ຫາ­ລື​ຄວາມ​ພ້ອມ ເຂົ້າ​ຮ່ວມ​ຊີ­ເກມ ທີ່​ມາ​ເລ​ເຊຍ

710 06 ກ.ກ. 2017 ວົງຈອນກີລາ
ຫາ­ລື​ຄວາມ​ພ້ອມ ເຂົ້າ​ຮ່ວມ​ຊີ­ເກມ ທີ່​ມາ​ເລ​ເຊຍ

    ກອງ​ປະ­ຊຸມ​ປຶກ­ສາ​ຫາ­ລືຮ່ວມ​ກັບ​ສະ­ຫະ­ພັນ​ກີ­ລາ​ແຫ່ງ​ຊາດ 14 ປະ­ເພດ​ກີ­ລາ​ເປົ້າ​ໝາຍ ໃນ​ການ​ກະ­ກຽມ​ຄວາມ​ພ້ອມ​ດ້ານ​ຕ່າງໆ ເພື່ອ​ສົ່ງ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ 29 ທີ່​ປະ­ເທດ​ມາ​ເລ​ເຊຍ ເປັນ​ເຈົ້າ­ພາບ ໃນ​ທ້າຍ​ເດືອນ​ສິງ­ຫາ​ນີ້ ໄດ້​ຈັດ​ຂຶ້ນ​ເມື່ອ​ວັນ​ທີ 30 ມິ­ຖຸ­ນາ 2017 ຜ່ານ​ມາ ທີ່​ກະ­ຊວງ​ສຶກ​ສາ​ທິ​ການ ແລະ ກີ­ລາ ໂດຍ​ມີ​ທ່ານ ແສງ​ພອນ ພົນ​ອາ­ມາດ ຫົວ­ໜ້າ​ກົມ​ກີ­ລາ​ລະ­ດັບ​ສູງ ກະ­ຊວງ​ສຶກ​ສາ​ທິ​ການ ແລະ ກີ­ລາ ມີ​ທ່ານ ກະ­ເສມ ອິນ​ທິ​ລາ ຮອງ​ເລ­ຂາ­ທິ­ການ​ຄະ­ນະ​ບໍ­ລິ­ຫານ​ງານ​ໂອ​ແລມ​ປິກ​ແຫ່ງ​ຊາດ​ລາວ ພ້ອມ​ດ້ວຍ​ບັນ­ດາ​ປະ­ທານ-ຮອງ​ປະ­ທານ​ສະ­ຫະ­ພັນ​ກີ­ລາ​ແຫ່ງ​ຊາດ 14 ປະ­ເພດ ແລະ ພາກ­ສ່ວນ​ທີ່​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ແສງ​ພອນ ພົນ​ອາ­ມາດ ກ່າວ​ວ່າ: ກອງ​ປະ­ຊຸມ​ໃນ​ຄັ້ງ​ນີ້ ແມ່ນ​ເພື່ອ​ຮ່ວມ​ປຶກ­ສາ​ຫາ­ລື​ກັບ​ໃນ​ການ​ກຽມ​ຄວາມ​ພ້ອມ​ຂອງ​ນັກ­ກີ­ລາ ຮ່ວມ​ກັບ​ສະ­ຫະ­ພັນ​ກີ­ລາ​ແຫ່ງ​ຊາດ  14 ປະ­ເພດ​ເປົ້າ​ໝາຍ ປະ ກອບ​ມີ: ເປ​ຕັງ ເທ​ຄວັນ​ໂດ ວູ​ຊູ ກະ­ຕໍ້ ສະ­ນຸກ​ເກີ້-ບິນ​ລຽດ ລົດ­ຖີບ ຍິງ​ທະ­ນູ ມວຍ​ສາ­ກົນ ປັນ​ຈັກ​ສີ​ລັດ ແລ່ນ-ລານ ລອຍ­ນ້ຳ ກາ​ຣາ​ເຕ​ໂດ ຢູ​ໂດ ແລະ ມວຍ​ລາວ ກ່ອນ​ເຂົ້າ​ຮ່ວມ​ຊີ­ເກມ ຄັ້ງ​ທີ 9 ລວມ​ທັງ​ເລື່ອງ​ງົບ­ປະ­ມານ ແລະ ສິ່ງ​ອຳ­ນວຍ​ຄວາມ​ສະ­ດວກ​ຕ່າງໆ ໃຫ້​ຮັບ​ຮູ້ ແລະ ປຶກ­ສາ​ຫາ­ລື​ກັນ​ວ່າ​ຈະ​ເຮັດ​ແນວ­ໃດ ໃຫ້​ກີ­ລາ​ທັງ​ໝົດ ສ້າງ​ຜົນ­ງານ​ທີ່​ດີ​ທີ່​ສຸດ​ໃນ​ການ​ເຂົ້າ​ຮ່ວມ​ຊີ­ເກມ​ຄັ້ງ​ນີ້.

    ຄຽງ​ຄູ່​ກັນ​ນັ້ນ ຮຽກ­ຮ້ອງ​ໃຫ້​ສະ­ຫະ­ພັນ​ກີ­ລາ​ແຫ່ງ​ຊາດ​ທັງ 14 ປະ­ເພດ ເອົາ­ໃຈ­ໃສ່​ສືບ­ຕໍ່​ເຝິກ­ຊ້ອມ​ໃຫ້​ຕໍ່​ເນື່ອງ ແລະ ເປັນ​ລະ­ບົບ ພ້ອມ​ທັງ​ເບິ່ງ­ແຍງ​ຊີ­ວິດ​ການ​ເປັນ​ຢູ່​ຂອງ​ນັກ­ກີ­ລາ​ໃນ​ຂະ­ນະ​ທີ່​ກຳ­ລັງ​ທຳ​ການ​ເຝິກ­ຊ້ອມ ທັງ​ເລື່ອງ​ສຸ­ຂະ­ພາບ ພະ­ລະ​ກຳ­ລັງ ສະ­ພາບ​ຮ່າງ­ກາຍ ຈິດ­ໃຈ ແລະ ອື່ນໆ ເພື່ອ​ສ້າງ​ຄວາມ​ໝັ້ນ​ໃຈ ແລະ ຄວາມ​ພ້ອມ​ຢ່າງ­ຮອບ­ດ້ານ ເຮັດ​ໃຫ້​ໃນ​ເວ­ລາ​ແຂ່ງ­ຂັນ​ຕົວ​ຈິງ​ສາ­ມາດ​ສ້າງ​ໄດ້​ບັນ­ດາ​ຜົນ­ງານ ກໍ່​ຄື​ການ​ຍາດ​ເອົາ​ຫຼຽນ​ລາງ ວັນ ໃຫ້​ກັບ​ທີມ​ນັກ­ກີ­ລາ​ລາວ​ເຮົາ.

    ສຳ­ລັບ​ການ​ເຂົ້າ​ຮ່ວມ ຊີ­ເກມ ຄັ້ງ​ທີ 29 ທີ່​ປະ­ເທດ​ມາ​ເລ​ເຊຍ​ໃນ​ຄັ້ງ​ນີ້ ສປປ ລາວ ແມ່ນ​ຈະ​ສົ່ງ​ເຂົ້າ​ຮ່ວມ​ທັງ​ໝົດ 23 ປະ­ເພດ​ກີ­ລາ ນອກ­ຈາກ 14 ປະ­ເພດ​ແລ້ວ ຍັງ​ມີ: ກະ­ຕໍ້Œຊິນ​ລອນ ເຕະ­ບານ ຣັກ​ບີ້ ລົດ­ຖີບ ຍິງ​ປືນ ເທັນ​ນິ​ສ ດອກ​ປິກ​ໄກ່ ກ໊ອຟ ແລະ ບານ­ບ້ວງ.

ຂ່າວທີ່ກ່ຽວຂ້ອງ