ສ.ເກົາ­ຫຼີ-ສ.ອາ​ເມ​ຣິ​ກາ ຊ້ອມ​ຮົບ​ດ້ວຍ​ລູກ​ສອນ​ໄຟ ເພື່ອ​ແຈ້ງ​ເຕືອນ​ໄປ​ຍັງ ສປປ ເກົາ­ຫຼີ

287 06 ກ.ກ. 2017 ຂ່າວຕ່າງປະເທດ
ສ.ເກົາ­ຫຼີ-ສ.ອາ​ເມ​ຣິ​ກາ ຊ້ອມ​ຮົບ​ດ້ວຍ​ລູກ​ສອນ​ໄຟ ເພື່ອ​ແຈ້ງ​ເຕືອນ​ໄປ​ຍັງ ສປປ ເກົາ­ຫຼີ

ຂ່າວ­ສານ Yonhap ອ້າງ​ຕາມ​ແຫຼ່ງ​ຂ່າວ​ການ​ທະ­ຫານ​ຂອງ ສ.ເກົາ­ຫຼີ ໃຫ້​ຮູ້​ວ່າ ວັນ​ທີ 5 ກໍ­ລະ­ກົດ​ນີ້ ກອງ​ກຳ­ລັງ​ທະ­ຫານ​ຂອງ ສ.ເກົາ­ຫຼີ ແລະ ສ.ອາ​ເມ​ຣິ​ກາ ໄດ້​ຮ່ວມ​ກັນ​ດຳ­ເນີນ​ການ​ຊ້ອມ​ຮົບ​ຂະ­ໜາດ​ໃຫຍ່ ດ້ວຍ​ລູກ​ສອນ​ໄຟ​ນຳ​ວິ­ຖີ ເພື່ອ​ເປັນ​ການ​ນຳ​ເອົາ​ຄຳ​ແຈ້ງ​ເຕືອນ​ໄປ​ຍັງ ສປປ ເກົາ­ຫຼີ.

ສະ­ພາ​ເສ­ນາ​ທິ​ການ​ຮ່ວມ​ຂອງ​ກອງ­ທັບ ສ.ເກົາ­ຫຼີ ໃຫ້​ຮູ້​ວ່າ ໃນ​ການ​ຊ້ອມ​ຮົບ​ເທື່ອ​ນີ້ ຊຶ່ງ​ຈັດ​ຂຶ້ນ 1 ວັນ ຫຼັງ​ຈາກ​ທີ່ ສປປ ເກົາ­ຫຼີ ຖະ­ແຫຼງ​ເຖິງ​ຄວາມ​ສຳ­ເລັດ​ໃນ​ການ​ຍິງ​ລູກ​ສອນ​ໄຟ​ຂະ­ໜາດ​ໄກ ໂດຍ​ກອງ​ກຳ­ລັງ​ພັນ­ທະ​ມິດ​ໄດ້​ຍິງ​ລູກ​ສອນ​ໄຟ Hyunmoo-2 ແລະ ATACMS ຫຼາຍ​ໜ່ວຍ​ອອກ​ໄປ​ເຂດ​ທະ­ເລ​ທິດ­ຕາ­ເວັນ­ອອກ.

ການ­ເຄື່ອນ­ໄຫວ​ດັ່ງ­ກ່າວ​ມີ​ຂຶ້ນ​ເພື່ອ​ເປັນ​ການ​ຕອບ​ໂຕ້​ຕໍ່​ຖະ­ແຫຼງ­ການ​ຂອງ ສປປ ເກົາ­ຫຼີ ທີ່​ວ່າ ເຂົາ­ເຈົ້າ​ໄດ້​ເປັນ​ເຈົ້າ​ການ​ດ້ານ​ເຕັກ​ໂນ​ໂລ​ຊີ​ໃຫ້​ແກ່​ລູກ​ສອນ​ໄຟ​ນຳ​ວິ­ຖີ​ຂ້າມ​ທະ­ວີບ (ICBM) ກັບ​ຄືນ​ສູ່​ຊັ້ນ​ອາ­ກາດ.

ກ່ອນ​ໜ້າ​ນັ້ນ ເມື່ອ​ວັນ​ທີ 4 ກໍ­ລະ­ກົດ ສປປ ເກົາ­ຫຼີ ຖະ­ແຫຼງ​ວ່າ ໃນ​ວັນ​ດຽວ​ກັນ ປະ­ເທດ​ນີ້​ໄດ້​ປະ­ສົບ​ຄວາມ​ສຳ­ເລັດ​ໃນ​ການ​ທົດ​ລອງ ICBM ເທື່ອ​ໃໝ່ ພາຍ​ໃຕ້​ການ​ຕິດ­ຕາມ​ກວດ­ກາ​ຂອງ​ທ່ານ​ຜູ້­ນຳ ກິມ ເຈິງ​ອູນ ພ້ອມ​ກັນ​ນັ້ນ​ກໍ​ຢືນ­ຢັນ​ວ່າ ອາ­ວຸດ​ປະ­ເພດ​ນີ້​ສາ­ມາດ​ຍິງ​ໄປ​ຍັງ​ບ່ອນ​ໃດ​ຢູ່​ໃນ​ໂລກ​ກໍ​ໄດ້.

ໂທລະ­ພາບ​ແຫ່ງ​ລັດ ສປປ ເກົາ­ຫຼີ ໃຫ້​ຮູ້​ວ່າ ລູກ​ສອນ​ໄຟ Hwasong-14 ດັ່ງ­ກ່າວ ໄດ້​ບັນ­ລຸ​ລະ­ດັບ​ສູງ 2.802 ກມ ແລະ ໄລ­ຍະ​ໄກ 933 ກມ ໃນ​ການ​ຍິງ​ທົດ​ລອງ​ເທື່ອ ນີ້. ແຫຼ່ງ​ຂ່າວ​ດຽວ​ກັນ​ນີ້​ກໍ​ຢືນ­ຢັນ​ວ່າ ລູກ​ສອນ​ໄຟ​ທີ່​ຍິງ​ໄປ​ນັ້ນ​ໄດ້​ຍິງ​ຖືກ​ເປົ້າ ຫຼັງ​ຈາກ​ທີ່​ມັນ​ບິນ​ໄປ​ໄດ້​ປະ­ມານ 39 ນາ­ທີ.

ຂ່າວທີ່ກ່ຽວຂ້ອງ