ທະ­ຫານ​ຂອງ​ອາ​ຟະ​ກາ​ນິດ​ສະ­ຖານ​ຜູ້​ໜຶ່ງ ລັ່ນ​ປືນ​ສັງ­ຫານ​ທະ­ຫານ ສ. ອາ​ເມ​ຣິ​ກາ

222 13 ມິ.ນ. 2017 ຂ່າວຕ່າງປະເທດ
ທະ­ຫານ​ຂອງ​ອາ​ຟະ​ກາ​ນິດ​ສະ­ຖານ​ຜູ້​ໜຶ່ງ ລັ່ນ​ປືນ​ສັງ­ຫານ​ທະ­ຫານ ສ. ອາ​ເມ​ຣິ​ກາ

ຂ່າວ­ສານ AP ລາຍ​ງານ​ວ່າ ທຳ​ນຽບ​ຫ້າ​ແຈ (ກະ­ຊວງ​ປ້ອງ​ກັນ​ປະ­ເທດ ສ.ອາ​ເມ​ຣິ​ກາ) ແຈ້ງ​ໃຫ້ຮູ້­ເມື່ອ​ວັນ​ທີ 10 ມິ­ຖຸ­ນາ​ນີ້ ວ່າ ທະ­ຫານ​ຂອງ ສ.ອາເມ​ຣິ​ກາ ​ເສຍ​ຊີ­ວິດ 3 ຄົນ ແລະ ບາດ­ເຈັບ 1 ຄົນ ຈາກ​ເຫດ­ການ​ໂຈມ​ຕີ​ທີ່​ເກີດ​ຂຶ້ນ​ຢູ່​ໃນ​ເມືອງ​ອາຈິນ​ ແຂວງ​ນັນ​ກາ​ຮາ (ພາກ​ຕາ­ເວັນ​ອອກ​ອາ​ຟະ​ການິດ​ສະ­ຖານ).

ກ່ອນ​ໜ້າ​ນັ້ນ ເຈົ້າ​ໜ້າ­ທີ່​ອາ​ຟະ​ກາ​ນິດ​ສະຖານ​ຜູ້​ໜຶ່ງ​ເວົ້າ​ວ່າ ພົນ­ທະ­ຫານ​ຂອງ​ອາ​ຟະ​ກາ​ນິດ​ສະ­ຖານ​ຜູ້​ໜຶ່ງ​ ໄດ້​ລັ່ນ​ປືນ​ສັງ­ຫານ​ທະ­ຫານ ສ.ອາເມ​ຣິ​ກາ ​ທັງ​ສາມ​ຄົນ​ດັ່ງ­ກ່າວ ໃນ​ຂະ­ນະ​ທີ່​ຜູ້​ກໍ່ເຫດ​ກໍ​ຖືກ​ກຳ­ຈັດ​ໃນ​ເວ­ລາ​ຕໍ່​ມາ.

ນີ້​ບໍ່​ແມ່ນ​ການ​ໂຈມ​ຕີ​ເທື່ອ​ທຳ​ອິດທີ່​ມຸ່ງ​ເປົ້າໃສ່​ກອງ​ກຳ­ລັງ​ຂອງ ສ.ອາ​ເມ​ຣິ​ກາ ​ຢູ່​ໃນ​ອາ​ຟະ​ການິດ​ສະ­ຖານ ເມື່ອ​ເດືອນ​ມີ­ນາ​ທີ່​ຜ່ານ​ມາ ພົນ​ທະຫານ​ຂອງ​ອາ​ຟະ​ກາ​ນິດ​ສະ­ຖານ​ຜູ້​ໜຶ່ງ ໄດ້​ລັ່ນ​ປືນ ເຮັດ​ໃຫ້​ທະ­ຫານ ສ. ອາ​ເມ​ຣິ​ກາ ໄດ້​ຮັບ​ບາດ­ເຈັບ 3 ຄົນ ​ຢູ່​ໃນ​ຖານ​ທັບ​ແຫ່ງ​ໜຶ່ງ​ ໃນ​ແຂວງ​ເຮລ​ມານ ກ່ອນ​ໜ້າ​ນັ້ນ ໃນ​ເດືອນ​ຕຸ­ລາ ປີ 2016 ຊາວ​ອາ​ຟະກາ​ນິດ​ສະ­ຖານ​ຜູ້ໜຶ່ງ ​ທີ່​ສວມ​ຊຸດ​ທະ­ຫານ ໄດ້​ລັ່ນປືນ​ເຮັດ​ໃຫ້​ທະ­ຫານ ສ.ອາ​ເມ​ຣິ​ກາ​ຜູ້​ໜຶ່ງ ແລະ ຜູ້​ຮັບ​ເໝົາ​ຜູ້​ໜຶ່ງ​ເສຍ​ຊີ­ວິດ ​ຢູ່​ໃນ​ຖານ​ທັບແຫ່ງໜຶ່ງ​ໃນ​ນະ­ຄອນ­ຫຼວງ​ກາ​ບູນ ໂດຍ​ຜູ້​ກໍ່​ເຫດ​ໄດ້ຖືກ​ກຳ­ຈັດ​ໃນ​ເວ­ລາ​ຕໍ່​ມາ.

ໃນ​ອີກ​ເຫດ­ການ​ໜຶ່ງ ມີ​ເຈົ້າ​ໜ້າ­ທີ່​ຕຳ­ຫຼວດຂອງ​ອາ​ຟະ​ກາ​ນິດ​ສະ­ຖານ​ເສຍ​ຊີ­ວິດ 3 ຄົນ ແລະ ບາດ­ເຈັບ 2 ຄົນ ຈາກ​ເຫດ­ການ​ໂຈມ​ຕີ​ທາງ​ອາກາດ ໂດຍ​ເຮືອ­ບິນ​ຂອງ​ກອງ­ທັບ ສ.ອາ​ເມ​ຣິ​ກາ ທີ່​ເຂົ້າ​ຮ່ວມ​ຕໍ່­ຕ້ານ​ກຸ່ມ​ມື​ປືນຢູ່​ໃນ​ແຂວງ​ເຮລ​ມານ (ພາກ​ໃຕ້​ອາ​ຟະ​ກາ​ນິດ​ສະ­ຖານ).

ເຈົ້າ​ໜ້າ­ທີ່​ອາ​ຟະກາ​ນິດ​ສະ­ຖານ ແລະ ກອງ​ກຳ­ລັງ​ຂອງ ສ.ອາ​ເມຣິ​ກາ ຕ່າງ​ກໍ​ຢັ້ງ­ຢືນ​ຂໍ້​ມູນ​ນີ້ ເມື່ອ​ວັນ​ທີ 10 ມິ­ຖຸ­ນາ.

ພົນ­ທະ­ຫານ​ຕ່າງ­ປະ­ເທດ​ສ່ວນ​ຫຼາຍ ໄດ້​ຖອນອອກ​ໄປ​ຈາກ​ອາ​ຟະ​ກາ​ນິດ​ສະ­ຖານ ​ພາຍ​ໃນ​ທ້າຍ​ປີ 2014 ຫຼັງ​ຈາກ 13 ປີ​ທີ່​ໄດ້​ໂຄ່ນ​ລົ້ມ​ກຸ່ມ​ຕາ​ລີ​ບັນຢູ່​ທີ່​ນັ້ນ ເຖິງ​ຢ່າງ­ໃດ​ກໍ​ຕາມ ປັດ­ຈຸ­ບັນ​ນີ້​ມີ​ພົນ​ທະຫານ​ຂອງ​ອົງ­ການ​ສົນ­ທິ­ສັນ­ຍາ​ປ້ອງ​ກັນ​ອັດ​ລັງຕິກ​ເໜືອ (NATO) ຈຳ­ນວນ​ປະ­ມານ 13.000 ຄົນ ຍັງ​ຢູ່ໃນ​ອາ​ຟະ​ກາ​ນິດ​ສະ­ຖານ​ ເພື່ອ​ເຮັດ​ໜ້າ­ທີ່​ເປັນ​ທີ່​ປຶກ­ສາ ແລະ ຝຶກ​ຊ້ອມ​ຊ່ວຍ­ເຫຼືອ​ກອງ​ກຳ­ລັງຂອງ​ອາ​ຟະ​ກາ​ນິດ​ສະ­ຖານ ຕໍ່­ສູ້​ກຸ່ມ​ຕາ​ລີ​ບັນ​ທີ່ລຸກ​ຮື​ຂຶ້ນ.

ຂ່າວທີ່ກ່ຽວຂ້ອງ