ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສ ເກົາ­ຫຼີ ສປ ຈີນ ຝຣັ່ງ

1.275 26 ມ.ສ. 2017 ຫົວຂໍ້ຂ່າວອື່ນໆ

ມື້­ນີ້​ຂໍ​ເປີດ​ສາກ​ກັບ​ເນື້ອ​ໃນ​ກົດ­ໝາຍ​ຫ້າມ​ຄ້າ​ປະເວ​ນີ​ຢູ່ ສ ເກົາ­ຫຼີ ຕໍ່​ໃສ່​ເລື່ອງ​ບັນ­ດາ​ບໍ­ລິ­ສັດ​ເຈົ້າ​ບັນຫາ​ສ້າງ​ມົນ​ລະ​ພິດ​ຢູ່ ສປ ຈີນ ແລ້ວ​ອັດ​ທ້າຍ​ກັບແຜນ​ສ້າງ​ກົດ­ໝາຍ​ວ່າ​ດ້ວຍ​ການ​ຢ່າ​ຮ້າງ​ຢູ່​ປະ­ເທດຝຣັ່ງ.

ທີ່ ສ ເກົາ­ຫຼີ: ໃນ​ທ້າຍ​ໄຕ​ມາດ​ທີ 1 ຂອງ​ປີ 2016 ສານ​ລັດ​ຖະ​ທຳ​ມະ­ນູນ ສ ເກົາ­ຫຼີ ໄດ້​ຕັດ­ສິນ​ສືບ­ຕໍ່ຜົນ​ບັງ­ຄັບ​ໃຊ້​ຢ່າງເຂັ້ມ​ງວດ​ກົດ­ໝາຍ​ວ່າ​ດ້ວຍ​ການລົງ­ໂທດ​ຜູ້​ຄ້າ​ປະ­ເວ­ນີ ລວມ​ທັງ​ຜູ້​ຊື້ ແລະ ຜູ້​ຂາຍ​ ທີ່ຈະ​ຖືກ​ຈຳ​ຄຸກ​ສູງ​ສຸດ 1 ປີ ແລະ ເສຍ​ຄ່າ​ປັບ​ໃໝສູງ​ເຖິງ 3 ລ້ານ​ວອນ (ສະ­ກຸນ​ເງິນ ສ ເກົາ­ຫຼີ ມີມູນ​ຄ່າ​ປະ­ມານ 2.600 ໂດ​ລາ​ສະ­ຫະ­ລັດ) ທີ່​ຕ້ອງເຂັ້ມມາດ​ຕະ­ການ​ລົງ­ໂທດ​ໄວ້​ດັ່ງ​ເດີມ​ກໍ່​ເພາະ​ມີການ​ຟ້ອງ​ຮ້ອງ​ຈາກ​ຍິງ​ຄ້າ​ປະ­ເວ­ນີ​ບາງ​ຄົນ​ວ່າ: ພົນ­ລະ­ເມືອງ​ມີ​ເສລີ­ພາບ​ໃນການ​ເລືອກ​ປະ­ກອບອາ­ຊີບ ພໍ­ໄດ້​ຮັບ​ຄຳ​ຮ້ອງ​ຟ້ອງ​ນີ້ ທາງ​ການ​ກໍ່​ໄດ້ອອກ​ມາ​ຕອບ​ໂຕ້​ຄືນ​ວ່າ: ລັດ­ຖະ­ບານ​ມີ​ສິດ​ປະ­ຕິເສດ​ເສລີ­ພາບ​ສ່ວນ​ບຸກ­ຄົນ​ເຊັ່ນ​ນີ້ ເພື່ອ​ປ້ອງ​ກັນ​ບໍ່ໃຫ້​ມີ​ການ​ຊອກ​ຜົນ​ປະ­ໂຫຍດ​ທີ່​ບໍ່​ຖືກ­ຕ້ອງ ທັງ​ເປັນການ​ປົກ​ປ້ອງ​ສິນລະ​ທຳ​ຂອງ​ສັງ­ຄົມ.

ໃນ​ຄວາມ​ເປັນ​ຈິງ ສ ເກົາ­ຫຼີ ມີ​ກົດ­ໝາຍ​ຫ້າມການ​ຄ້າ​ປະ­ເວ­ນີ​ມາ​ແຕ່​ເຫິງ​ແລ້ວ ແຕ່​ການ​ບັງ­ຄັບໃຊ້​ນັ້ນ​ເຮັດ​ໄດ້​ໜ້ອຍ ຈຶ່ງເກີດ​ມີ​ສະ­ຖານ­ທີ່​ໄຟ​ແສງສີ​ຍິບ­ຍັບ​ເກີດ​ຂຶ້ນ​ຫຼາຍ​ກ່ອນ​ປີ 2004 ພຸ້ນ ການຕັດ­ສິນ​ຂອງ​ສານ​ລັດ​ຖະ​ທຳ​ມະ­ນູນ​ກ່ຽວ​ກັບການສືບ­ຕໍ່​ບັງ­ຄັບ​ໃຊ້​ຢ່າງ​ເຄັ່ງ​ຄັດກົດ­ໝາຍ​ຫ້າມ​ການຄ້າ​ປະ­ເວ­ນີ​ໄດ້​ລະ­ບຸ​ເພີ່ມ​ວ່າ: ການ​ເຮັດ​ໃຫ້­ການ​ຄ້າປະ­ເວ­ນີ​ຖືກ­ຕ້ອງຕາມ​ກົດ­ໝາຍ​ນັ້ນ ຍິ່ງ​ຈະ​ເຮັດ​ໃຫ້ທຸ­ລະ​ກິດ​ດ້ານ​ນີ້​ຂະ­ຫຍາຍ­ຕົວ​ຢ່າງ​ວ່ອງ­ໄວ ເຮັດໃຫ້​ສັງ­ຄົມ​ບໍ່​ມີ​ສະ­ຖຽນ​ລະ​ພາບ ກໍ່ຄືການ​ປະ­ພຶດ​ທີ່ບໍ່​ຖືກ­ຕ້ອງ​ທາງ​ເພດ ກຸ່ມ​ທີ່​ຕ້ານ​ກົດ­ໝາຍ​ນີ້​ບອກວ່າ: ກົດ­ໝາຍ​ຈະ​ເຮັດ​ໃຫ້​ຊີ­ວິດ​ຂອງ​ຍິງ​ຄ້າ​ບໍ​ລິການ​ສ່ຽງໄພ​ຫຼາຍ​ຂຶ້ນ ສ່ວນ​ກຸ່ມ​ທີ່​ເຫັນ​ພ້ອມ​ບອກວ່າ: ກົດ­ໝາຍ​ຈະ​ຊ່ວຍ​ຫຼຸດ­ຜ່ອນ​ການ​ໃຊ້​ຄວາມຮຸນ​ແຮງ ແລະ ການ​ຫຼອກ​ລວງຍິງ​ສາວ.

ທີ່ ສປ ຈີນ: ໜັງ­ສື­ພິມ​ວຽງ​ຈັນ​ທາມ ສະ­ບັບ​ວັນ ທີ 24 ເດືອນ​ເມ­ສາ​ນີ້ ໃຫ້​ຊາບ​ວ່າ: ຄະ­ນະ​ກຳ​ມະການ​ສິ່ງ­ແວ­ດລ້ອມ​ຈີນ​ໄດ້​ພົບ​ວ່າ 248 ບໍ­ລິ­ສັດ​ໄດ້ລະ­ເມີດ​ມາດ­ຕະ­ຖານ​ຄວບ​ຄຸມ​ມົນ​ລະ​ພິດ​ທາງ​ອາກາດ ໃນ​ນັ້ນ ມີ 100 ບໍ­ລິ­ສັດ​ໄດ້​ຖ່າຍ​ເທ​ສິ່ງ​ເສດເຫຼືອ​ທີ່​ເປັນ​ພິດ​ຮ້າຍ​ແຮງ​ຫຼາຍ​ທີ່​ສຸດ ສ່ວນ​ການກວດ­ກາ​ໃນ 28 ຕົວ​ເມືອງ​ທີ່​ນອນ​ຢູ່​ໃນ​ເຂດ​ນະຄອນ​ຫຼວງ​ປັກ​ກິ່ງ ເຂດ​ທຽນ​ຈິນ-ເຮີ​ເປ ກໍ່​ຄືຕົວ ເມືອງ​ໃກ້​ຄຽງ ເຊິ່ງ​ມີ​ທັງ​ໝົດ 396 ບໍ­ລິ­ສັດ​ນັ້ນ ໄດ້ພົບ​ວ່າ 248 ບໍ­ລິ­ສັດ​ໄດ້​ລະ­ເມີດ​ລະ­ບຽບ​ການ​ຄວບຄຸມ​ສິ່ງ­ແວ­ດລ້ອມ.

ທີ່ ​ຝຣັ່ງ: ຫວ່າງ​ບໍ່​ດົນ​ມາ​ນີ້ ລັດ­ຖະ­ບານຝຣັ່ງ ​ໄດ້​ມີ​ແຜນ​ສ້າງ​ກົດ­ໝາຍ​ອະ­ນຸ­ຍາດ​ໃຫ້​ສາ­ມີ-ພັນ​ລະ​ຍາ​ຢ່າ​ຮ້າງ​ກັນ​ດ້ວຍຄວາມ​ຍິນ​ຍອມ​ພ້ອມໃຈ​ຂອງ​ທັງ​ສອງ​ຝ່າຍ ໂດຍ​ບໍ່​ຈຳ­ເປັນ​ມີ​ຄຳ​ສັ່ງຂອງ​ສານ ທັງ​ນີ້ກໍ່​ເພື່ອ​ເຮັດ​ໃຫ້​ຂະ​ບວນ​ການ​ຢ່າຮ້າງງ່າຍ­ດາຍ ແລະ ວ່ອງ­ໄວ​ຂຶ້ນ.

ການ​ລໍ­ຖ້າ​ຄຳ​ສັ່ງ​ຈາກ​ສານ​ນັ້ນ​ ຈະ​ເຮັດ​ໃຫ້​ຄູ່​ຜົວເມຍ​ເສຍ​ເວ­ລາເສຍ​ຄ່າ​ໃຊ້​ຈ່າຍປະ­ມານ 50 ເອີໂຣ (ປະ­ມານ 455.000 ກີບ) ເປັນ​ຄ່າ​ທະ­ບຽນສານ ບໍ່​ນັບ​ການ​ວ່າ​ຈ້າງ​ທະ­ນາຍ­ຄວາມ​ອີກແນວ ໃດ​ກໍ່​ດີທາງ​ສະ­ມາ­ຄົມ​ປົກ​ປ້ອງ​ຄອບ­ຄົວ​ຝຣັ່ງ​ ມີຄຳເຫັນ​ວ່າ: ການ​ເຮັດ​ໃຫ້­ການ​ຢ່າ​ຮ້າງ​ງ່າຍ­ດາຍ ແລະ ວ່ອງ­ໄວ​ຈະ​ສົ່ງ​ຜົນ​ກະ­ທົບ​ຕໍ່​ເດັກ­ນ້ອຍ​ທີ່​ເປັນລູກ.

ຂ່າວທີ່ກ່ຽວຂ້ອງ