ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ມຽນ​ມາ ສິງ­ກະ­ໂປ ຫວຽດ­ນາມ

662 14 ມິ.ນ. 2017 ຫົວຂໍ້ຂ່າວອື່ນໆ

ມື້­ນີ້​ມີ​ບັນ­ຫາ​ຕະ​ປິດ​ຕະ​ປີ່​ຫຼາຍ​ເລື່ອງ​ມາ​ເລົ່າ​ສູ່ກັນ​ຟັງ​ໄວ້​ເປັນ​ບົດ­ຮຽນ ເຊັ່ນ: ການ​ຂຶ້ນ​ລາ­ຄາ​ໄຟ­ຟ້າຢູ່​ມຽນ​ມາ ນະ­ໂຍ­ບາຍຕໍ່​ຜູ້​ເປັນ​ພໍ່​ໃນ​ສິງ­ກະ­ໂປ ແລະ ບາງ​ເນື້ອ​ໃນ​ຂອງ​ກົດ­ໝາຍ​ວ່າ​ດ້ວຍ​ການ​ຖື­ພາແທນ​ຢູ່​ຫວຽດ­ນາມ.

ທີ່ ມຽນ​ມາ: ຂ່າວ​ຕ່າງ­ປະ­ເທດ ໃນ​ວັນ​ທີ 10 ເດືອນ​ມິ­ຖຸ­ນາ​ນີ້ (Vientiane Times) ໄດ້​ເວົ້າ​ເຖິງຄວາມ​ຈຳ­ເປັນ​ໃນ​ການຂຶ້ນ​ລາ­ຄາ​ຄ່າ​ຊົມ­ໃຊ້​ໄຟ­ຟ້າ ຍ້ອນ​ວ່າ​ຜ່ານ​ມາ ​ລັດ​ບໍ່​ສາ­ມາດ​ຈະ​ສືບ­ຕໍ່ແບກ​ຫາບ​ງົບ­ປະ­ມານ​ການ​ໃຊ້​ຈ່າຍ​ໃນ​ຈຳ­ນວນ​ມະຫາ​ສານ​ນີ້​ໄດ້​ພຽງ​ລຳ­ພັງ ທ່ານ ເປ ຊິນ ມອງ (Pe Zin Maung) ລັດ­ຖະ­ມົນ­ຕີ​ການ​ໄຟ­ຟ້າ ແລະ ພະ­ລັງງານ​ ​ໄດ້​ກ່າວກ່ຽວ​ກັບ​ບັນ­ຫາ​ນີ້ ໃນ​ວັນ​ທີ 7 ເດືອນ​ນີ້​ວ່າ ພາກ­ສ່ວນ​ເອ­ກະ​ຊົນ​ໄດ້​ເຂົ້າ​ມາ​ມີ​ສ່ວນຮ່ວມ​ໃນ​ການ​ຜະ­ລິດ​ພະ­ລັງ­ງານ​ໄຟ­ຟ້ານັບ​ແຕ່​ປີ 2008 ເປັນ­ຕົ້ນ​ມາ ໃນ​ປັດ­ຈຸ­ບັນ ການ​ຜະ­ລິດ​ພະ­ລັງງານ​ໄຟ­ຟ້າ​ຂອງ​ລັດ ແລະ ພາກ­ສ່ວນ​ເອ­ກະ​ຊົນ​ນັ້ນ ມີ​ປະ­ລິ­ມານ​ເກືອບ​ເທົ່າໆ​ກັນ ເມື່ອ​ຊັດ​ສ່ວນ​ການ​ຜະລິດ​ໄຟ­ຟ້າ​ຂອງ​ພາກ­ສ່ວນ​ເອ­ກະ​ຊົນ​ເພີ່ມ​ຂຶ້ນ ລັດ​ຖະບານ​ກໍ່​ຕ້ອງ​ໄດ້​ແບກຫາບ​ການ​ໃຊ້​ຈ່າຍ​ຫຼາຍ​ຂຶ້ນ ເພາະ​ຕ້ອງ​ໄດ້​ຮັບ­ຜິດ­ຊອບທັງ​ຊື້​ໄຟ­ຟ້າ​ຈາກ​ເອ­ກະຊົນ ແລະ ທັງ​ຕ້ອງ​ໄດ້​ເຮັດ​ບົດ­ບາດ​ກະ­ຈາຍ​ກະ­ແສໄຟ­ຟ້າ​ສູ່​ສັງ­ຄົມ ຍ້ອນ​ແນວ​ນີ້​ເອງ ນັບ​ແຕ່​ປີ 2010 ເປັນ­ຕົ້ນ​ມາ ຄ່າ​ໄຟ­ຟ້າ​ຈຶ່ງ​ຖີບ​ໂຕ​ຂຶ້ນ​ຢ່າງ​ຕໍ່​ເນື່ອງ ເຊັ່ນ: ເພີ່ມ​ຂຶ້ນ 16% ໃນ​ປີ 2010 17% ໃນ​ປີ 2014 ແລະ 19% ໃນ​ປີ 2015 ເພື່ອ​ສະ­ໜອງ​ພະລັງ​ງານ​ໄຟ­ຟ້າ​ໃຫ້​ໄດ້​ຕາມ​ເປົ້າໝາຍ​ທີ່​ຕ້ອງ­ການ ລັດ­ຖະ­ບານ​ມີ​ແຜນ​ກູ້​ຢືມ​ເງິນ ໂດຍ​ມີ​ການ​ຮ່ວມ​ມືກັບ​ທະ­ນາ­ຄານ​ພັດ­ທະ­ນາ​ອາ­ຊີ (ADB) ທະ​ນາຄານໂລກ ແລະ ອົງ­ການ​ຮ່ວມ​ມື​ສາ­ກົນ​ຂອງ​ຍີ່­ປຸ່ນ (ໄຈ​ກາ) ນອກ­ຈາກ​ນັ້ນ ຍັງ​ຈະ​ມີ​ການ​ປຶກ­ສາ​ຫາ­ລືກ່ຽວ​ກັບ​ການ​ຊື້​ພະ­ລັງ­ງານ​ໄຟ­ຟ້າ​ຈາກ ສປ ຈີນ ອິນເດຍ ແລະ ສປປ ລາວ ນຳ​ອີກ.

ທີ່ ສິງ­ກະ­ໂປ: ຂ່າວ​ດີ​ໃນ​ຕົ້ນ​ເດືອນ​ມັງ­ກອນ ປີ 2016 ຜ່ານ​ມາ ເຮັດ​ໃຫ້​ຜູ້​ເປັນ​ພໍ່​ໃນ​ສິງ­ກະ­ໂປ​ຍິ້ມອອກ ເພາະ​ລັດ­ຖະ­ບານໄດ້​ກຳ­ນົດ​ນະ­ໂຍ­ບາຍ​ສົ່ງເສີມ​ຜູ້​ເປັນ​ພໍ່​ໃຫ້​ໄດ້​ມີ​ສ່ວນ​ຮ່ວມ​ໃນ​ການ​ເບິ່ງ­ແຍງລູກ ແລະ ຊ່ວຍ​ລ້ຽງ​ຄອບ­ຄົວ ​ເວ­ລາ​ຜູ້​ເປັນເມຍ​ເກີດລູກ ເລື່ອງ​ນີ້​ໄດ້​ຮັບ​ການ​ເປີດ­ເຜີຍ​ໂດຍ​ທ່ານ​ນາງ ໂຈ ເຊ​ຟິນ​ທຽວ (Josephine Teo) ລັດ­ຖະ­ມົນ­ຕີ​ອາ​ວຸໂສ​ທີ່ຮັບ­ຜິດ­ຊອບ​ຕິດ­ຕາມ​ວຽກ​ງານ​ປະ­ຊາ­ກອນ ໃນປີ 2015 ທາງ​ການ​ສິງ­ກະ­ໂປ ໄດ້​ມີ​ນະ­ໂຍ­ບາຍ​ໃຫ້ຜູ້​ເປັນ​ຜົວ (ຫຼື ພໍ່​ຂອງເດັກ​ເກີດ​ໃໝ່) ສາ­ມາດ​ພັກວຽກ​ຕາມ​ຄວາມ​ສະ­ໝັກ​ໃຈ​ໄດ້​ສອງ​ອາ­ທິດ ເພື່ອເບິ່ງ­ແຍງ ແລະ ຊ່ວຍ­ເຫຼືອ​ເວ­ລາ​ເມຍ​ເກີດ​ລູກ ນີ້​ຖືວ່າ​ເປັນ​ນະ­ໂຍ­ບາຍ​ພິ­ເສດ ເພື່ອ​ໃຫ້​ຜູ້​ຊາຍ​ໄດ້​ເຮັດບົດ­ບາດ​ໃນ​ຖາ­ນະ​ເປັນ​ພໍ່​ຢ່າງ​ຕັ້ງ­ໜ້າ ຂ່າວ​ບໍ່​ໄດ້ບອກ​ວ່າ ນະ­ໂຍ­ບາຍ​ໃໝ່​ຕໍ່​ຜູ້​ເປັນ​ພໍ່​ນັ້ນມີ​ຫຍັງ​ແດ່ ມີ​ແຕ່​ໃຫ້​ຮູ້​ວ່າ ທ່ານ​ລັດ­ຖະ­ມົນ­ຕີ ໂຈ​ເຊ​ຟິນ ທຽວ ເຫັນ​ວ່າ ການ​ໃຫ້​ຜູ້​ຊາຍ​ພັກ​ວຽກ​ພຽງ 2 ອາ­ທິດ ເພື່ອ​ເຮັດ​ວຽກ​ຄອບ­ຄົວ​ຕອນ​ເມຍ​ເກີດ​ລູກ​ນັ້ນ​ມັນສັ້ນ​ເກີນ​ໄປ ນີ້​ກໍ່​ໝາຍ​ຄວາມ​ວ່າ ​ຈະ​ມີ​ນະ­ໂຍ­ບາຍ​ໃຫ້ຜູ້​ຊາຍພັກ​ຍາວ​ກວ່າ​ນັ້ນ​ຕື່ມ.

ທີ່ ຫວຽດ­ນາມ: ນັບ​ແຕ່​ປີ 2015 ເປັນ­ຕົ້ນ​ມາ ສສ ຫວຽດ­ນາມ ໄດ້​ປະ­ກາດ​ໃຊ້​ກົດ­ໝາຍວ່າ​ດ້ວຍ​ການຖື­ພາ​ແທນ ສຳ­ລັບ​ຄູ່ຜົວ​ເມຍ​ທີ່​ມີ​ລູກ​ຍາກ ເຊິ່ງ​ໄດ້​ມີການ​ຢັ້ງ­ຢືນ​ໂດຍ​ທາງ​ການ​ແພດວ່າ ຝ່າຍ​ຍິງ​ບໍ່​ມີຄວາມ​ສາ­ມາດ​ໃຫ້​ກຳ­ເນີດ​ລູກ​ໄດ້ ແມ່­ຍິງທີ່​ຈະ​ຖື­ພາມານ​ແທນ​ ຕ້ອງ​ເປັນ​ພີ່­ນ້ອງ ຫຼື ເປັນ​ລູກ​ອ້າຍ​ລູກນ້ອງ ພາຍ​ໃນ​ສາມ​ລຸ້ນ​ຂອງ​ຝ່າຍ​ຜົວ ຫຼື ເມຍ ແລະ ສາ­ມາດຖື­ພາ​ແທນ​ໄດ້​ພຽງ​ຄັ້ງ​ດຽວ ຄູ່​ຜົວ​ເມຍ​ທີ່​ມີລູກ​ຍາກ​ມີ­ໜ້າ​ທີ່​ຮັບ­ຜິດ­ຊອບ​ຄ່າ​ໃຊ້​ຈ່າຍ​ທາງ​ການແພດ ແລະ ການ​ເບິ່ງ­ແຍງເດັກ­ນ້ອຍ​ທັງ​ໝົດ.

ຂ່າວທີ່ກ່ຽວຂ້ອງ