ຈັບໄດ້ຄາຕະຫຼາດ ພ້ອມຢາບ້າ 4 ພັນເມັດ

631 20 ມ.ສ. 2017 ຂ່າວໜ້າ​ໜຶ່ງ

ເຈົ້າ​ໜ້າທີ່​ຕຳຫຼວດ​ສະກັດ​ກັ້ນ ແລະ ຕ້ານ​ຢາ​ເສບ​ຕິດ ​ປກສ ແຂວງ​ໄຊ​ຍະ​ບູ​ລີ ໄດ້​ນຳ​ກຳລັງເຂົ້າ​ກັກ​ຕົວ​ທ້າວ ວາຈາ​ຮາ ອາຍຸ 29 ປີ​ຢູ່​ບ້ານ​ຫ້ວຍ​ກົວ ເມືອງ​ແມດ ແຂວງ​ວຽງ​ຈັນ ພ້ອມ​ຂອງ​ກາງ ຢາ​ບ້າ ຈຳນວນ 2 ມັດ ເທົ່າ​ກັບ 4.000 ເມັດ ໃນ​ວັນ​ທີ 19 ມີນາ 2017 ໃນ​ຂະນະ​ທີ່​ຜູ້ກ່ຽວ​ກຳລັງນຳ​ເອົາ​ຢາ​ບ້າ​ໄປ​ສົ່ງ​ໃຫ້​ລູກ​ຄ້າ​ຢູ່ຕະຫຼາດ​ບ້ານ​ນາ​ຕໍ​ນ້ອຍ ເມືອງ​ໄຊຍະ​ບູ​ລີ.

ເຈົ້າ​ໜ້າທີ່ ​ປກສ ແຂວງ​ໄຊ​ຍະບູ​ລີ ໃຫ້​ຮູ້​ວ່າ: ພາຍຫຼັງ​ໄດ້​ຮັບແຈ້ງ​ຄວາມ​ຈາກ​ພົນລະເມືອງ​ດີ​ ຢູ່ເຂດ​ຕະຫຼາດ​ບ້ານ​ນາ​ຕໍ​ນ້ອຍ ເມືອງ​ໄຊ​ຍະ​ບູ​ລີ ວ່າ: ມີ​ກຸ່ມ​ຄົນບໍ່​ດີ​ເຄື່ອນ​ໄຫວ​ຊື້​ຂາຍ​ຢາ​ເສບ​ຕິດ ຈຶ່ງ​ໄດ້​ລົງ​ຕິດຕາມກວດກາ​ໃນຂອບ​ເຂດ​ສະຖານທີ່​ດັ່ງກ່າວ ເຫັນວ່າ​ມີ​ມູນ​ຄວາມ​ຈິງ​ແທ້ ຈຶ່ງ​ໄດ້​ນຳກຳລັງ​ວິຊາ​ສະເພາະ​ລົງ​ມ້າງ​ທັນທີ ແລະ ສາມາດ​ກັກ​ຕົວ​ທ້າວ ວາຈາ​ຮາ ພ້ອມ​ຢາ​ບ້າຈຳນວນ 4.000 ເມັດ ແລະ ໂທລະສັບ 1 ໜ່ວຍ​ໄປ​ສອບ​ສວນ.

ຜ່ານ​ການ​ສອບ​ສວນ ຜູ້ກ່ຽວຮັບ​ສາລະພາບ​ວ່າ: ຢາ​ບ້າ​ຈຳນວນ​ດັ່ງກ່າວ​ແມ່ນ​ຂອງ​ຜູ້ກ່ຽວແທ້ ໂດຍ​ໄດ້​ຊື້​ນຳ​ຜູ້​ຊາຍ​ຄົນ​ໜຶ່ງ ອາຍຸປະມານ 27-28 ປີ​ຢູ່​ໃນ​ຕົວເມືອງ ແຂວງ​ໄຊ​ຍະ​ບູ​ລີ ເພື່ອ​ນຳມາ​ຂາຍຍ່ອຍ ແລະ ຂາຍ​ສົ່ງ​ໃຫ້ກັບ​ພັກ​ພວກ​ທີ່​ມັກ​ມາ​ມົ້ວ​ສຸມ​ຢາເສບ​ຕິດ​ຢູ່​ພາຍ​ໃນ​ບ້ານ ປັດຈຸບັນ ຄະດີ​ດັ່ງກ່າວ ເຈົ້າ​ໜ້າທີ່ ​ປກສ ແຂວງ ​ຍັງ​ໄດ້​ຂຶ້ນ​ເປົ້າ​ໝາຍ​ຜູ້​ຖືກຊັດ​ທອດ​ເຖິງ ເພື່ອ​ນຳ​ຈັບ​ຕົວ​ມາດຳເນີນ​ຄະດີ​ຕາມ​ກົດໝາຍ​ໃນຂັ້ນ​ຕໍ່​ໄປ.

ຂ່າວທີ່ກ່ຽວຂ້ອງ