ທະ­ຫານ​ອາ​ຟະ​ກາ​ນິດ​ສະ­ຖານ ລັ່ນ​ປືນ​ໃສ່​ທະ­ຫານ ສ.ອາ​ເມ​ຣິ​ກາ

369 20 ມິ.ນ. 2017 ຂ່າວຕ່າງປະເທດ
ທະ­ຫານ​ອາ​ຟະ​ກາ​ນິດ​ສະ­ຖານ ລັ່ນ​ປືນ​ໃສ່​ທະ­ຫານ ສ.ອາ​ເມ​ຣິ​ກາ

ເຈົ້າ​ໜ້າ­ທີ່​ອາ​ຟະ​ກາ​ນິດ​ສະ­ຖານ ແຈ້ງ​ໃຫ້​ຮູ້­ເມື່ອ​ວັນ​ທີ 17 ມິ­ຖຸ­ນາ ວ່າ ເຫດ­ການ​ໂຈມ​ຕີ​ຢູ່​ພາຍ​ໃນ​ເທື່ອ​ໃໝ່​ຫຼ້າ​ສຸດ​ນັ້ນ ພົນ­ທະ­ຫານ​ຂອງ​ອາ​ຟະ​ກາ​ນິດ​ສະ­ຖານ ຜູ້​ໜຶ່ງ ໄດ້​ລັ່ນ​ປືນ​ໃສ່​ທະ­ຫານ ສ.ອາ​ເມ​ຣິ​ກາ ຫຼາຍ​ຄົນ ເປັນ​ເຫດ​ໃຫ້​ມີ​ຜູ້​ໄດ້​ຮັບ​ບາດ­ເຈັບ 4 ຄົນ

ໂຄ­ສົກ​ກະ­ຊວງ​ປ້ອງ​ກັນ​ປະ­ເທດ ອາ​ຟະ​ກາ​ນິດ​ສະ­ຖານ ໃຫ້​ຮູ້​ວ່າ ເຫດ­ການ​ດັ່ງ­ກ່າວ​ເກີດ​ຂຶ້ນ​ລະ­ຫວ່າງ​ການ​ເຝິກ­ຊ້ອມ​ຢູ່​ໃນ​ຖານ​ທັບ ຊາ​ຮີນ (Shaheen) ໃນ​ແຂວງ ບາ​ລຄ (ພາກ​ເໜືອ ອາ​ຟະ​ກາ​ນິດ​ສະ­ຖານ).

ພົນ­ທະ­ຫານ ສ.ອາ​ເມ​ຣິ​ກາ ເຫຼົ່າ­ນັ້ນ ສັງ­ກັດ​ຢູ່​ໃນ​ກອງ​ກຳ­ລັງ​ສາ­ກົນ ໂດຍ​ແມ່ນ​ອົງ­ການ​ສົນ­ທິ­ສັນ­ຍາ​ປ້ອງ​ກັນ​ອັດ​ລັງ​ຕິກ​ເໜືອ (NATO) ເປັນ​ແກນ​ນຳ ເພື່ອ​ຄຽງ​ບ່າ​ຄຽງ​ໄຫຼ່​ກັບ​ກອງ​ກຳ­ລັງ​ຂອງ​ອາ​ຟະ​ກາ​ນິດ​ສະ­ຖານ ຕໍ່­ຕ້ານ​ກັບ​ພວກ​ມື​ປືນ​ຕາ​ລີ​ບັນ.

ໃນ​ອີກ​ເຫດ­ການ​ໜຶ່ງ ເຈົ້າ​ໜ້າ­ທີ່​ຕຳ­ຫຼວດ​ໃນ​ທ້ອງ­ຖິ່ນ​ແຈ້ງ​ໃຫ້​ຮູ້​ວ່າ ຕຳ­ຫຼວດ​ອາ​ຟະ​ກາ​ນິດ​ສະ­ຖານ ເສຍ​ຊີ­ວິດ​ຢ່າງ​ໜ້ອຍ 5 ຄົນ ແລະ ບາດ­ເຈັບ​ອີກ 15 ຄົນ ຈາກ​ເຫດ­ການ​ວາງ​ລະ­ເບີດ​ສະ­ລະ​ຊີບ ແລະ ຍິງ​ປືນ ໂດຍ​ກຸ່ມ​ມື​ປືນ​ຕາ​ລີ​ບັນ ເມື່ອ​ຕອນ​ເຊົ້າ​ວັນ​ທີ 18 ມິ­ຖຸ­ນາ​ນີ້ ຊຶ່ງ​ມຸ່ງ​ເປົ້າ​ໃສ່​ສຳ­ນັກ­ງານ​ຂອງ​ຕຳ­ຫຼວດ​ໃນ​ເມືອງ​ກາ​ເດນ (ພາກ​ຕາ­ເວັນ​ອອກ ອາ​ຟະ​ກາ​ນິດ​ສະ­ຖານ).

ຂ່າວທີ່ກ່ຽວຂ້ອງ