ຮ່ວມກັນປົກປັກຮັກສາສິ່ງແວດລ້ອມ

311 17 ກ.ກ. 2017 ຂ່າວໜ້າ​ໜຶ່ງ
ຮ່ວມກັນປົກປັກຮັກສາສິ່ງແວດລ້ອມ

ພິທີ​ເຊັນ​ບົດ​ບັນທຶກ​ການ​ຮ່ວມມື​ດ້ານ​ສິ່ງແວດລ້ອມ ລະຫວ່າງກະຊວງ​ຊັບພະຍາກອນ​ທຳ​ມະຊາດ ແລະ ສິ່ງແວດລ້ອມ (​ກຊສ) ກັບ​ສູນ​ກາງ​ແນວ​ລາວ​ສ້າງ​ຊາດ (​ສນຊ) ຈັດ​ຂຶ້ນ​ວັນ​ທີ 14 ກໍລະກົດ 2017 ຢູ່​ສູນ​ກາງ​ແນວ​ລາວ​ສ້າງ​ຊາດ ລົງ​ນາມ​ລະຫວ່າງ​ທ່ານ​ນາງ ບຸນ​ຄຳ ວໍລະ​ຈິດ ຮອງ​ລັດຖະມົນຕີ (​ກຊສ) ແລະ ທ່ານ ເຍຍ​ເກ່​ຍ່າ ໜໍ່​ຈໍ່​ຈົງ​ຕົວ ຮອງ​ປະທານ (​ສນຊ) ໂດຍ​ມີທ່ານ ໄຊ​ສົມ​ພອນ ພົມ​ວິຫານ ປະທານ ​ສນຊ ທ່ານ ສົມມາດ ພົນ​ເສນາ ລັດຖະມົນຕີ ​ກຊສ ເຂົ້າ​ຮ່ວມ​ເປັນ​ສັກຂີ​ພິຍານ.

ການ​ຮ່ວມ​ມື​ຈັດ​ຕັ້ງ​ປະຕິບັດວຽກ​ງານ ແລະ ໂຄງການ​ກ່ຽວກັບ​ການ​ຄຸ້ມ​ຄອງ​ຊັບພະຍາກອນທຳ​ມະ​ຊາດ ແລະ ສິ່ງແວດລ້ອມຂອງ​ສູນ​ກາງ​ແນວ​ລາວ​ສ້າງ​ຊາດ ແລະ ກະຊວງ​ຊັບພະຍາກອນ​ທຳມະ​ຊາດ ແລະ ສິ່ງແວດລ້ອມ ແມ່ນ​ມີ​ເປົ້າ​ໝາຍ​ສ້າງ​ຄວາມ​ເຂັ້ມແຂງ​ໃຫ້​ສູນ​ກາງ​ແນວ​ລາວ​ສ້າງຊາດ ແລະ ແນວ​ລາວ​ສ້າງ​ຊາດຂັ້ນ​ທ້ອງຖິ່ນ​ ໃນ​ວຽກ​ງານ​ສຶກ​ສາອົບຮົມ​ປຸກລະດົມ​ປະຊາຊົນ​ບັນດາ​ເຜົ່າ ເພດ-ໄວ ສາສະໜາຕ່າງໆ ມີ​ສ່ວນ​ປົກ​ປັກ​ຮັກສາ​ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ ທັງ​ເຮັດ​ບົດ​ບັນທຶກຕິດຕາມ​ກວດກາ​ການ​ຄຸ້ມ​ຄອງລັດ​ຢູ່​ຂັ້ນ​ທ້ອງຖິ່ນ ໃນ​ການ​ປົກ​ປັກຮັກສາ​ຊັບພະຍາກອນ​ທຳ​ມະຊາດ ແລະ ສິ່ງແວດລ້ອມ ໂດຍອີງ​ຕາມ​ເນື້ອ​ໃນ​ຈິດໃຈ​ຂອງ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ X ຂອງພັກ ລັດ​ຖະ​ທຳ​ມະນູນ​ສະບັບ​ປັບປຸງ 2015 ກົດໝາຍ​ວ່າ​ດ້ວຍການ​ປົກ​ປັກ​ຮັກສາ​ສິ່ງແວດລ້ອມສະບັບ​ປັບປຸງ ປີ 2012 ແລະ ກົດໝາຍ​ອື່ນໆ​ທີ່​ກ່ຽວຂ້ອງ.

ບົດ​ບັນທຶກ​ຄວາມ​ເຂົ້າໃຈ​ສະບັບ​ນີ້ ສ້າງ​ຂຶ້ນ​ບົນ​ພື້ນຖານ​ຜົນຂອງ​ກອງ​ປະຊຸມ​ປຶກສາ​ຫາລື​ຄັ້ງທຳ​ອິດ ກ່ຽວ​ກັບ​ການ​ຮ່ວມ​ມືລະຫວ່າງ (​ກຊສ) ກັບ (​ສນຊ) ແລະ ສ້າງ​ຂຶ້ນ​ບົນ​ພື້ນຖານ​ຜົນ​ການ​ປຶກສາ​ຫາລື​ລະດັບ​ວິຊາ​ການ ລະຫວ່າງກົມ​ຊົນເຜົ່າ​ສູນ​ກາງ​ແນວລາວ​ສ້າງ​ຊາດ ແລະ ກອງ​ທຶນປົກ​ປັກ​ຮັກສາ​ສິ່ງແວດລ້ອມ ກະຊວງ​ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ ​ໃນ​ເດືອນ​ມິຖຸ​ນາ 2017 ທີ່​ຜ່ານ​ມາ.

ຂ່າວທີ່ກ່ຽວຂ້ອງ