ກະ­ຕໍ້​ລາວ ຫວັງ​ຫຼຽນ​ໃດ​ໜຶ່ງ ໃນ​ງານ​ກີ­ລາ​ນັກ­ຮຽນ​ອາ​ຊຽນ

705 06 ກ.ກ. 2017 ວົງຈອນກີລາ
ກະ­ຕໍ້​ລາວ ຫວັງ​ຫຼຽນ​ໃດ​ໜຶ່ງ ໃນ​ງານ​ກີ­ລາ​ນັກ­ຮຽນ​ອາ​ຊຽນ

    ຄະ­ນະ​ຮັບ­ຜິດ­ຊອບ​ນຳ­ພາ​ທີມ​ນັກ­ກີ­ລາ​ນັກ­ຮຽນ​ລາວ ເຂົ້າ​ຮ່ວມ​ແຂ່ງ­ຂັນ​ໃນ​ງານ​ມະ​ຫະ​ກຳ​ກີ­ລາ​ນັກ­ຮຽນ​ອາ​ຊຽນ ຄັ້ງ​ທີ 9 ທີ່​ປະ­ເທດ​ສິງ­ກະ­ໂປ ເປັນ​ເຈົ້າ­ພາບ ໃນ​ວັນ​ທີ 13-21 ກໍ­ລະ­ກົດ 2017 ນຳ​ໂດຍ​ທ່ານ ຄຳ​ພັນ ອ່ອນ​ພັນ ຮອງ​ຫົວ­ໜ້າ​ກົມ​ພະ­ລະ ແລະ ສິ­ລະ​ປະ​ສຶກ​ສາ ກະ­ຊວງ​ສຶກ​ສາ​ທິ​ການ ແລະ ກີ­ລາ ທັງ​ເປັນ​ຄະ­ນະ​ຮັບ­ຜິດ­ຊອບ​ກີ­ລາ​ນັກ­ຮຽນ​ລາວ ພ້ອມ​ດ້ວຍ​ຄະ­ນະ ໄດ້​ລົງ​ຕິດ­ຕາມ​ໃຫ້​ກຳ­ລັງ​ໃຈ ແລະ ມອບ​ເຄື່ອງ​ດື່ມ​ບຳ­ລຸງ​ສຸ­ຂະ­ພາບ ໃຫ້​ທັບ​ນັກ­ກີ­ລາ​ກະ­ຕໍ້​ນັກ­ຮຽນ​ລາວ ຈຳ­ນວນ 12 ຄົນ ທີ່​ເກັບ​ຕົວ​ເຝິກ­ຊ້ອມ ໃນ​ວັນ​ທີ 30 ມິ­ຖຸ­ນາ 2017 ທີ່​ເດີ່ນ​ກີ­ລາ​ໃນ​ຮົ່ມ ໂອ​ແລມ​ປາ​ເຊຍ (ວິ­ທະ­ຍາ​ເຂດ​ດົງ​ໂດກ) ເພື່ອ​ກຽມ​ເຂົ້າ​ຮ່ວມ​ງານ​ດັ່ງ­ກ່າວ.

    ທ່ານ ສົມ​ໃຈ ແກ້ວ​ປະ­ເສີດ ຫົວ­ໜ້າ​ຄູ​ເຝິກ​ກີ­ລາ​ກະ­ຕໍ້​ນັກ­ຮຽນ​ລາວ ໄດ້​ລາຍ​ງານ​ໃຫ້​ຮູ້​ວ່າ: ສຳ­ລັບ​ການ​ເຂົ້າ​ຮ່ວມ​ກີ­ລາ​ນັກ­ຮຽນ​ອາ​ຊຽນ ຄັ້ງ​ນີ້ ສປປ ລາວ ກໍ່​ຄື​ສະ­ຫະ­ພັນ​ກີ­ລາ​ກະ­ຕໍ້​ແຫ່ງ​ຊາດ​ລາວ ຈະ​ສົ່ງ​ນັກ­ກີ­ລາ​ກະ­ຕໍ້ ເຂົ້າ​ຮ່ວມ​ທັງ​ໝົດ 12 ຄົນ ເປັນ​ປະ­ເພດ​ຊາຍ ເຊິ່ງ​ຈະ​ລົງ​ແຂ່ງ­ຂັນ​ໃນ 3 ລາຍ­ການ ປະ­ກອບ​ມີ: ປະ­ເພດ​ທີມ​ຄູ່ ທີມ​ດ່ຽວ ແລະ ທີມ​ຊຸດ ສຳ­ລັບ​ນັກ­ກີ­ລາ​ຈຳ­ນວນ​ດັ່ງ­ກ່າວ​ແມ່ນ​ໄດ້​ເລີ່ມ​ເຂົ້າ​ສູນ​ເຝິກ­ຊ້ອມ​ມາ​ແຕ່​ກາງ​ເດືອນ​ພຶດ­ສະ­ພາ ປັດ­ຈຸ­ບັນ​ມີ​ຄວາມ​ພ້ອມ​ແລ້ວ​ບໍ່​ວ່າ​ຈະ​ເປັນ​ທາງ​ດ້ານ​ຮ່າງ­ກາຍ ຈິດ­ໃຈ ພະ­ລະ​ກຳ­ລັງ ແລະ ເທັກ​ນິກ​ຕ່າງໆ ພ້ອມ​ຕັ້ງ​ເປົ້າ​ຈະ​ພະ­ຍາ­ຍາມ​ສູ້​ຊົນ​ຍາດ​ໃຫ້​ໄດ້​ຫຼຽນ​ໃດ​ຫຼຽນ​ໜຶ່ງ.

    ສຳ­ລັບ​ການ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ນັກ­ຮຽນ​ອາ​ຊຽນ ຄັ້ງ​ທີ 8 ທີ່​ແຂວງ​ຊຽງ​ໃໝ່ ປະ­ເທດ​ໄທ ເປັນ​ເຈົ້າ­ພາບ ເມື່ອ​ປີ 2016 ທີມ​ນັກ­ກີ­ລາ​ກະ­ຕໍ້​ນັກ­ຮຽນ​ລາວ​ສາ­ມາດ​ຍາດ​ໄດ້​ພຽງ 1 ຫຼຽນ​ເງິນ ແລະ 1 ຫຼຽນ​ທອງ​ເທົ່າ​ນັ້ນ.

    ນອກ­ຈາກ​ນີ້​ຄະ­ນະ​ດັ່ງ­ກ່າວ​ຍັງ​ໄດ້​ມອບ​ເຄື່ອງ​ບຳ­ລຸງ​ສຸ­ຂະ­ພາບ​ຈຳ­ນວນ​ໜຶ່ງ​ໃຫ້​ແກ່​ຄູ​ເຝິກ ແລະ ນັກ­ກີ­ລາ ເພື່ອ​ເປັນ​ກຳ­ລັງ​ໃຈ ທັງ​ເປັນ​ສິ່ງ​ບຳ­ລຸງ​ຮ່າງ­ກາຍ ໃຫ້​ມີ​ກຳ­ລັງ​ແຮງ​ໃນ​ການ​ເຝິກ­ຊ້ອມ ໃນ​ການ​ກະ­ກຽມ ແລະ ເຂົ້າ​ຮ່ວມ​ແຂ່ງ­ຂັນ​ຢ່າງ​ມີ​ຜົນ­ສຳ­ເລັດ​ເປັນ​ກ້າວໆ.

ຂ່າວທີ່ກ່ຽວຂ້ອງ