ຂ່າວຫຼ້າສຸດ

ລາວ-ຈີນ ຮ່ວມມືທົດລອງແກ້ໄຂຄວາມທຸກຍາກ

291 15 ມິ.ນ. 2017 ຂ່າວໜ້າ​ໜຶ່ງ
ລາວ-ຈີນ ຮ່ວມມືທົດລອງແກ້ໄຂຄວາມທຸກຍາກ

ສູນ​ຄຸ້ມ​ຄອງ​ໂຄງການ​ຊ່ວຍເຫຼືອ​ຕ່າງປະເທດ​ ແກ້​ໄຂ​ຄວາມທຸກ​ຍາກ​ແຂວງ​ກວາງຊີ ​ສປ ຈີນ ແລະ ຄະນະ​ພັດທະນາ​ຊົນນະບົດ ແລະ ລຶບລ້າງ​ຄວາມທຸກ​ຍາກ​ຂັ້ນສູນ​ກາງ (​ຄພທສ) ກະຊວງ​ກະ​ສິກຳ ແລະ ປ່າໄມ້ ຈະ​ຮ່ວມ​ກັນ​ຈັດຕັ້ງ​ປະຕິບັດ​ໂຄງການ​ຮ່ວມ​ມື ​ທົດລອງ​ແກ້​ໄຂ​ຄວາມທຸກ​ຍາກ ລາວ-ຈີນ ຢູ່​ບ້ານ​ຊໍ້ ເມືອງ​ສັງ​ທອງ ນະຄອນ​ຫຼວງ​ວຽງ​ຈັນ ແລະ ບ້ານຊຽງ​ລ້ອມ ເມືອງ ແລະ ແຂວງຫຼວງ​ພະ​ບາງ ເພື່ອ​ແນໃສ່​ປັບປຸງຊີວິດ​ການ​ເປັນ​ຢູ່​ຂອງ​ປະຊາຊົນ ໃນ​ເຂດ​ເປົ້າ​ໝາຍ​ໃຫ້​ດີ​ຂຶ້ນ ກ້າວໄປ​ສູ່​ການ​ລຶບລ້າງ​ຄວາມທຸກຍາກ ​ຕາມ​ນະໂຍບາຍ​ຂອງ​ພັກ ແລະ ລັດຖະບານ​ວາງ​ອອກ.

ໂຄງການ​ຮ່ວມ​ມື​ທົດ​ລອງ​ແກ້ໄຂ​ຄວາມທຸກ​ຍາກ ລາວ-ຈີນ ໄດ້ຮັບ​ການ​ຊ່ວຍເຫຼືອ​ຈາກ​ກະຊວງການ​ຄ້າ ​ສປ ຈີນ ກໍ່​ຄືລັດ​ຖະບານແຫ່ງ ​ສປ ຈີນ ໃນ​ຂອບການ​ຮ່ວມ​ມື​ແມ່ນ້ຳ​ຂອງ-ແມ່ນ້ຳລ້ານ​ຊ້າງ ລວມ​ມູນ​ຄ່າ​ໂຄງການ 33.333.000 ຢວນ ຫຼື ປະມານ 40 ຕື້​ກີບ ໂດຍ​ມີ​ໄລຍະ​ການ​ປະຕິ​ບັດ​ໂຄງການ ແຕ່​ປີ 2017-2020 ເຊິ່ງ​ໃນ​ໄລຍະ​ຜ່ານ​ມາຄະນະ​ວິຊາ​ການ​ທັງ​ສອງ​ຝ່າຍ​ ໄດ້ຮ່າງ​ແຜນ​ວຽກ​ໂຄງການ​ລະອຽດ.

ພິທີ​ລົງ​ນາມ​ສັນຍາ​ການ​ປະຕິບັດ​ໂຄງການ ໄດ້​ຈັດ​ຂຶ້ນ​ວັນ​ທີ 14 ມິຖຸນາ 2017 ຢູ່​ກະຊວງ​ກະສິກຳ ແລະ ປ່າໄມ້ ລະຫວ່າງ​ທ່ານ ຈິດ ທະວີ​ໃສ ຫົວໜ້າ​ຫ້ອງການ​ແຜນການ ແລະ ພົວພັນ​ຕ່າງປະເທດ ​ຄພທສ ແລະ ທ່ານ Wang Qihui ທີ່​ປຶກສາ​ດ້ານ​ເສດຖະກິດ-ການ​ຄ້າ ສະຖານທູດ ​ສປ ຈີນ ປະຈຳ ​ສປປ ລາວ ໂດຍ​ມີ​ທ່ານ ພວງ​ປາ​ຣີ​ສັກ ປຣະ​ວົງ​ວຽງ​ຄຳ ຮອງ​ລັດຖະມົນຕີກະຊວງ​ກະ​ສິກຳ ແລະ ປ່າໄມ້ ທ່ານ ທອງ​ວັນ ວິໄລ​ເຮືອງ ຮອງ​ຫົວໜ້າ ​ຄພທສ ພ້ອມ​ພາກສ່ວນ​ກ່ຽວຂ້ອງ​ເຂົ້າຮ່ວມ.

ຂ່າວທີ່ກ່ຽວຂ້ອງ