ສຶ​ນາ​ມິ ຊັດ​ເຂົ້າ​ຝັ່ງ​ທະ­ເລ​ເກາະ ກຣິນ​ແລນ

309 20 ມິ.ນ. 2017 ຂ່າວຕ່າງປະເທດ
ສຶ​ນາ​ມິ ຊັດ​ເຂົ້າ​ຝັ່ງ​ທະ­ເລ​ເກາະ ກຣິນ​ແລນ

ເຈົ້າ​ໜ້າ­ທີ່​ໃນ​ເກາະ ກຣິນ​ແລນ (Greenland) ແຈ້ງ​ໃຫ້​ຮູ້​ວ່າ ມີ​ຜູ້​ຫາຍ​ສາບ​ສູນ 4 ຄົນ ແລະ ຫຼາຍ​ຄົນ​ຕ້ອງ​ໄດ້​ອົບ​ພະ​ຍົບ ເມື່ອ​ມີ​ສຶ​ນາ​ມິ​ຊັດ​ເຂົ້າ​ຝັ່ງ​ທະ­ເລ​ຂອງ​ເກາະ​ນີ້ ຫຼັງ​ຈາກ​ທີ່​ເກີດ​ເຫດ­ການ​ແຜ່ນ­ດິນ​ໄຫວ.

ເຈົ້າ​ໜ້າ­ທີ່​ຕຳ­ຫຼວດ​ໃນ​ທ້ອງ­ຖິ່ນ ລາຍ​ງານ​ວ່າ ຍັງ​ບໍ່​ທັນ​ກຳ­ນົດ​ໄດ້​ຢ່າງ​ຊັດ​ເຈນ​ເຖິງ​ຄວາມ​ເສຍ​ຫາຍ​ທີ່​ເກີດ​ຂຶ້ນ​ກັບ​ຊີ­ວິດ​ຂອງ​ປະ­ຊາ­ຊົນ ແຕ່​ວ່າ​ມີ​ເຮືອນ 11 ຫຼັງ​ຖືກ​ພັດ​ໄຫຼ​ໄປ​ທ່າມ­ກາງ​ສຶ​ນາ​ມິ ຫຼັງ​ເກີດ​ເຫດ­ການ​ແຜ່ນ­ດິນ​ໄຫວ ແທກ​ຄວາມ​ແຮງ​ສັ່ນ​ສະ­ເທືອນ​ໄດ້ 4 ແມັກນິຈູດ (Magnitude) ເມື່ອ​ຄ່ຳ​ຄືນ​ຂອງ​ວັນ​ທີ 17 ມິ­ຖຸ­ນາ ຊຶ່ງ​ເກີດ​ຂຶ້ນ​ທີ່​ເກາະ​ ອູມ​ມັນ​ນັກ (Uummannaq) ໃນ​ເຂດ​ຂົ້ວ​ໂລກ​ເໜືອ.

ເກາະ Greenland ຂອງ​ດານ​ມາກ ຕັ້ງ​ຢູ່​ມະ­ຫາ​ສະ­ໝຸດ​ອັດ​ລັງ​ຕິກ​ເໜືອ ໃນ​ເຂດ​ນອກ​ຝັ່ງ​ທະ­ເລ​ທິດ­ຕາ­ເວັນ­ອອກ​ສ່ຽງ​ເໜືອ​ກາ​ນາ​ດາ ໂດຍ​ມີ​ປະ­ຊາ­ກອນ​ອາ­ໄສ​ຢູ່ 55.000 ຄົນ.

ໃນ​ຂະ­ນະ​ດຽວ​ກັນ ເຈົ້າ​ໜ້າ­ທີ່​ຊີ​ເລ ແຈ້ງ​ໃຫ້​ຮູ້­ເມື່ອ​ວັນ​ທີ 17 ມິ­ຖຸ­ນາ​ວ່າ ພະ­ຍຸ​ປະ­ກອບ​ກັບ​ລົມ​ພັດ​ແຮງ ແລະ ຝົນ­ຕົກ​ໜັກ ໄດ້​ເປັນ​ເຫດ​ໃຫ້​ມີ​ຜູ້​ເສຍ​ຊີ­ວິດ 4 ຄົນ ເຮືອນ​ຊານ​ຖືກ​ທຳ­ລາຍ​ຫຼາຍ​ຫຼັງ ນ້ຳ​ຖ້ວມ​ຖະ­ໜົນ​ຫຼາຍ​ສາຍ ແລະ ໄຟ­ຟ້າ​ຂາດ​ໃນ​ບໍ­ລິ­ເວນ​ກວ້າງ ພະ­ຍຸ​ດັ່ງ­ກ່າວ​ພັດ​ຂຶ້ນ​ຝັ່ງ​ຕັ້ງ­ແຕ່​ວັນ​ທີ 15 ມິ­ຖຸ­ນາ ໃນ​ບໍ­ລິ­ເວນ 9 ເຂດ​ທາງ​ພາກ​ກາງ ແລະ ພາກ​ໃຕ້​ຊີ​ເລ ປະ­ຊາ­ຊົນ​ເກືອບ 3.000 ຄົນ ສູນ​ເສຍ​ເຮືອນ​ຊານ ແລະ 230.000 ກວ່າ​ຄົນ ຂາດ​ໄຟ­ຟ້າ​ໃຊ້.

ຂ່າວທີ່ກ່ຽວຂ້ອງ