ປະທານສະພາ ລົງຕິດຕາມໂຄງການສ້າງສະຖານີລົດໄຟ ລາວ-ຈີນ

448 13 ກ.ກ. 2017 ຂ່າວໜ້າ​ໜຶ່ງ
ປະທານສະພາ ລົງຕິດຕາມໂຄງການສ້າງສະຖານີລົດໄຟ ລາວ-ຈີນ

ທ່ານ​ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ ພ້ອມ​ດ້ວຍຄະນະ ​ໄດ້​ລົງ​ເຄື່ອນ​ໄຫວ​ຢ້ຽມຢາມ ແລະ ເຮັດ​ວຽກ​ຢູ່​ເມືອງ​ໄຊ​ທານີ ນະຄອນຫຼວງ​ວຽງ​ຈັນ ເພື່ອ​ຕິດຕາມ​ການຈັດຕັ້ງ​ປະຕິບັດ​ໂຄງການ​ສ້າງ​ສະຖານີ​ລົດໄຟ​ລາວ-ຈີນ ແລະ ຮັບ​ຟັງ​ຄຳ​ຄິດ​ເຫັນຂອງ​ພໍ່​ແມ່​ປະຊາຊົນ​ທີ່​ຖືກ​ຜົນ​ກະທົບ​ຈາກ​ໂຄງການ ໃນ​ວັນ​ທີ 12 ກໍລະກົດ 2017 ໂດຍ​ມີທ່ານ ຈັນທະລາ ອິນ​ທະລັງ​ສີ ເຈົ້າເມືອງໄຊ​ທານີ ພ້ອມ​ດ້ວຍ​ອຳນາດ​ການປົກຄອງ​ເມືອງ ແລະ ພໍ່​ແມ່​ປະຊາຊົນ​ໃຫ້ການ​ຕ້ອນຮັບ.

ການ​ລົງ​ເຄື່ອນ​ໄຫວ​ຄັ້ງ​ນີ້ ທ່ານປະທານ​ສະພາ​ແຫ່ງ​ຊາດ ພ້ອມຄະນະ ໄດ້​ລົງ​ກວດກາ​ສະຖານທີ່​ຈະ​ສ້າງ​ສະຖານີ​ລົງ​ໄຟ ລາວ-ຈີນ​ຢູ່​ບ້ານ​ໄຊ ຈາກ​ນັ້ນ ກໍ່​ໄດ້​ຮັບຟັງ​ການ​ລາຍ​ງານ​ຂອງ​ຄະນະ​ກຳມະ​ການ​ໄກ່​ເກ່ຍ​ສິ່ງ​ກີດຂວາງ​ຂັ້ນເມືອງ ກ່ຽວ​ກັບ​ຜົນ​ການ​ເກັບ​ກຳຂໍ້​ມູນ​ຜູ້​ທີ່​ຖືກ​ກະທົບ​ຂອງ​ໂຄງການ​ໂດຍ​ເມືອງ​ໄຊ​ທານີ ມີ​ແລວ​ທາງລົດໄຟ​ຜ່ານທັງ​ໝົດ 17,5 ກິ​ໂລແມັດ ໃນ​ນັ້ນ ມີ 1 ສະຖານີ​ໃຫຍ່ ເນື້ອທີ່ 150 ເຮັກຕາ ກວມ​ເອົາ 11 ບ້ານ​ຄື ບ້ານ​ໜອງ​ພະຍາ ນາທົ່ມ ໜອງ​ວຽງ​ຄຳ ດອນ​ໜູນ ດົງສ້າງ​ຫີນ ໂຄກ​ໃຫຍ່ ໂຄກ​ນ້ອຍ ສະພັງ​ຄະ​ນົງ ໂຄກ​ສະອາດ ຫົວຊຽງ ແລະ ບ້ານ​ໄຊ ປັດຈຸບັນແມ່ນ​ມີ​ການ​ກໍ່ສ້າງ ແລະ ປັກ​ຫຼັກເຂດ​ສະຫງວນ​ການ​ກໍ່ສ້າງ​ມີຄວາມ​ຍາວ 11,4 ກິໂລແມັດ ກວມ​ເອົາ 7 ບ້ານ​ຄື: ບ້ານ​ໜອງພະຍາ ນາ​ທົ່ມ ໜອງ​ວຽງ​ຄຳ ດອນ​ໜູນ ດົງ​ສ້າງ​ຫີນ ໂຄກ​ໃຫຍ່ ແລະ ບ້ານ​ໄຊ ຜ່ານ​ການຈັດຕັ້ງປະຕິບັດ​ເກັບ​ກຳ​ຂໍ້​ມູນ​ຕົວ​ຈິງ​ຂອງຄະນະ​ຮັບຜິດຊອບ ການ​ກຳນົດເຂດ​ສະຫງວນ​ແລວ​ທາງ​ແມ່ນມີ​ການ​ປ່ຽນແປງ​ຂອບ​ເຂດ​ຄືນໃໝ່ ຄື: ກຳນົດ​ເອົາ​ເຂດ​ສະຫງວນ 50 ແມັດ ນັບ​ຈາກ​ໃຈກາງ​ທາງອອກ​ໄປ​ເບື້ອງ​ລະ 25 ແມັດ ບ່ອນທີ່​ມີ​ການ​ກໍ່ສ້າງ​ຂົວ​ຂ້າມ​ຊຸມ​ຊົມ ຫຼື ຜ່ານ​ເສັ້ນທາງ​ແມ່ນ​ສະເລ່ຍ 15 ແມັດ ນັບ​ຈາກ​ໃຈ​ກາງຂອງແລວ​ທາງ​ເບື້ອງ​ລະ 7,5 ແມັດ ລວມ​ມີ​ຄວາມ​ຍາວທັງ​ໝົດ 3.000 ແມັດ ກວ້າງ 500 ແມັດ ມີ​ຜູ້​ທີ່​ຖືກ​ຜົນ​ກະທົບ​ໃນ​ກໍລະນີ ເຂດ​ສະຫງວນ 100 ແມັດ ໃນ 11 ບ້ານ (ບໍ່​ລວມ​ຂອບ​ເຂດ​ສະ​ຖານີ) ຖືກ​ດິນ​ປຸກ​ສ້າງ ຈຳນວນ 333 ກໍລະນີ ຖືກ​ຕອນ​ດິນ​ປຸກສ້າງ 328 ຕອນດິນ​ສວນ ແລະ ດິນ​ຄັງ 26 ຕອນ ດິນ​ນາ 146 ຕອນ ແລະ ຖືກ​ໜອງ​ປາປະ​ຊາຊົນ ຈຳນວນ 28 ໜອງ ແລະ ຄອບຄົວ​ຜູ້​ຖືກ​ຜົນ​ກະທົບ​ແລວທາງ​ລົດໄຟ​ຂອບ​ເຂດ​ສະຫງວນ 50 ແມັດ ໃນ​ບ້ານ​ໜອງ​ພະຍາດອນ​ໜູນ ດົງ​ສ້າງ​ຫີນ ແລະ ບ້ານ​ໄຊ ມີ​ຈຳນວນ​ທັງ​ໝົດ 203 ຕອນ ພ້ອມ​ນັ້ນ ປະຊາຊົນ​ຜູ້​ຖືກຜົນ​ກະທົບ​ຈາກ​ໂຄງການ ກໍ່​ໄດ້ໃຫ້ການ​ປະກອບ​ຄຳ​ເຫັນ​ຫຼາຍບັນຫາ​ທີ່​ປະຊາຊົນ​ໃຫ້​ຄວາມ​ສົນໃຈ ເປັນຕົ້ນ​ແມ່ນ ການ​ຊົດ​ເຊີຍທີ່​ດິນ​ຄືນ​ປະຊາຊົນ ການ​ປັກ​ຫຼັກເຂດ​ສະຫງວນ​ຂອບ​ແລວ​ທາງ​ທີ່ເຫັນ​ວ່າ​ຍັງ​ບໍ່​ທັນ​ຈະແຈ້ງ ແລະ ອື່ນໆ ເພື່ອ​ໃຫ້​ປະທານ​ສະພາ​ນຳເອົາ​ຄຳ​ຄິດ​ເຫັນ​ດັ່ງກ່າວ​ສະເໜີ​ຕໍ່ລັດຖະບານ ກໍ່​ຄື​ພາກສ່ວນ​ກ່ຽວຂ້ອງ​ເພື່ອ​ແກ້​ໄຂ​ໃຫ້​ທັນ​ການ.

ຂ່າວທີ່ກ່ຽວຂ້ອງ