.

ຜູ້​ຂຽນ​ເຂົ້າ­ໃຈ​ວ່າ ​ສໍ້​ລາດ​ບັງ​ຫຼວງ​ ແມ່ນ​ພຶດ­ຕິ​ກຳໜຶ່ງ​ຂອງ​ພະ­ນັກ­ງານ​ທີ່​ຮັບ​ໜ້າ­ທີ່ ຫຼື ນະ­ໂຍ­ບາຍກ່ຽວ​ກັບ​ຜົນ​ປະ­ໂຫຍດຂອງ​ພະ­ນັກ­ງານ​ຂັ້ນ​ຕ່ຳກວ່າ ຫຼື ປະ­ຕິ­ບັດ​ຕໍ່​ປະ­ຊາ­ຊົນ​ແບບ​ບໍ່​ເຕັມ​ເມັດ​ເຕັມໜ່ວຍ ເພາະ​ມັນ​ຕົກ­ເຮ່ຍ​ເສຍ​ຫາຍ ເຊິ່ງ​ບໍ່​ຕ່າງຫຍັງ​ກັບ​ການ​ເກັບ​ພາ­ສີ​ອາ­ກອນ​ເຂົ້າ​ລາຍ​ຮັບແຫ່ງ​ຊາດ​ບໍ່​ເປັນ​ໄປ​ຕາມ​ແຜນ ເຊິ່ງ​ມັນ​ໄດ້​ຕົກ­ເຮ່ຍເສຍ​ຫາຍ​ບ່ອນ​ລະ​ເລັກລະ​ໜ້ອຍ ເພາະ​ເລື້ອງການ​ສໍ້​ໂກງ ຫຼື ບໍ­ລິ­ຫານ​ທີ່​ສວຍ­ໂອ­ກາດ​ເອົາ​ປຽບເອົາ​ລັດ​ນັ້ນ ປາ­ກົດ​ເປັນ​ຂ່າວ​ໃຫ້​ຮູ້​ບາງ​ໄລ­ຍະ​ຈົນມີ​ຄຳ​ເວົ້າ​ຮູ້​ກັນ​ທົ່ວ​ສັງ­ຄົມ​ວ່າ: ໄຫ​ໃຫຍ່​ລົ້ນ ​ໄຫນ້ອຍ​ບໍ່​ເຕັມ ແລະ ພັດ​ມີ​ບາງ​ຄົນ​ທີ່​ເວົ້າ​ຂຶ້ນ​ມາ​ໃໝ່ວ່າ: ໄຫ​ໃຫຍ່​ເຕັມ ໄຫ​ກາງ​ລົ້ນ ໄຫ​ນ້ອຍ​ບໍ່​ເຕັມ.

ເມື່ອ​ເວົ້າ​ເຖິງ​ພະ­ນັກ­ງານ​ທີ່​ມີ­ໜ້າ​ທີ່​ໃນ​ການ​ບໍ​ລິການ ກໍ່​ຄິດ​ເຫັນ​ກົດ­ໝາຍ​ວ່າ​ດ້ວຍ​ພະ­ນັກ­ງານ​ລັດຖະ​ກອນ ໂດຍ​ສະ­ເພາະມາດ­ຕາ 55 ທີ່​ເວົ້າ​ເຖິງພະ­ນັກ­ງານ​ບໍ­ລິ­ຫານຄວນ​ເອົາ­ໃຈ­ໃສ່​ພາ­ລະ​ບົດບາດ​ຂອງ​ຕົນ​ຕາມ​ຫຼັກ­ການ​ຄຸ້ມ​ຄອງ​ລັດ​ດ້ວຍ​ກົດ­ໝາຍ ດັ່ງ­ນີ້: 1 ລັດ­ຖະ­ກອນ​ທີ່​ມີ​ຕຳ­ແໜ່ງ​ບໍ​ລິຫານ... 2 ຄົ້ນ­ຄວ້າ ແລະ ຜັນ​ຂະ­ຫຍາຍ​ແນວທາງ​ນະ­ໂຍ­ບາຍ ແຜນ​ຍຸດ​ທະສາດ ແຜນ​ແມ່​ບົດ ກ່ຽວ​ກັບ​ວຽກ​ຕົນ​ເອງ​ຮັບ­ຜິດ­ຊອບ... 3 ຄົ້ນ­ຄວ້າ ແລະ ປັບ­ປຸງ​ກົງ­ຈັກ​ການ­ຈັດ­ຕັ້ງ​ຂອງ​ຕົນ​ໃຫ້​ຖືກຕ້ອງຕາມ​ທິດ​ກະ­ທັດ​ຫັດ​ຮັດ... 4 ໂຄ­ສະ­ນາ​ເຜີຍແຜ່​ແນວ­ທາງ​ນະ­ໂຍ­ບາຍ ກົດ­ໝາຍ ແລະ ລະ­ບຽບການ ​ໃຫ້​ພະ­ນັກ­ງານ​ລັດ­ຖະ­ກອນ​ໃນ​ຂອບ​ເຂດຄວາມ​ຮັບ­ຜິດ­ຊອບ​ຂອງ​ຕົນ 5 ຄຸ້ມ​ຄອງ​ພະ­ນັກງານ​ລັດ­ຖະ­ກອນ​ທີ່­ຢູ່​ໃນ​ຄວາມ​ຮັບ­ຜິດ­ຊອບ​ຂອງຕົນ 6 ແກ້​ໄຂ​ຄຳ​ຮ້ອງ­ທຸກ​ຂອງ​ບຸກ­ຄົນ​ການ­ຈັດ­ຕັ້ງຕາມ​ກົດ­ໝາຍ ແລະ ລະ­ບຽບ​ການ 7 ປະ­ສານສົມ­ທົບ​ກັບ​ການ­ຈັດ­ຕັ້ງກ່ຽວ­ຂ້ອງ​ໃນ​ການ​ປະ­ຕິ­ບັດໜ້າ­ທີ່​ຕາມ​ຄວາມ​ຮັບ­ຜິດ­ຊອບ​ຂອງ​ຕົນ ໜ້າ­ທີ່​ເຈັດປະ­ການ​ຂອງ​ພະ­ນັກ­ງານ​ລະ­ດັບ​ຜູ້​ບໍ­ລິ­ຫານ (ຫົວໜ້າ) ສາ­ມາດ​ເຍືອງ​ທາງ​ການ​ປະ­ຕິ­ບັດ​ໜ້າ­ທີ່​ຂອງຕົນ ໂດຍ​ສະ­ເພາະຄວາມ​ຍຸ­ຕິ​ທຳ​ປອດ​ໃສຕໍ່​ພະນັກ​ງານ​ໜຸ່ມ​ນ້ອຍ​ຜູ້​ຢູ່​ກ້ອງ​ບັງ­ຄັບ​ບັນ­ຊາ​ຂອງ​ຕົນ ເພາະ​ພະ­ນັກ­ງານ​ລະ­ດັບ​ກາງ​ຮູ້​ດີ​ເລື່ອງ​ຂອງ​ຂັ້ນເທິງ ແລະ ຂັ້ນ​ລຸ່ມ ຈຶ່ງ​ເປັນ​ສ່ວນ​ປະ­ສານໃນ​ກົງຈັກ​ການ­ຈັດ­ຕັ້ງ​ໃຫ້​ກ້າວ­ໜ້າ.

ສໍ້​ຫຼວງ​ບັງ​ລາດ ຫຼື ສໍ້​ລາດ​ບັງ​ຫຼວງ ທັງ​ສອງຢ່າງ​ມັນ​ກໍ່­ສ້າງ​ຄວາມ​ເສຍ​ຫາຍ​ແກ່​ຊາດ​ບ້ານເມືອງ​ໂດຍ​ລວມ ເຊິ່ງ​ຜູ້​ເປັນ​ຫົວ­ໜ້າ ຫຼື ຜູ້​ບັງ­ຄັບບັນ­ຊາ​ຄວນ​ກວດ​ຂັນ​ເຂັ້ມ​ງວດ​ດ້ານ​ລະ­ບຽບ​ວິ­ໄນ ເຊັ່ນ: ບັນ­ຫາ​ການ​ເບີກ​ຈ່າຍ​ເງິນ­ເດືອນ​ແກ່​ພະ­ນັກງານຄວນ​ທັນ​ຕາມ​ກຳ­ນົດ ເພາະ​ບາງ­ເທື່ອ​ຫາກກົດ​ລະ­ບຽບ​ຫາກ​ຢ່ອນ​ຍານ​ເກີນ​ໄປ ອາດ​ເຮັດ​ໃຫ້ຂັດ­ຂ້ອງ​ໄປ​ບໍ່​ຮອດ​ຈຸດ­ໝາຍ ການ​ປະ­ຕິ­ບັດ​ຕາມກົດ­ໝາຍ ລະ­ບຽບ​ ຄຳ​ສັ່ງ ​ເຄັ່ງ​ແນ່​ຄົງ​ຈະ​ດີ! ເພື່ອຮັກ­ສາ​ໄວ້​ເຊິ່ງ​ຜົນ​ປະ­ໂຫຍດ​ສ່ວນ​ລວມ​ຂອງ​ລັດ.

ຂໍ​ສະ­ເໜີ​ເປັນ​ການ​ແລກ­ປ່ຽນ​ນໍ?.

ຂ່າວທີ່ກ່ຽວຂ້ອງ