ກັກເປົ້າໝາຍຄ້າເຮໂຣອິນລາຍໃຫຍ່

704 19 ມ.ສ. 2017 ຂ່າວໜ້າ​ໜຶ່ງ

ເຈົ້າ​ໜ້າທີ່​ກົມ​ຕຳຫຼວດ​ສະກັດ​ກັ້ນ ແລະ ຕ້ານ​ຢາ​ເສບ​ຕິດກົມ​ໃຫຍ່​ຕຳຫຼວດ ກະຊວງ ​ປກສ ໄດ້​ນຳ​ກຳລັງ​ເຂົ້າ​ກັກ​ຕົວ​ພວກ​ຄ້າຂາຍ​ເຮ​ໂຣ​ອິນ​ລາຍ​ໃຫຍ່ 3 ຄົນ ພ້ອມ​ຂອງ​ກາງ​ເກືອບ 100 ຫໍ່ ໃນຂະນະ​ທີ່​ພວກ​ກ່ຽວ​ກຳລັງ​ນັດ​ສົ່ງໃຫ້​ກັນ​ຢູ່​ເຂດ​ບ້ານ​ຫົວ​ຊຽງ ເມືອງໄຊ​ທານີ ນະຄອນຫຼວງ​ວຽງ​ຈັນ ໃນ​ວັນ​ທີ 4 ເມສາ 2017.

ເຈົ້າ​ໜ້າ​ເປີດເຜີຍ​ວ່າ: ພາຍຫຼັງ​ໄດ້​ຮັບ​ແຫຼ່ງ​ຂ່າວ​ຈາກ​ພົນ​ລະເມືອງ​ດີ ​ວ່າມີ​ກຸ່ມ​ຄົນ​ລັກລອບຄ້າຂາຍ​ເຮ​ໂຣ​ອິນ​ລາຍ​ໃຫຍ່ ​ກຳລັງ​ເຄື່ອນ​ໄຫວ​ນັດ​ຊື້​ຂາຍ​ໃຫ້​ກັນ​ຢູ່ເຂດ​ບ້ານ​ຫົວ​ຊຽງ ເມືອງ​ໄຊ​ທານີ ນະຄອນຫຼວງ​ວຽງ​ຈັນ ຈາກ​ນັ້ນ ຈຶ່ງ​ໄດ້​ແຕ່ງ​ພະນັກງານ​ວິຊາ​ສະເພາະ​ລົງ​ຕິດຕາມ​ໄປ​ພິສູດ​ແຫຼ່ງຂ່າວ ຜ່ານ​ການ​ຕິດຕາມ​ກວດກາ ເຫັນ​ວ່າ​ມີ​ມູນ​ຄວາມ​ຈິງ​ແທ້ ມາຮອດ​ເວລາ 13:00 ໂມງຂອງ​ວັນທີ 4 ເມສາ 2017 ຈຶ່ງ​ໄດ້​ວາງແຜນ​ເຂົ້າ​ຈັບ​ຕົວ​ພວກ​ກ່ຽວ​ໄດ້ 3 ຄົນ ພ້ອມ​ຂອງ​ກາງ​ຢາ​ເສບ​ຕິດ ປະເພດ​ເຮ​ໂຣ​ອິນ 97 ຫໍ່ ນ້ຳໜັກ 40 ກິ​ໂລກ​ຣາມ ພ້ອມ​ລົດ​ໃຫຍ່ 2 ຄັນ ໂທລະສັບ 4 ໜ່ວຍ ເຊິ່ງ​ຜູ້ຕ້ອງ​ຫາ​ທັງ 3 ຄົນ​ຊື່​ທ້າວ ສາລີ ອາຍຸ 29 ປີ ແລະ ທ້າວ ປໍ​ລີ ອາຍຸ 20 ປີ ຢູ່​ບ້ານ​ໄຊ​ຈະເລີນ ເມືອງ​ຫ້ວຍ​ຊາຍ ແຂວງ​ບໍ່​ແກ້ວ ແລະ ທ້າວ ຮື​ຢາງ ອາຍຸ 23 ປີ ຢູ່​ບ້ານ​ໜອງ​ສອງ​ຫ້ອງ ເມືອງ​ໄຊທານີ ນະຄອນຫຼວງ​ວຽງ​ຈັນ.

ຜ່ານ​ການ​ສືບສວນ-ສອບ​ສວນຂອງ​ເຈົ້າ​ໜ້າທີ່ ພວກ​ກ່ຽວ​ຮັບ​ສາລະ​ພາບ​ວ່າ: ເຮ​ໂຮ​ອິນ​ຈຳນວນດັ່ງກ່າວ​ແມ່ນ​ຂອງ​ພວກ​ກ່ຽວ​ແທ້ ໂດຍ​ຊື້​ມາ​ຈາກ​ຜູ້​ຊາຍ​ຄົນ​ໜຶ່ງ​ບໍ່​ຮູ້ຊື່ ແລະ ທີ່ຢູ່​ແນ່ນອນ ເພື່ອ​ຈະເອົາ​ມາ​ຂາຍ​ຕໍ່ໃຫ້​ລູກ​ຄ້າ​ຕາມສັ່ງ ເຊິ່ງ​ນັດ​ສົ່ງ​ໃຫ້​ກັນ​ຢູ່​ເຂດ​ບ້ານຫົວ​ຊຽງ ແຕ່​ຍັງ​ບໍ່​ທັນ​ໄດ້​ຂາຍ ກໍ່ຖືກ​ເຈົ້າ​ໜ້າທີ່​ຈັບ​ຕົວ​ກ່ອນ ປັດ​ຈຸບັນ ພວກ​ຖືກ​ຫາ​ລາຍ​ນີ້​ຍັງ​ຢູ່​ໃນຂັ້ນ​ຕອນ​ຂອງ​ການ​ສືບສວນ-ສອບ​ສວນ​ຂະຫຍາຍ​ຜົນ​ຫາ​ເຄືອຂ່າຍ ກຸ່ມ​ແກ້ງ ພັກ​ພວກ​ຜູ້​ເປັນຫົວ​ໂປ່​ໂຕ​ການ ເພື່ອ​ນຳ​ຈັບ​ຕົວມາ​ດຳເນີນ​ຄະດີ​ຕາມ​ຂັ້ນ​ຕອນຂອງ​ກົດໝາຍ.

ຂ່າວທີ່ກ່ຽວຂ້ອງ