ຂ່າວຫຼ້າສຸດ

ປັບປຸງລັດຖະບັນຍັດ 03 ເພື່ອການພັດທະນາທີ່ສອດຄ່ອງ

312 17 ພ.ພ. 2017 ຂ່າວໜ້າ​ໜຶ່ງ

ລັດ​ຖະ​ບັນຍັດ​ຂອງ​ປະທານປະເທດ 03/​ປປທ ວ່າ​ດ້ວຍ​ຄ່າທຳນຽມ ແລະ ຄ່າ​ບໍລິການ ໄດ້ປະກາດ​ນຳ​ໃຊ້​ແຕ່​ປີ 2012 ເປັນຕົ້ນ​ມາ ຜ່ານ​ການຈັດຕັ້ງ​ລັດ​ຖະບັນຍັດ​ສະບັບ​ນີ້ ເຫັນ​ວ່າ​ເກີດ​ຜົນປະໂຫຍດ​ອັນ​ໃຫຍ່​ຫຼວງ​ຕໍ່​ຂະແໜງ​ການ​ເງິນ ກໍ່​ຄືວຽກ​ງານການ​ເກັບ​ຄ່າ​ທຳນຽມ ແລະ ຄ່າ​ບໍລິ​ການ​ຕ່າງໆ ແຕ່​ໃນ​ຍຸກ​ການຂະຫຍາຍຕົວ​ທາງ​ດ້ານ​ເສດ​ຖະກິດທີ່​ມີ​ການ​ແຂ່ງຂັນ​ສູງ ຮຽກຮ້ອງ​ໃຫ້​ລັດ​ຖະ​ບັນຍັດ​ສະບັບ​ນີ້ ຕ້ອງ​ມີ​ການ​ປັບປຸງ​ແກ້​ໄຂ​ໃຫ້​ມີຄວາມ​ສອດຄ່ອງ​ກັບ​ການ​ຂະຫຍາຍ​ຕົວ​ຂອງ​ເສດຖະກິດ​ພາຍໃນ ແລະ ພາກ​ພື້ນ ເປັນຕົ້ນ​ແມ່ນ ໃນ​ທ່າມກາງ​ສະພາບ ແລະ ເງື່ອນໄຂ​ຂອງ​ໄລຍະ​ການ​ຂຸ້ນຂ້ຽວຈັດ​ຕັ້ງ​ປະຕິບັດ​ແຜນ​ພັດທະນາເສດຖະກິດ-ສັງຄົມ 5 ປີ ຄັ້ງ​ທີ VIII ແລະ ແຜນ​ງົບປະມານ​ແຫ່ງລັດ ປີ 2017 ຂອງ​ພັກ-ລັດ​ຖະບານ​ເຮົາ.

ກະຊວງ​ການ​ເງິນ ໃນ​ນາມເປັນ​ໜ່ວຍ​ງານ​ຫຼັກການ​ປັບປຸງດັດແກ້​ລັດ​ຖະ​ບັນຍັດ 03 ໄດ້​ຈັດສຳ​ມະ​ນາກ່ຽວ​ກັບ​ການ​ປັບປຸງລັດ​ຖະ​ບັນຍັດ 03/​ປປທ ວັນ​ທີ 16 ພຶດສະພາ 2017 ຢູ່​ທີ່ສູນ​ການຮ່ວມ​ມື​ສາກົນ ລາວ-ຍີ່ປຸ່ນ (ICTC) ເປັນ​ປະທານ​ໂດຍ​ທ່ານ ສົມ​ດີ ດວງ​ດີ ຮອງ​ນາຍົກ​ລັດ​ຖະມົນຕີ ລັດຖະມົນຕີ​ກະຊວງ​ການເງິນ ມີ​ບັນດາ​ລັດຖະມົນຕີ ຫົວໜ້າ​ກົມສະ​ຖາ​ບັນ​ການ​ເງິນ​ທີ່ກ່ຽວຂ້ອງ​ເຂົ້າ​ຮ່ວມ.

ສຳ​ມະ​ນາ​ຄັ້ງ​ນີ້ ຜູ້​ເຂົ້າ​ຮ່ວມໄດ້​ພ້ອມ​ກັນ​ປຶກສາ​ຫາລືກ່ຽວ​ກັບການ​ປັບປຸງ​ລັດ​ຖະ​ບັນຍັດ 03 ທີ່ກ່ຽວ​ພັນຂອງ​ບັນດາ​ຂະແໜງການ​ຕ່າງໆ ໃຫ້​ມີ​ຄວາມ​ຖືກຕ້ອງສອດຄ່ອງ ແລະ ເປັນ​ເອກະ​ພາບກັນ​ໃນ​ຂອບ​ເຂດ​ທົ່ວ​ປະເທດ ເນື່ອງ​ຈາກ​ຜ່ານ​ມາ ຍັງ​ມີ​ບາງລາຍການ​ອັດຕາ​ການ​ເກັບ​ຕ່ຳ ບໍ່ສອດຄ່ອງ​ກັບ​ສະພາບ​ການ​ຂະຫຍາຍ​ຕົວ​ຂອງ​ເສດຖະກິດ​ປັດ​ຈຸບັນ ມີ​ບາງ​ລາຍການ​ເກັບ​ສູງ ການ​ເກັບ​ຂອງ​ຫຼາຍ​ທ້ອງຖິ່ນ​ບໍ່​ຄືກັນ ບໍ່​ເປັນ​ເອກະ​ພາບ ແລະ ຍິ່ງໄປ​ກວ່າ​ນັ້ນ ຍັງ​ມີ​ບາງ​ຂະແໜງການ​ເກັບ​ຕາມ​ລະບຽບ​ການ​ທີ່​ຕົນ​ເອງ​ກຳນົດ​ຂຶ້ນ​ເອງ ການ​ເກັບ​ຍັງບໍ່​ທົ່ວ​ເຖິງ ແລະ ການ​ທີ່​ເກັບ​ໄດ້ແລ້ວນຳໄປ​ໃຊ້​ຈ່າຍໂດຍ​ບໍ່​ຜ່ານງົບປະມານ ເຊິ່ງ​ນັ້ນ​ມັນ​ໄດ້​ສ້າງຄວາມ​ເສຍ​ຫາຍ​ໃຫຍ່​ຫຼວງ​ແກ່​ຂະແໜງການ​ເງິນ.

ລັດ​ຖະ​ບັນຍັດ 03/​ປປທ ໄດ້ກຳນົດ​ຫຼັກການ ລະບຽບ​ການ ມາດ​ຕະການ ກ່ຽວ​ກັບ​ການ​ກຳນົດ​ເອົາ​ອັດຕາ​ຄ່າ​ທຳນຽມ ແລະ ຄ່າ​ບໍລິການ​ວິຊາ​ການ​ຂະແໜງການ​ລັດ ເພື່ອ​ຄຸ້ມ​ຄອງ​ລາຍ​ຮັບຄ່າ​ທຳນຽມ ແລະ ຄ່າ​ບໍລິການຢ່າງ​ລວມ​ສູນ ແລະ ຈັດ​ຕັ້ງ​ປະຕິບັດ​ຢ່າງ​ເປັນ​ເອກະ​ພາບ​ໃນ​ຂອບເຂດ​ທົ່ວ​ປະເທດ ແນໃສ່​ຮັບປະກັນໃຫ້​ລາຍ​ຮັບ​ຄ່າ​ທຳນຽມ ແລະ ຄ່າ​ບໍລິການ ໄດ້​ມອບ​ເຂົ້າ​ຄັງ​ເງິນແຫ່ງ​ຊາດ​ຢ່າງ​ຄົບ​ຖ້ວນຕາມ​ກຳນົດ​ເວລາ ປະກອບສ່ວນ​ເຂົ້າ​ໃນການ​ປະຕິບັດ​ແຜນ​ພັດທະນາ​ເສດຖະ​ກິດ-ສັງຄົມ ແລະ ງົບປະມານແຫ່ງ​ລັດ ໃຫ້​ບັນລຸ​ຄາດໝາຍ​ທີ່ກຳນົດ​ໄວ້.

ຂ່າວທີ່ກ່ຽວຂ້ອງ