ນະຄອນຫຼວງ ຫວນຄືນມູນເຊື້ອປະຫວັດສາດ ລາວ-ຫວຽດນາມ

256 17 ກ.ກ. 2017 ຂ່າວໜ້າ​ໜຶ່ງ
ນະຄອນຫຼວງ ຫວນຄືນມູນເຊື້ອປະຫວັດສາດ ລາວ-ຫວຽດນາມ

ຄະນະ​ໂຄສະນາ​ອົບຮົມ​ນະຄອນ​ຫຼວງ​ວຽງ​ຈັນ (ນວ) ໄດ້​ຈັດປາຖະກະຖາ ເນື່ອງ​ໃນ​ໂອກາດສະເຫຼີມສະຫຼອງ​ປີ​ສາມັກຄີ​ມິດ​ຕະພາບ ລາວ-ຫວຽດນາມ ຫວຽດນາມ-ລາວ ຄື: ວັນ​ເຊັນ​ສົນທິ​ສັນຍາ​ມິດຕະພາບ-ການ​ຮ່ວມ​ມື ຄົບຮອບ 40 ປີ ແລະ ວັນ​ສ້າງຕັ້ງສາຍ​ພົວພັນ​ການ​ທູດ ຄົບຮອບ 55 ປີ ຂຶ້ນ​ວັນ​ທີ 14 ກໍລະກົດ 2017 ທີ່​ປົກຄອງ ນວ ໃຫ້​ກຽດ​ປາຖະ​ກະຖາ​ໂດຍ​ທ່ານ ສົມ​ສະຫວາດ ເລັ່ງ​ສະ​ຫວັດ ອະດີດ​ຮອງນາຍົກລັດຖະມົນຕີ ທີ່​ປຶກສາ​ຄະນະ​ບໍລິຫານ​ງານ​ສູນ​ກາງ​ພັກ​ສະໄໝ​ທີ X ມີ​ທ່ານ ສີ​ຫຸນ ສິດທິ​ລືໄຊ ຮອງ​ເລຂາ​ຄະນະ​ພັກ ຮອງເຈົ້າ​ຄອງ ນວ ບັນດາ​ການ​ນຳ​ພະນັກ​ງານ​ຫຼັກ​ແຫຼ່ງ​ອ້ອມ​ຂ້າງ ນວ ສະມາຄົມ ແລະ ນັກທຸລະກິດຫວຽດນາມ ທີ່​ມາ​ດຳເນີນ​ທຸລະກິດ​ຢູ່ ​ສປປ ລາວ ເຂົ້າ​ຮ່ວມ 350 ທ່ານ.

ການ​ປາຖະກະຖາ​ຄັ້ງ​ນີ້ ກໍ່​ເພື່ອໃຫ້​ຜູ້​ເຂົ້າ​ຮ່ວມ​ເຫັນ​ໄດ້​ການ​ພົວພັນ​ຮ່ວມ​ມື​ທີ່​ມີ​ຜົນສຳເລັດ​ເປັນກ້າວໆ ​ໃນ​ໄລຍະ​ຜ່ານ​ມາ​ຂອງສອງ​ຊາດ ລາວ-ຫວຽດນາມ ໂດຍ​ທ່ານ ສົມ​ສະຫວາດ ເລັ່ງ​ສະຫວັດ ໄດ້​ຍົກ​ໃຫ້​ເຫັນ​ຄວາມໝາຍ​ຄວາມ​ສຳຄັນ​ສອງ​ວັນ​ປະຫວັດ​ສາດ ລາວ-ຫວຽດນາມ ຄື: ວັນ​ສ້າງຕັ້ງ​ສາຍ​ພົວພັນ​ການ​ທູດແມ່ນ​ວັນ​ທີ 5 ກັນຍາ 1962 ແລະ ວັນ​ເຊັນ​ສົນທິສັນຍາ​ມິດຕະ​ພາບ-ການ​ຮ່ວມ​ມືແມ່ນ​ວັນ​ທີ 18 ກໍລະກົດ 1977 ເຊິ່ງ​ການ​ກຳເນີດ​ສອງ​ວັນ​ດັ່ງກ່າວ ​ກໍ່​ຍ້ອນລາວ-ຫວຽດນາມ ເປັນ​ປະເທດບ້ານ​ໃກ້​ເຮືອນ​ຄຽງ​ມີ​ຊາຍ​ແດນຮ່ວມ​ກັນ​ຫຼາຍ​ກວ່າ 2 ພັນ​ກິ​ໂລແມັດ ພ້ອມ​ກັນ​ອີງ​ຫຼັງ​ໃສ່​ສາຍພູຫຼວງ ພ້ອມ​ກັນ​ຮ່ວມ​ຊົມໃຊ້​ແມ່ນ້ຳ​ລຳເຊ​ພູຜາ​ປ່າດົງ ດິນ​ດອນຕ່ອນ​ຫຍ້າ​ເພື່ອ​ດຳລົງ​ຊີວິດ ແລະ ດຳເນີນ​ການ​ຕໍ່ສູ້​ຈັກກະພັດ​ຜູ້​ຮຸກຮານ ນອກ​ນີ້ ປະຊາຊົນ​ສອງ​ຊາດ ລາວ-ຫວຽດນາມ ມີ​ມູນເຊື້ອ​ໄປມາ​ຫາ​ສູ່ ແລກປ່ຽນ​ສິນຄ້າ ແລກປ່ຽນ​ວັດທະນະທຳຢູ່​ຫຼາຍ​ທ້ອງຖິ່ນ​ ກໍ່​ມີ​ບ້ານຫຼາຍ​ຄອບຄົວເປັນແກ່ວ​ເປັນ​ດອງ​ກັນ ມີ​ອຸດົມ​ຄະຕິ ແລະ ຄວາມ​ມຸ່ງ​ມາດ​ປາຖະໜາອັນ​ດຽວ​ກັນ ຄື​ຢາກ​ມີ​ຄວາມ​ເປັນເອກະລາດ ສັນຕິພາບ ແລະ ຄວາມ​ຮັ່ງມີ​ຜາ​ສຸກ ປະຊາຊົນສອງ​ຊາດ​ມີ​ມູນເຊື້ອຊ່ວຍເຫຼືອເຊິ່ງ​ກັນ ແລະ ກັນເປັນ​ພັນໆ​ປີ ​ໃນການ​ກໍ່​ຕັ້ງ ແລະ ປົກ​ປັກ​ຮັກສາ​ປະເທດ​ຊາດ​ຂອງ​ໃຜລາວ ພິເສດແມ່ນ​ໃນ​ໄລຍະ​ການ​ດຳເນີນ​ຕໍ່ສູ້ປະຕິວັດ​ເປັນ​ເວລາ​ເຄິ່ງ​ສະຕະວັດ ພາຍ​ໃຕ້​ການ​ນຳພາ​ຂອງ​ພັກກອມ​ມູ​ນິດ​ອິນດູຈີນ ຕໍ່​ມາ​ແມ່ນພັກ​ປະຊາຊົນປະຕິວັດ​ລາວ ແລະ ພັກ​ກອມ​ມູ​ນິດ​ຫວຽດນາມ ຄວາມ​ຜູກ​ພັນ​ສາມັກຄີ ແລະ ການ​ຊ່ວຍເຫຼືອ​ເຊິ່ງ​ກັນ ແລະ ກັນ ທີ່​ເປັນ​ມູນເຊື້ອ​ອັນ​ດີງາມ​ມາ​ແຕ່ດົນ​ນານ​ນັ້ນ ໄດ້​ເພີ່ມ​ຄວາມ​ແໜ້ນແຟ້ນ ແລະ ເຕີບ​ໃຫຍ່​ກາຍເປັນຄວາມ​ສາມັກຄີ​ພິເສດ ແລະ ການ​ພົວພັນ​ຮ່ວມ​ມື​ຮອບດ້ານຂອງ​ສອງ​ຊາດ ລາວ-ຫວຽດນາມ ໂດຍ​ແມ່ນ​ປະທານ ໂຮ່​ຈີ​ມິງ ປະທານ ໄກສອນ ພົມວິຫານ ແລະ ປະທານ ສຸ​ພານຸ​ວົງ ເປັນ​ຜູ້ລິ​ເລີ່ມ ຈາກ​ນັ້ນ​ມາ ການ​ນຳ​ແຕ່ລະ​ຮຸ່ນ​ຂອງ​ສອງ​ພັກ-ສອງ​ລັດ ແລະ ປະຊາຊົນ​ສອງ​ປະເທດ ຕ່າງ​ກໍ່​ໄດ້​ເອົາໃຈໃສ່​ປັບປຸງ​ເສີມຂະຫຍາຍ ​ໃຫ້​ກາຍເປັນ​ການ​ພົວພັນ​ສາມັກຄີ​ອັນ​ບໍລິສຸດ​ຜຸດ​ຜ່ອງທີ່​ຫາ​ຍາກ​ໃນ​ການ​ພົວພັນ​ສາກົນ ແລະ ກາຍເປັນ​ມໍລະດົກ​ອັນ​ລ້ຳຄ່າ​ຂອງ​ສອງ​ຊາດ ລາວ-ຫວຽດນາມ ການ​ພົວພັນ​ດັ່ງກ່າວ​ໄດ້ເຕີບ​ໃຫຍ່​ຂະຫຍາຍຕົວ​ໃນ​ແຕ່ລະ​ໄລຍະ​ຈົນ​ຮອດ​ປັດຈຸບັນ.

ຂ່າວທີ່ກ່ຽວຂ້ອງ