IMF ສືບຕໍ່ໃຫ້ການປັບປຸງວຽກງານໄອທີ

258 19 ພ.ພ. 2017 ຂ່າວໜ້າ​ໜຶ່ງ

ວັນ​ທີ 16 ພຶດສະພາ 2017 ທີ່​ກະຊວງ​ການ​ເງິນ ທ່ານ ສົມ​ດີ ດວງ​ດີ ຮອງ​ນາຍົກລັດຖະມົນຕີ ລັດຖະມົນຕີ​ກະຊວງ​ການ​ເງິນ ​ໃຫ້ກຽດ​ຕ້ອນຮັບ​ການ​ເຂົ້າ​ຢ້ຽມ​ຄຳນັບ​ຂອງ​ທ່ານ ແຈຟ​ເຟຣ ແບນນິສ໌ເຕີ ຫົວໜ້າ​ຄະນະ​ວິຊາ​ການອົງການ​ກອງ​ທຶນ​ສາກົນ (IMF) ພ້ອມ​ດ້ວຍ​ຄະນະ​ ເນື່ອງ​ໃນ​ໂອກາດ​ເດີນທາງ​ມາ​ຢ້ຽມຢາມ ແລະ ລາຍ​ງານ​ການ​ມາ​ຕິດຕາມ​ເສດຖະ​ກິດ​ມະຫາ​ພາກ​ຂອງ ​ສປປ ລາວ.

ທ່ານ​ຫົວໜ້າ​ຄະນະ​ວິຊາ​ການ IMF ໄດ້​ລາຍ​ງານ​ການ​ເດີນທາງມາ​ຢ້ຽມຢາມ​ລາວ​ຄັ້ງ​ນີ້ ​ເພື່ອ​ລາຍງານ​ກ່ຽວ​ກັບ​ຜົນ​ການ​ມາ​ເຮັດວຽກ​ຂອງ​ຄະນະ​ວິຊາ​ການ IMF ແລະ ການເຄື່ອນໄຫວ​ຕິດຕາມເສດຖະກິດ​ມະຫາ​ພາກ​ຂອງ​ລາວ ເຊິ່ງ​ຄະນະ​ໄດ້​ເຮັດ​ວຽກ​ຮ່ວມ​ກັບຫຼາຍ​ພາກສ່ວນ​ທັງ​ພາກ​ລັດ ພາກ​ເອກະ​ຊົນ ອົງ​ການຈັດຕັ້ງສາກົນ​ປະຈຳ​ລາວ ໂດຍ​ສະເພາະ ພາກສ່ວນ​ທີ່​ກ່ຽວຂ້ອງ​ກັບ​ກະຊວງ​ການ​ເງິນ ເຊັ່ນ: ຄະນະ​ວິຊາການ​ກະຊວງ​ການ​ເງິນ ​ໄດ້​ຈັດກອງ​ປະຊຸມ​ປຶກສາ​ຫາລື​ພາຍ​ໃນ ກ່ອນ​ການ​ເຮັດ​ວຽກ​ຮ່ວມ​ກັບ​ຄະນະ​ວິຊາ​ການ IMF ເພື່ອ​ເປັນເອກະ​ພາບ​ກັນ​ດ້ານ​ການ​ກະກຽມຂໍ້​ມູນ ແລະ ເນື້ອ​ໃນ​ຕາມ​ຄຳ​ຖາມເຈາະ​ຈີ້ມ​ຕ່າງໆ ການຈັດຕັ້ງ​ປະຕິ​ບັດ​ງົບປະມານ ສົກ​ປີ 2015-2016 ແລະ ແຜນ​ສຳລັບ​ປີ 2017 ຂໍ້​ມູນ​ທາງ​ດ້ານ​ໜີ້​ສິນ ແລະ ອື່ນໆ ໄດ້​ປະ​ເມີນ​ສະພາບ​ເສດຖະກິດ​ມະຫາ​ພາກ​ຂອງ​ລາວ ປະ​ເມີນ​ການວາງ​ນະໂຍບາຍ​ການ​ເງິນ ສະຫຼຸບໄດ້​ໂດຍ​ສັງເຂບ​ຄື: ການ​ເຕີບ​ໂຕທາງ​ດ້ານ​ເສດຖະກິດ ໃນ​ປີ 2016 ແມ່ນ 7% ສູງ​ກວ່າ​ທີ່​ໄດ້​ຄາດຄະເນ​ໄວ້ ເຊິ່ງ​ປັດ​ໄຈ​ທີ່​ໄດ້​ຊຸກຍູ້ໃຫ້​ເກີດ​ແກ່​ການ​ເຕີບ​ໂຕ​ມາ​ຈາກຂະແໜງ​ພະລັງງານ​ໄຟຟ້າ​ຖ່ານຫີນ​ຫົງ​ສາ ໂຄງການ​ພະລັງງານໄຟຟ້າ​ນ້ຳຕົກ ໂຄງການ​ກໍ່ສ້າງທີ່​ຕິດ​ພັນ​ກັບ​ການ​ຂະຫຍາຍ​ການລົງທຶນ ຂະແໜງການ​ບໍລິການ ການ​ເຕີບ​ໂຕ​ທາງ​ດ້ານ​ເສດຖະກິດ ໃນ​ປີ 2017 ການ​ເພີ່ມ​ເງິນເດືອນຂອງ​ພະນັກງານ-ລັດຖະກອນ ໂຄງການ​ກໍ່ສ້າງ​ທາງ​ລົດໄຟ​ລາວ-ຈີນ ອັດຕາ​ເງິນ​ເຟີ້​ບໍ່​ມີ​ການເໜັງ​ຕີງ​ຍັງ​ຢູ່​ໃນ​ລະດັບ 1,5% ການ​ເຕີບ​ໂຕ​ໄລຍະ​ກາງ​ຍັງ​ສືບຕໍ່​ຢູ່​ເກນ​ປົກກະຕິ ລະຫວ່າງ​ປີ 2019-2022 ຈະ​ຄ່ອຍ​ຂະຫຍາຍຕົວດີ​ຂຶ້ນ​ຈາກ​ບັນດາ​ໂຄງການ​ພະລັງງານ​ໄຟຟ້າ​ຂະໜາດ​ໃຫຍ່ ແລະ ໂຄງການ​ສ້າງ​ທາງ​ລົດໄຟ ລາວ-ຈີນ ບັນຊີ​ດຸນ​ການ​ຊຳລະ​ເງິນ ເຫັນ​ໄດ້​ວ່າຫຼຸດ​ລົງ​ເຫຼືອ 11% ຕໍ່ GDP ໃນ​ປີ 2016.

ຫົວໜ້າ​ຄະນະ​ວິຊາ​ການ IMF ລາຍ​ງານ​ຕື່ມ​ອີ​ກວ່າ: ເຖິງ​ຢ່າງໃດ​ກໍ່​ຕາມ ​ຖ້າ​ເບິ່ງ​ໃນ​ບັນຊີ​ປົກກະຕິ​ໃນ​ໝວດ​ທີ່​ບໍ່​ແມ່ນ​ຊັບ​ພະຍາກອນ​ຍັງ​ສູງ​ຫຼາຍ ຢູ່​ໃນ​ລະດັບ 8% ຕໍ່ GDP ໃນ​ຂະນະ​ທີ່​ຄັງ​ສຳຮອງ​ເງິນຕາ​ຕ່າງປະເທດ​ຫຼຸດ​ລົງ ໃນ​ລະ​ຫວ່າງ 170-815 ລ້ານ​ໂດລາ​ສະຫະລັດ ນະໂຍບາຍ​ດ້ານການ​ເງິນ​ແມ່ນ​ຂາດ​ດຸນ​ງົບ​ປະມານ ໃນ​ປີ 2015-2016 ສູງຕາມ​ທີ່​ໄດ້​ຄາດ​ຄະເນ​ໄວ້​ເທົ່າ​ກັບ 5,2% ຕໍ່ GDP ໃນ 3 ເດືອນ ຂ້າມ​ຜ່ານ​ຂອງສົກ​ປີ 2016 ຕົວເລກ​ລາຍ​ຮັບ​ປະຕິບັດ​ໄດ້​ເກີນແຜນ​ ຈາກ​ທີ່​ໄດ້​ມີ​ການ​ຫຼຸດ​ການຍົກເວັ້ນ​ການ​ກຳນົດ​ນຳ​ເຂົ້າ​ນ້ຳມັນ​ເຊື້ອ​ໄຟ ແລະ ການ​ປັບປຸງຂອດ​ການ​ບໍລິຫານ​ການ​ຍົກເວັ້ນອັດຕາ​ພາສີ​ນຳ​ເຂົ້າ​ລົດ ອີກ​ດ້ານໜຶ່ງ​ກໍ່​ມີ​ລາຍ​ຮັບ​ເພີ່ມ​ຈາກ​ການຂາຍ​ຊັບ​ສິນ​ຂອງ​ລັດ ການ​ຄາດຄະເນ​ການ​ເກັບ​ລາຍ​ຮັບປີ 2017 ເຫັນ​ວ່າ​ຍັງ​ມີ​ຄວາມ​ທ້າ​ທາຍ​ພໍສົມຄວນ ການ​ຂາດ​ດຸນ​ງົບ​ປະມານ​ຄາດ​ວ່າ​ຍັງ​ຢູ່​ໃນ​ລະດັບ​ດຽວກັນ​ກັບປີ 2016 ສຳລັບ​ການຄາດ​ຄະເນ​ຂາດ​ດຸນ​ງົບປະມານ ນັບ​ແຕ່​ປີ 2018-2020 ເຫັນວ່າ​ຍັງ​ສືບຕໍ່ຢູ່​ໃນ​ລະດັບ 5% ຕໍ່ GDP ເຖິງ​ແມ່ນ​ວ່າ​ລັດຖະບານຈະ​ວາງ​ເປົ້າ​ໝາຍ​ຫຼຸດ​ການ​ຂາດດຸນ​ງົບປະມານໃຫ້​ຫຼຸດ​ລົງ​ເຫຼືອ 3% ຕໍ່ GDP ພາຍ​ໃນ​ປີ 2020 ແຕ່​ການ​ບັນລຸ​ເປົ້າ​ໝາຍ​ທີ່​ວາງ​ໄວ້​ນັ້ນ ​ຕ້ອງ​ໄດ້​ພະຍາຍາມ​ປະຕິ​ຮູບໃຫ້​ສອດຄ່ອງ ແລະ ໃນ​ດ້ານລາຍ​ຮັບ​ພາສີ-ອາກອນ ຄະນະ​ວິຊາ​ການ IMF ຍິນ​ດີ​ສືບຕໍ່​ໃນການ​ປັບປຸງ​ລະບົບ​ໄອ​ທີ​ໃນ​ວຽກງານ​ສາມ​ສາຍ​ຕັ້ງ ແລະ ສືບຕໍ່ປະຕິ​ຮູບ​ວຽກ​ບໍລິຫານ​ຄຸ້ມ​ຄອງ ແລະ ນະໂຍບາຍ​ພາສີ​ອາກອນ.

ໂອກາດ​ນີ້ ທ່ານ​ຮອງ​ນາຍົກ​ໄດ້ໃຫ້ການ​ຕ້ອນຮັບ ແລະ ສະແດງຄວາມ​ຍິນ​ດີ​ຕໍ່​ຫົວໜ້າ​ຄະນະ​ວິຊາການ IMF ທີ່​ໄດ້​ເຫັນ​ເຖິງ​ຄວາມສຳຄັນ​ຂອງ​ລັດຖະບານ​ລາວ ​ໃນການ​ປັບປຸງ​ການ​ວາງ​ນະໂຍບາຍການ​ເງິນ​ແບບ​ຮັດກຸມ​ຂອງ​ຂະແໜງ​ການ​ເງິນ​ທີ່​ສຳຄັນ ເພື່ອການ​ພັດທະນາ​ພື້ນຖານ​ໂຄງ​ລ່າງ​ຂອງ​ເສດຖະກິດ-ສັງຄົມ ໃຫ້​ມີການ​ເຕີບ​ໂຕ​ແບບ​ຍືນ​ຍົງ ແລະ ມີ​ຄວາມ​ໜັ້ນ​ທ່ຽງ​ທາງ​ດ້ານ​ເສດຖະ​ກິດ ​ຈົນ​ກ້າວ​ໄປ​ສູ່​ຄວາມ​ທັນ​ສະໄໝ ແລະ ສອດຄ່ອງ​ກັບ​ຄວາມເປັນ​ຈິງ​ຂອງ​ສັງຄົມ.

ຂ່າວທີ່ກ່ຽວຂ້ອງ