ຂ່າວຫຼ້າສຸດ

ເລັ່ງຄຸ້ມຄອງ-ນຳໃຊ້ເຄື່ອງມືບັນທຶກສິນຄ້າ ແລະ ບໍລິການ

238 17 ພ.ພ. 2017 ຂ່າວໜ້າ​ໜຶ່ງ

ວຽກ​ງານ​ການ​ເງິນ ຖື​ເປັນບຸລິມະສິດ​ສຳຄັນ ແລະ ເປັນ​ຕົວຊີ້​ວັດ​ໃນ​ການ​ພັດທະນາ​ເສດ​ຖະກິດ-ສັງຄົມ ເຊິ່ງ​ການ​ເງິນ​ທີ່​ເຂັ້ມແຂງ ປອດ​ໃສ ໄດ້​ກາຍເປັນ​ເປົ້າໝາຍ​ສຳຄັນ​ທີ່​ລັດຖະບານ​ລາວເຮົາ ກຳລັງ​ສຸມ​ໃສ່​ຈັດ​ຕັ້ງ​ປະຕິບັດ​ຢ່າງ​ຕັ້ງໜ້າ ທັງ​ລະດັບ​ສູນກາງ-ທ້ອງຖິ່ນ ຮອງ​ຮັບ​ການ​ຫັນເປັນ​ທັນ​ສະໄໝ​ຂອງ​ຂະແໜງການ​ເງິນ ໂດຍ​ສະເພາະແມ່ນ ວຽກ​ງານ​ການ​ຄຸ້ມ​ຄອງ​ເກັບ​ລາຍຮັບ​ສ່ວຍ​ສາ​ອາກອນ​ເຂົ້າ​ງົບ​ປະມານ​ແຫ່ງ​ລັດ ຕ້ອງ​ບັນລຸ​ໃຫ້​ໄດ້ຕາມ​ເປົ້າ​ໝາຍ​ທີ່​ຂັ້ນ​ເທິງ​ວາງອອກ.

ກົມ​ສວຍ​ສາ​ອາກອນ ກະຊວງການ​ເງິນ ຈັດ​ເຜີຍແຜ່​ຂໍ້​ຕົກລົງວ່າ​ດ້ວຍ​ການ​ຄຸ້ມ​ຄອງ ແລະ ນຳ​ໃຊ້​ເຄື່ອງ​ບັນທຶກ​ການ​ຂາຍສິນຄ້າ ແລະ ບໍລິການ ແລະ ຄຳແນະນຳກ່ຽວ​ກັບ​ການ​ຄຸ້ມ​ຄອງ ແລະ ນຳ​ໃຊ້​ໃບ​ເກັບ​ເງິນ​ສະເພາະ ​ທີ່​ອອກ​ດ້ວຍ​ເຄື່ອງ​ບັນທຶກການ​ຂາຍ​ສິນຄ້າ ແລະ ບໍລິການ ວັນ​ທີ 15 ພຶດສະພາ 2017 ຢູ່​ທີ່ສູນ​ການ​ຮ່ວມ​ມື​ສາກົນ​ລາວ-ຍີ່ປຸ່ນ (ICTC) ເຊິ່ງ​ມີ​ທ່ານ ພູ​ທະນູເພັດ ໄຊ​ສົມບັດ ຫົວໜ້າ​ກົມ​ສ່ວຍສາ​ອາກອນ ພ້ອມ​ດ້ວຍ​ຜູ້​ຕາງໜ້າ​ຈາກ​ຫົວໜ່ວຍ​ທຸລະ​ກິດ ຜູ້​ປະກອບ​ການ​ທີ່​ຂຶ້ນ​ກັບການ​ຄຸ້ມ​ຂອງຂອງ​ກົມ​ສ່ວນ​ສາ​ອາກອນ​ກວ່າ 250 ພື້ນຖານ​ເຂົ້າ​ຮ່ວມ.

ການ​ເຜີຍແຜ່​ຂໍ້​ຕົກລົງ 2 ສະບັບ​ຂອງ​ກະຊວງ​ການ​ເງິນ​ຄື: ຂໍ້ຕົກລົງ​ຂອງ​ລັດຖະມົນຕີກະຊວງການ​ເງິນ ວ່າ​ດ້ວຍ​ການ​ຄຸ້ມ​ຄອງ ແລະ ນຳ​ໃຊ້​ເຄື່ອງ​ບັນທຶກ​ການຂາຍ​ສິນຄ້າ ແລະ ບໍລິການ ແລະ ຄຳ​ແນະນຳ​ຂອງລັດຖະມົນຕີ​ກະຊວງ​ການ​ເງິນ ເລກ​ທີ 1178/​ກງ ລົງ​ວັນ​ທີ 20/04/2017 ວ່າ​ດ້ວຍການ​ຄຸ້ມ​ຄອງ ແລະ ນຳ​ໃຊ້ໃບເກັບ​ເງິນ​ສະເພາະ​ທີ່​ອອກ​ດ້ວຍເຄື່ອງ​ບັນທຶກ​ການ​ຂາຍ​ສິນຄ້າ ແລະ ບໍລິການ ມີ​ເປົ້າ​ໝາຍ​ສຳຄັນ ເພື່ອ​ສ້າງ​ໃຫ້​ຜູ້​ປະກອບ​ການກຳ​ໄດ້​ລະບຽບ​ກົດໝາຍ ແລະ ພ້ອມ​ກັນ​ຈັດ​ຕັ້ງ​ປະຕິບັດ​ຢ່າງ​ເຂັ້ມງວດ ເຊິ່ງ​ເນື້ອ​ໃນ​ຂອງຂໍ້​ຕົກລົງດັ່ງກ່າວ ໄດ້​ກຳນົດ​ຫຼັກການ​ລະບຽບ​ການ ລວມ​ທັງ​ກົນ​ໄກ​ໃນການຈັດຕັ້ງ​ປະຕິບັດ​ວຽກ​ງານຄຸ້ມ​ຄອງ ການ​ນຳ​ໃຊ້​ໂປຣ​ແກຣມບັນຊີ ເຄື່ອງ​ບັນທຶກ​ຢູ່​ຈຸດ​ຂາຍເຄື່ອງ​ບັນທຶກ​ເງິນສົດ ແລະ ເຄື່ອງຈັກ​ອື່ນໆ ເຂົ້າ​ໃນ​ການ​ອອກ​ໃບເກັບ​ເງິນ​ຈາກ​ການ​ຂາຍ​ສິນຄ້າ ແລະ ບໍລິການ​ສຳລັບ​ເນື້ອ​ໃນຂອງ​ຄຳ​ແນະນຳ ແມ່ນ​ໄດ້​ອະທິບາຍຮູບ​ແບບ​ໃບ​ເກັບ​ເງິນ​ມູນຄ່າ​ເພີ່ມ​ແບບ​ລະອຽດ ແລະ ແບບຫຍໍ້ ພ້ອມ​ກັບ​ແນະນຳກ່ຽວ​ກັບຂັ້ນ​ຕອນ​ໃນ​ການ​ປະກອບ​ເອກະສານ ເພື່ອ​ຂໍ​ສະເໜີ​ຂໍ​ໃບ​ອະນຸຍາດ​ຮັບຮອງ​ມາດຕະຖານ​ໂປຣແກຣມ​ໃບ​ເກັບ​ເງິນ ເຄື່ອງ​ບັນທຶກຢູ່​ຈຸດ​ຂາຍ ແລະ ເຄື່ອງ​ບັນທຶກເງິນສົດ​ເປັນຕົ້ນ.

ຂ່າວທີ່ກ່ຽວຂ້ອງ