ຂ່າວຫຼ້າສຸດ

ໂຮ່ຈີມິງ ຈະມອບແນວພັນງົວຊີ້ນໃຫ້ນະຄອນຫຼວງ

257 15 ມິ.ນ. 2017 ຂ່າວໜ້າ​ໜຶ່ງ
ໂຮ່ຈີມິງ ຈະມອບແນວພັນງົວຊີ້ນໃຫ້ນະຄອນຫຼວງ

ເພື່ອ​ເປັນ​ການ​ສະໜອງ​ທາດຊີ້ນ ​ສອງ​ຝ່າຍ​ລະຫວ່າງ​ນະຄອນຫຼວງ​ວຽງ​ຈັນ ແລະ ນະຄອນ​ໂຮ່​ຈີມິງ ໃນ​ອະນາຄົດ​ອັນ​ໃກ້​ນີ້ ວັນ​ທີ 14 ມິຖຸນາ 2017 ທີ່​ຫ້ອງ​ວ່າການນະຄອນຫຼວງ​ວຽງ​ຈັນ ທ່ານ ແກ້ວ​ພິລາ​ວັນ ອາ​ໄພ​ລາດ ຮອງເຈົ້າ​ຄອງ​ນະຄອນຫຼວງ​ ໄດ້​ຕ້ອນຮັບ​ການ​ເຂົ້າ​ຢ້ຽມ​ຄຳນັບ​ຂອງທ່ານ ຫງວຽນວັນ​ຈຶກ ຮອງ​ຫົວໜ້າ​ພະ​ແນກ​ກະສິກຳ ແລະ ພັດທະ​ນາ​ຊົນນະບົດ​ ນະຄອນ​ໂຮ່​ຈີ​ມິງ ພ້ອມ​ດ້ວຍ​ຄະນະ​ ທີ່​ເດີນທາງ​ມາເຮັດ​ວຽກຢູ່​ນະຄອນຫຼວງ​ວຽງ​ຈັນ ແຕ່​ວັນ​ທີ 13-16 ມິຖຸນາ 2017.

ທ່ານ ຫງວຽນວັນ​ຈຶກ ກ່າວ​ຈຸດປະສົງ​ຂອງ​ການ​ເດີນທາງ​ຄັ້ງ​ນີ້ວ່າ: ເພື່ອ​ປຶກສາ​ຫາລື​ກ່ຽວ​ກັບ​ຈັດພິທີ​ມອບ-ຮັບ​ແນວ​ພັນ​ງົວ​ຊີ້ນໃຫ້​ກັບ​ນະຄອນຫຼວງ​ວຽງ​ຈັນ ຈຳນວນ 50 ໂຕ ແລະ ນ້ຳ​ເຊື້ອ ຈຳນວນ 10.000 ຫຼອດ ແລະ ຮັບ​ເອົາ​ພະນັກງານ​ວິຊາ​ການ ໄປ​ເຝິກ​ອົບຮົມ​ຢູ່​ນະຄອນ​ໂຮ່​ຈີ​ມິງ ລວມ​ທັງປຶກສາ​ຫາລື​ກ່ຽວ​ກັບ​ຂັ້ນ​ຕອນ ແລະ ຮູບ​ແບບ​ການ​ນຳ​ສົ່ງແນວ​ງົວ​ພັນ​ດັ່ງກ່າວ ລະຫວ່າງນະຄອນ​ໂຮ່​ຈີ​ມິງ-ນະຄອນຫຼວງວຽງ​ຈັນ ແລະ ສະຖານທີ່​ພັກ ເຊິ່ງ​ຄາດ​ວ່າ​ຈະ​ມີ​ການ​ມອບ-ຮັບໃນ​ໄວໆ​ນີ້.

ພາຍຫຼັງ​ໄດ້​ຮັບ​ຟັງ​ການ​ລາຍງານ ທ່ານ​ຮອງ​ເຈົ້າ​ຄອງ ​ກໍ່​ໄດ້​ສະແດງ​ຄວາມ​ຂອບໃຈ​ຕໍ່​ຄະນະ​ຜູ້ແທນ​ນະຄອນ​ໂຮ່​ຈີ​ມິງ ພ້ອມອວຍພອນ​ໃຫ້​ພາກສ່ວນ​ກ່ຽວຂ້ອງ ​ຈົ່ງ​ປະສົບ​ຜົນສຳເລັດ​ຕາມການ​ຮ່ວມ​ມື​ຂອງ​ນະຄອນຫຼວງວຽງ​ຈັນ-ນະຄອນ​ໂຮ່​ຈີ​ມິງ ກຳນົດ​ໄວ້​ເພື່ອ​ເກີດ​ຜົນ​ປະໂຫຍດ​ທັງສອງ​ຝ່າຍ​ໂດຍ​ໄວ ໂອກາດ​ດຽວກັນ ທ່ານ ຫງວຽນວັນ​ຈຶກ ກໍ່​ໄດ້ສະແດງ​ຄວາມ​ຂອບໃຈ​ຕໍ່​ທ່ານຮອງ​ເຈົ້າ​ຄອງ ​ທີ່​ໃຫ້ການ​ຕ້ອນຮັບ​ຢ່າງ​ອົບ​ອຸ່ນ ແລະ ຢືນຢັນ​ວ່າ ຈະ​ໃຫ້​ການ​​​ຊ່ວຍເຫຼືອ​ຢ່າງ​ສຸດຄວາມ​ສາມາດ.

ຂ່າວທີ່ກ່ຽວຂ້ອງ