ຂ່າວຫຼ້າສຸດ

ເດັກ­ນ້ອຍ 80 ລ້ານ​ກວ່າ​ຄົນ ເຮັດ​ວຽກ​ທີ່​ອັນ­ຕະ­ລາຍ

200 14 ມິ.ນ. 2017 ຂ່າວຕ່າງປະເທດ
ເດັກ­ນ້ອຍ 80 ລ້ານ​ກວ່າ​ຄົນ ເຮັດ​ວຽກ​ທີ່​ອັນ­ຕະ­ລາຍ

ຫົວ­ຂໍ້​ສຳ­ຄັນ​ຂອງ​ວັນ​ໂລກ ຕ້ານ​ການ​ໃຊ້​ແຮງ​ງານ​ເດັກ­ນ້ອຍ (12 ມິ­ຖຸ­ນາ) ໃນ​ປີ​ນີ້ ແລະ ກໍ​ເປັນ​ຄຳຮຽກ­ຮ້ອງ​ຂອງ​ອົງ­ການ​ແຮງ​ງານສາ­ກົນ (ILO) ທີ່​ນຳ​ອອກ​ມາ​ ເນື່ອງໃນ​ໂອ­ກາດ​ວັນ​ສຳ­ຄັນ​ນີ້ ກໍ​ຄື​ຢຸດ­ຕິການ​ນຳ​ໃຊ້​ແຮງ​ງານ​ເດັກ­ນ້ອຍ​ຢູ່ໃນ​ເຂດ​ທີ່​ເກີດ​ການ​ພິ­ພາດ ແລະ ໄພ​ທຳ​ມະຊາດ.

ທ່ານ ກູຍ ໄຣ​ເດີ (Guy Ryder) ຜູ້­ອຳ­ນວຍ­ການ​ໃຫຍ່ ILO ກ່າວ​ເນັ້ນເນື່ອງ​ໃນ​ວັນ​ດັ່ງ­ກ່າວ​ວ່າ: “ມື້­ນີ້​ ພວກເຮົາ​ຮຽກ­ຮ້ອງ​ໄປ​ຍັງ​ປະ­ຊາ​ຄົມສາກົນ​ ໃຫ້​ໃສ່­ໃຈ​ຕໍ່​ຊະ​ຕາ​ກຳ​ຂອງພວກ​ເດັກ­ນ້ອຍ ​ທີ່​ໄດ້​ຮັບ​ຜົນ​ກະທົບ​ຢູ່​ໃນ​ການ​ພິ­ພາດ ແລະ ໄພ​ທຳ​ມະ​ຊາດ ກໍ​ຄື​ຄວາມ​ສ່ຽງ​ເປັນ​ພິ­ເສດ​ທີ່ພົວ­ພັນ​ເຖິງ​ແຮງ​ງານ​ເດັກ ບໍ່​ວ່າ​ທ່ານ​ຈະ​ຢູ່​ໃສ​ກໍ​ຕາມ ຈົ່ງ​ເຂົ້າ​ຮ່ວມກັບ​ພວກ​ເຮົາ​ຈັດ​ ຕັ້ງ​ວັນ​ໂລກ​ຕ້ານການ​ໃຊ້​ແຮງ​ງານ​ເດັກ­ນ້ອຍ ບໍ່​ຄວນ​ທີ່ຈະ​ປ່ອຍ​ໃຫ້​ເລື່ອງ​ນີ້​ຊັກ​ຊ້າ​ໄປ​ອີກ ໂລກ​ຄວນ​ເພີ່ມ​ທະ­ວີ​ການ​ດຳເນີນ​ການ​ໂດຍ​ໄວ ເພື່ອ​ປັດ​ເປົ່າ​ແຮງງານ​ເດັກ­ນ້ອຍໃນ​ທຸກໆ​ຮູບ​ການ.”

ILO ໃຫ້​ຮູ້​ວ່າ ຢູ່​ໃນ​ເຂດ​ທີ່ເກີດ​ການ​ພິ­ພາດ​ແຫ່ງ​ຕ່າງໆ​ນັ້ນ ມີ​ຄົນ​ດຳ­ລົງ​ຊີ­ວິດ​ຢູ່  1,5 ຕື້​ຄົນ ແລະ ມີ​ປະ­ມານ 200 ລ້ານ​ຄົນ ຖືກ​ຜົນ​ກະທົບຈາກ​ໄພ​ທຳ​ມະ​ຊາດ​ໃນ​ແຕ່ລະ​ປີ ໃນ​ນັ້ນ​ມີ  30% ເປັນ​ເດັກ­ນ້ອຍ ໃນ​ຈຳ­ນວນ​ເດັກ­ນ້ອຍ 168 ລ້ານ​ຄົນ ທີ່​ພວມ​ຕ້ອງ​ໃຊ້​ແຮງ​ງານ​ນັ້ນ ມີ​ເດັກ­ນ້ອຍ​ປະ­ມານ 50% ເຮັດ​ວຽກທີ່​ອັນ­ຕະ­ລາຍ.

ທ່ານ ໄຣ​ເດີ ເວົ້າ​ວ່າ ຢູ່​ໃນ​ເຂດ​ທີ່​ເກີດ​ການ​ພິ­ພາດ ແລະ ໄພ​ທຳ​ມະ​ຊາດ​ນັ້ນ ເຮືອນ​ຊານ ແລະ ໂຮງຮຽນ​ມັກ​ຈະ​ຖືກ​ທຳ­ລາຍ ຫຼາຍ​ຄອບຄົວບໍ່​ມີ​ຄວາມ​ສາ­ມາດ​ຫາ​ລ້ຽງຊີບ ຍ້ອນ​ຂາດ​ການ​ດູ​ແລ​ຂອງ​ຄອບ­ຄົວ ແລະ ບໍ່​ໄດ້​ຮັບ​ການ​ປົກ​ປ້ອງ​ຈາກ​ສັງ­ຄົມ ຈຶ່ງ​ເຮັດ​ໃຫ້​ເດັກ­ນ້ອຍ​ປະ​ເຊີນກັບ​ຄວາມ​ສ່ຽງ​ອັນຕະ​ລາຍ​ໄດ້​ສູງ ທີ່​ຈະ​ຕ້ອງ​ໄດ້​ອອກແຮງ​ງານ ທີ່​ໄດ້​ຮັບ​ຄວາມ​ເສຍ​ຫາຍເປັນ​ພິ­ເສດກໍ​ແມ່ນ​ພວກ​ເດັກ­ນ້ອຍ​ທີ່​ແຍກ​ອອກຈາກ​ພໍ່​ແມ່ໃນ​ລະ­ຫວ່າງ​ການ​ອົບ​ພະ​ຍົບໜີ​ຈາກ​ການ​ພິພາດ ໜີ​ອອກ​ຈາກ​ເຮືອນ​ຊານ​ເພື່ອໄປ​ລີ້​ໄພ ໂດຍ​ພວກ​ເຂົາ​ກາຍ­ເປັນຜູ້​ຮັບ​ເຄາະຮ້າຍ​ໄດ້​ງ່າຍຈາກ​ກຸ່ມ​ຄົນ​ຄ້າ​ມະ­ນຸດ ແລະ ຜູ້​ທີ່​ຂູດ​ຮີດ ນອກ­ຈາກ​ນັ້ນ­ແລ້ວ ຍັງ​ມີ​ກໍ­ລະ­ນີ​ທີ່​ເດັກ­ນ້ອຍ​ຖືກ​ບັງ­ຄັບ​ໃຫ້​ຈັບ​ປືນເປັນ​ໂລ່​ກຳ​ບັງ​ທີ່​ມີຊີ­ວິດຢູ່​ໃນ​ການ​ພິພາດ​ດ້ວຍ​ອາ­ວຸດ.

ILO ຈັດ​ຕັ້ງ​ວັນ​ໂລກ​ຕ້ານ​ການ​ໃຊ້​ແຮງ​ງານ​ເດັກ­ນ້ອຍ​ເປັນ​ເທື່ອ​ທຳ​ອິດ​ໃນ​ປີ 2002 ແລະ ນັບ​ແຕ່​ນັ້ນເປັນ­ຕົ້ນ​ມາ ກໍ​ໄດ້​ຮັບ​ການ­ຈັດ­ຕັ້ງໃນ​ວັນທີ 12 ມິ­ຖຸ­ນາ​ຂອງ​ແຕ່​ລະ​ປີ ເພື່ອ​ດຶງ​ດູດ​ຄວາມ​ເອົາ­ໃຈໃສ່​ຂອງ​ໂລກ ທີ່​ມີ​ຕໍ່​ບັນ­ຫາ​ແຮງ​ງານ​ເດັກ ແລະ ຄວາມ​ຈຳ­ເປັນ​ຕ້ອງ​ໃຊ້​ມາດ​ຕະ­ການປັດ​ເປົ່າ​ເລື່ອງ​ນີ້.

ຂ່າວທີ່ກ່ຽວຂ້ອງ