ຮູ້ພາສາລາວ ມື້ລະຄຳ - ໂດຍ: ແສງ​ຈັນ ສຸ​ຂະ​ເສມ : ຊຶ່ງ/ເຊິ່ງ

780 20 ມິ.ນ. 2017 ຫົວຂໍ້ຂ່າວອື່ນໆ

ໃນ​ພາ­ສາ​ລາວ ເປັນ​ຄຳ​ເຊື່ອມ ຫຼື ​ຄຳ​ບຸບພະ​ບົດ ໃຊ້​ສຳ­ລັບ​ເຊື່ອມຄຳ​ນາມ​ກັບ​ຄຳນາມ, ຄຳ​ນາມ​ກັບ​ຄຳ​ກິ­ລິ­ຍາ... ນອກຈາກນີ້​ຍັງ​ເຮັດ​ໜ້າ­ທີ່​ຂະ­ຫຍາຍ​ຄຳ​ນັ້ນໆ​ໃຫ້​ແຈ້ງ​ຂຶ້ນ ໂດຍ​ບໍ່​ຕ້ອງອອກ­ຊື່​ນາມ​ນັ້ນ​ອີກ. ຊຶ່ງ/ເຊິ່ງ ເປັນ​ຄຳ​ລາວ​ເດີມ ທີ່ໃຊ້​ຕາມຄວາມ​ນິ­ຍົມຂອງ​ສັງ­ຄົມ​ໃນ​ແຕ່​ລະ​ໄລ­ຍະ. ແຕ່​ໃນ​ຫຼັກ​ໄວ­ຍາ­ກອນລາວ​ສະ­ບັບ​ປັດ­ຈຸ­ບັນ ໄດ້​ກຳ­ນົດ​ໃຫ້​ເປັນ​ປະ­ເພດ​ຄຳ​ອະ­ນຸ­ໂລມ ເຊັ່ນດຽວ​ກັນ​ກັບ ກໍ/ກໍ່, ຈຶ່ງ/ຈິ່ງ... ໝາຍ​ຄວາມ​ວ່າ​ໃຊ້​ໄດ້​ທັງ​ສອງ. ແຕ່​ກໍ​ມີ​ຄຳ​ແນະ­ນຳ​ສະ­ເພາະ​ໃນ​ເວ­ລາ​ຂຽນ​ບົດ, ຂຽນ​ເລື່ອງ​ຕ່າງໆ ຖ້າ​ຫາກ​ໃຊ້ ຊຶ່ງ ແລ້ວກໍ​ໃຫ້​ໃຊ້​ແບບ​ດຽວ​ຈົນ​ໝົດ​ເລີຍ, ຖ້າ​ໃຊ້ ເຊິ່ງ ກໍ​ໃຫ້​ໃຊ້​ແບບ​ດຽວ​ຈົນໝົດ. ບໍ່​ຄວນ​ໃຊ້​ປົນ​ກັນ ທັງ​ນີ້ເພື່ອ​ບໍ່​ຢາກໃຫ້​ຜູ້​ອ່ານ​ສັບ­ສົນ​ກັນ. ໃນ​ພາ­ສາ​ເວົ້າ ກໍ​ບໍ່​ມີ​ການ​ຈຳແນກ​ການໃຊ້​ແຕ່​ຢ່າງ­ໃດ ຢາກ​ໃຊ້​ໂຕ​ໃດ​ກໍ​ໄດ້, ສ່ວນ​ໃນ​ພາ­ສາ​ຂຽນ​ຄວນ​ໃຊ້ໃຫ້​ເປັນ​ມາດ­ຕະ­ຖານ​ດຽວ​ກັນ ດັ່ງ​ທີ່​ແນະ­ນຳ​ມາ​ຂ້າງ​ເທິງ.

ຕົວ­ຢ່າງ:

- ປະ­ຕິ­ບັດ​ໜ້າ­ທີ່​ເຊິ່ງ​ວຽກ​ງານ

- ຄົນ​ເຮົາ​ອາ­ໄສ​ຊຶ່ງ​ບຸນ

- ການ​ເບິ່ງ­ແຍງ​ເຊິ່ງ​ກັນ​ແລະ​ກັນ

... ຄົນ​ຜູ້​ນີ້​ຊ່າງ​ສູງ​ສົ່ງ​ແທ້ ຊຶ່ງ​ໃນ​ຍາມ​ທຳ​ມະ​ດາ...  (ຄ້າງ​ຄືນ​ໃນ​ປ່າ​ເລິກ, ຈັນ​ທີ ເດືອນ​ສະ­ຫວັນ)

ຂ່າວທີ່ກ່ຽວຂ້ອງ