ສັງຄົມເລີ່ມໃຫ້ຄວາມສົນໃຈບໍລິສັດຈັດຫາງານຫຼາຍຂຶ້ນ

332 13 ກ.ກ. 2017 ຂ່າວໜ້າ​ໜຶ່ງ
ສັງຄົມເລີ່ມໃຫ້ຄວາມສົນໃຈບໍລິສັດຈັດຫາງານຫຼາຍຂຶ້ນ

ສະພາບ​ເສດຖະກິດ-ສັງຄົມ ມີ​ການ​ຂະຫຍາຍຕົວ​ຢ່າງ​ຕໍ່​ເນື່ອງ ເຮັດ​ໃຫ້​ເກີດ​ມີແຮງ​ງານ​ມີ​ການເຄື່ອນ​ຍ້າຍ​ລະຫວ່າງ​ປະເທດ ໂດຍ​ສະເພາະແມ່ນ​ປະເທດ​ໃກ້ຄຽງ ທັງ​ໃນ​ຮູບ​ແບບ​ຖືກ​ກົດໝາຍ ແລະ ບໍ່​ຖືກ​ກົດໝາຍ ທີ່​ມີ​ມາ​ແຕ່ດົນ​ນານ ເຊິ່ງ​ເປັນ​ທີ່​ມາ​ຂອງການ​ຖືກ​ເອົາ​ລັດ​ເອົາ​ປຽບ​ຈາກນາຍ​ຈ້າງ ​ມີ​ການ​ຂູດ​ຂີດ​ແຮງ​ງານ ຈ່າຍ​ເງິນ​ບໍ່​ໄດ້​ຄົບ​ຕາມ​ຈຳນວນຕົກລົງ​ກັນ​ໄວ້.

ທ່ານ ດວງ​ພະຈັນ ສີ​ຫາ​ພົນ ຜູ້ອຳນວຍການບໍລິສັດ ​ດວງ​ພະຈັນ ບໍລິການ​ຈັດ​ຫາ​ງານ ຈຳກັດຜູ້​ດຽວ ​ກ່າວ​ວ່າ: ກິດຈະການ​ບໍ​ລິການ​ຈັດ​ຫາ​ງານ​ໃນ ​ສປປ ລາວ ເລີ່ມ​ຄຶກຄື້ນ​ຂຶ້ນ​ມາ ພາຍຫຼັງ​ທີ່​ລັດຖະ​ບານ​ໄດ້​ມີ​ການ​ເຊັນ​ສັນຍາຮ່ວມ​ມື​ດ້ານ​ແຮງ​ງານ​ກັບ ສ ເກົາຫຼີ ເຊິ່ງ​ກ່ອນ​ໜ້າ​ນັ້ນ​ໄດ້​ມີ​ການເຊັນ​ສັນຍາຮ່ວມ​ມື​ກັບ​ຣາ​ຊະ​ອານາ​ຈັກ​ໄທ ແລະ ຍີ່ປຸ່ນ ບໍລິສັດ ດວງ​ພະຈັນ ທີ່​ດຳເນີນ​ກິດ​ຈະການ​ໃຫ້​ບໍລິການ​ຈັດ​ສົ່ງ​ແຮງ​ງານທັງ​ພາຍ​ໃນ ແລະ ຕ່າງປະເທດ ມາ​ເປັນ​ເວລາ​ເກືອບ 10 ປີ ແຕ່ລະ​ປີ​ໄດ້​ຈັດ​ສົ່ງ​ແຮງ​ງານ​ໄປ​ປະເທດ​ຍີ່ປຸ່ນ ສະເລ່ຍ 50 ຄົນ​ຕໍ່​ປີ ຂະແໜງ​ທີ່​ຈັດ​ສົ່ງ​ແຮງ​ງານ​ໄປເຮັດ​ວຽກ​ຢູ່​ຍີ່ປຸ່ນ ແມ່ນ​ຂະແໜງກະສິກຳ ມີ​ອາຍຸ​ຢູ່​ໃນ​ເກນ 22-30 ປີ ມີ​ຄວາມ​ດຸໝັ່ນ ອົດທົນ​ຕໍ່ໜ້າ​ວຽກ ສາມາດ​ອ່ານ​ຂຽນ​ພາສາ​ລາວ​ໄດ້ ສຳລັບ​ແຮງ​ງານ​ທີ່ຈັດ​ສົ່ງ​ເພື່ອ​ໄປ​ເຮັດ​ວຽກ​ທີ່​ປະເທດໄທ ແມ່ນ​ອາຍຸ​ບໍ່​ຕ່ຳ​ກວ່າ 18 ປີ ສາມາດ​ເຮັດ​ວຽກ​ຕາມ​ຮ້ານ​ອາຫານ ໂຮງງານ ແລະ ບໍລິສັດເຈຍ​ລະ​ໄນ​ເພັດ ເປັນຕົ້ນ.

ໃນ​ແຕ່​ລະ​ປີ​ຈະ​ມີແຮງ​ງານລາວ​ຂ້າມ​ໄປ​ເຮັດ​ວຽກ​ຢູ່​ປະເທດໃກ້​ຄຽງ ໃນ​ລະດັບ​ແຮງ​ງານ​ຂັ້ນຕ່ຳ ປະມານ 2-3 ແສນ​ຄົນ​ຕໍ່​ປີ ທັງ​ໃນ​ລະບົບ​ການ​ຜ່ານ​ບໍລິສັດຈັດ​ຫາ​ງານ ແລະ ໄປ​ແບບ​ບໍ່​ຖືກກົດໝາຍ ເຊິ່ງ​ປາສະຈາກ​ບໍ່​ໄດ້ທີ່​ແຮງ​ງານ​ທີ່​ໄປ​ແບບ​ບໍ່​ຖືກ​ກົດໝາຍ ຈະ​ຖືກ​ເອົາ​ປຽບ​ຈາກ​ນາຍຈ້າງ ປັດຈຸບັນ ເຫັນ​ວ່າ​ເຫຼົ່ານັ້ນເລີ່ມ​ເຂົ້າ​ມາ​ໃຊ້​ບໍລິການ​ຜ່ານ​ລະບົບ​ຈັດ​ຫາ​ງານ ດ້ວຍ​ຄ່າ​ໃຊ້​ຈ່າຍ 6.000-8.000 ບາດ (ສະກຸນເງິນ​ໄທ) ຫຼື ປະມານ 1,5-2,08 ລ້ານ​ກີບ ໃນ​ລະດັບ​ຄ່າ​ແຮງ​ງານ 2-2,5 ລ້ານ​ກີບ​ຕໍ່​ເດືອນ ອາຍຸຂອງ​ບັດ 2 ປີ ສາມາດ​ຕໍ່​ໄດ້​ອີກ 2 ປີ ມີ​ການ​ຄ້ຳປະກັນ​ຫຼາຍ​ຢ່າງ ເຊັ່ນ: ຖ້າ​ນາຍ​ຈ້າງ​ບໍ່​ປະຕິບັດຕາມ​ສັນຍາ​ແຮງ​ງານ ​ສາມາດຮ້ອງ​ຟ້ອງ​ເອົາ​ເງິນ​ຊົດ​ເຊີຍ​ຕາມກົດໝາຍ​ແຮງ​ງານ ແລະ ສະຫວັດ​ດີ​ການ-ສັງຄົມ​ຂອງ​ສອງ​ປະເທດ​ໄດ້​ເຊັນ​ສັນຍາ​ຮ່ວມ​ກັນ​ໄວ້ແຕ່​ເບື້ອງ​ຕົ້ນ.

ຄວາມ​ຈິງ ບໍລິສັດ​ກໍ່ສ້າງ​ໂຮງງານ​ຕັດຫຍິບ​ຫຼາຍ​ແຫ່ງ​ໃນ ​ສປປ ລາວ ຍັງ​ມີ​ຄວາມ​ຕ້ອງການ​ແຮງງານ​ໃນ​ລະດັບ​ຕົວ​ເລກ​ທີ່​ຂ້ອນຂ້າງ​ສູງ​ພໍ​ສົມຄວນ ໂດຍ​ສະເພາະ ຮ້ານ​ອາຫານ ຮ້ານ​ກາເຟ​ສົດ ລວມ​ທັງ​ໂຮງງານ​ໃນ​ເຂດ​ເສດ​ຖະກິດ​ພິເສດ ແລະ ເຂດ​ຖະ​ກິດສະເພາະ ​ທີ່​ເລີ່ມ​ທຳ​ການ​ຜະລິດ​ໃນບາງ​ຫົວໜ່ວຍ​ທຸລະ​ກິດແຕ່​ແຮງງານ ​ທີ່​ຕ້ອງການ​ງານ​ສ່ວນ​ໃຫຍ່​ຢູ່ເຂດ​ນອກ​ຕົວ​ເມືອງ​ຈິ່ງ​ເປັນ​ບັນຫາ​ຂອງ​ການ​ສື່ສານ ລະຫວ່າງຜູ້​ທີ່​ຕ້ອງການ​ວຽກ​ເຮັດ ແລະ ຜູ້ຈ້າງ​ງານ ບໍ່​ສາມາດ​ພົບ​ປະກັນໂດຍ​ກົງ​ໄດ້ ຈິ່ງ​ເກີດ​ມີ​ຊ່ອງ​ຫວ່າງຂອງ​ການ​ຈ້າງ​ງານ​ດັ່ງ​ທີ່​ເຫັນ​ໃນປັດຈຸບັນ.

ຂ່າວທີ່ກ່ຽວຂ້ອງ