ຜູ້ນຳຣັດເຊຍ ປະກາດໃຫ້ນັກການທູດ ສ.ອາເມຣິກາ ຈຳນວນ 755 ຄົນ ອອກໄປຈາກຣັດເຊຍ

315 01 ສ.ຫ. 2017 ຂ່າວຕ່າງປະເທດ
ຜູ້ນຳຣັດເຊຍ ປະກາດໃຫ້ນັກການທູດ ສ.ອາເມຣິກາ ຈຳນວນ 755 ຄົນ ອອກໄປຈາກຣັດເຊຍ

ປະທານາທິບໍດີຣັດເຊຍ ວາລາດີເມຍ ປູຕິນ ຖະແຫຼງເມື່ອວັນທີ 30 ກໍລະກົດວ່າ ນັກການທູດຂອງ ສ.ອາເມຣິກາ ຈຳນວນ 755 ຄົນ ຈະຕ້ອງໄດ້ອອກໄປຈາກຣັດເຊຍ ຫຼັງຈາກທີ່ີທາງການຣັດເຊຍ ແຈ້ງອອກມາວ່າຈະຂັບໄລ່ເຈົ້າໜ້າທີ່ ສ.ອາເມຣິກາ ເພື່ອເປັນການຕອບໂຕ້ຕໍ່ມາດຕະການປິດລ້ອມເທື່ອໃໝ່ຂອງທາງການ ສ.ອາເມຣິກາ ທີ່ມີຕໍ່ຣັດເຊຍ.
ປະທານາທິບໍດີ ປູຕິນ ຕອບຄຳສຳພາດຜ່ານທາງໂທລະພາບຊ່ອງ Rossia-24 ວ່າໃນຂະນະນີ້ມີ 1.000 ກ່ວາຄົນ ພວມສືບຕໍ່ເຮັດວຽກຢູ່ໃນສະຖານທູດ ແລະ ບັນດາສະຖານກົງສູນຂອງ ສ.ອາເມຣິກາ ຢູ່ໃນຣັດເຊຍ ພ້ອມກັນນັ້ນທ່ານກໍໄດ້ຊີ້ແຈງວ່າ ຊາວອາເມຣິກັນ 755 ຄົນ ຈະຕ້ອງໄດ້ຢຸດການເຄື່ອນໄຫວຢູ່ໃນຣັດເຊຍ.
ກ່ອນໜ້ານັ້ນ ກະຊວງການຕ່າງປະເທດຣັດເຊຍ ໄດ້ສະເໜີໃຫ້ ສ.ອາເມຣິກາ ຕັດຫຼຸດການມີໜ້າທາງດ້ານການທູດຢູ່ໃນຣັດເຊຍ ລົງໃຫ້ຍັງເຫຼືອ 455 ຄົນ ພາຍໃນເດືອນກັນຍາໜ້ານີ້ ຊຶ່ງເປັນຕົວເລກທີ່ເທົ່າກັບເຈົ້າໜ້າທີ່ການທູດຂອງຣັດເຊຍ ຢູ່ໃນ ສ.ອາເມຣິກາ.
ເມື່ອວັນທີ 28 ກໍລະກົດທີ່ຜ່ານມາ ປະທານາທິບໍດີ ປູຕິນ ໄດ້ໃຫ້ສັດຕະຍາບັນຖະແຫຼງການຂອງກະຊວງການຕ່າງປະເທດຣັດເຊຍ ທີ່ນຳອອກມາເພື່ອເປັນການຕອບໂຕ້ຕໍ່ການທີ່ ສ.ອາເມຣິກາ ໃຊ້ມາດຕະການປິດລ້ອມຕ້ານຣັດເຊຍ.
ໃນຂະນະດຽວກັນ ກະຊວງການຕ່າງປະເທດຣັດເຊຍ ກໍແຈ້ງໃຫ້ຮູ້ເມື່ອວັນທີ 28 ກໍລະກົດທີ່ຜ່ານມາ ເຖິງການງົດເປັນການຊົ່ວຄາວໃນການອະນຸຍາດໃຫ້ສະຖານທູດ ສ.ອາເມຣິກາ ນຳໃຊ້ເຮືອນພັກຢູ່ໃນເຂດ Serebryannyi Bor ແລະ ເຮືອນສາງຢູ່ໃນພື້ນທີ່ນະຄອນຫຼວງມົດສະກູ ນັບແຕ່ວັນທີ 1 ສິງຫານີ້ ເປັນຕົ້ນໄປ ພ້ອມກັນນັ້ນ ກໍສະເໜີໃຫ້ຫຼຸດຜ່ອນຈຳນວນເຈົ້າໜ້າທີ່ຢູ່ໃນບັນດາອົງການດ້ານການທູດຂອງ ສ.ອາເມຣິກາ ຢູ່ໃນຣັດເຊຍ ລົງໃຫ້ຍັງເຫຼືອ 455 ຄົນ.
ເປັນທີ່ຊາບແລ້ວວ່າ ເມື່ອວັນທີ 27 ກໍລະກົດ ສະພາສູງ ສ.ອາເມຣິກາ ໄດ້ເຫັນດີປະກາດໃຊ້ຄຳສັ່ງປິດລ້ອມໃໝ່ຕໍ່ຣັດເຊຍ ອີຣານ ແລະ ສປປ ເກົາຫຼີ ໂດຍບໍ່ເອົາຫົວຊາຕໍ່ການຄັດຄ້ານຮ່າງກົດໝາຍນີ້ຈາກປະທານາທິບໍດີ ໂດນາລ ທຣັມ ໃນຂະນະທີ່ປະທານາທິບໍດີ ປູຕິນ ກໍໄດ້ມີຄຳຂູ່ທີ່ຈະມີມາດຕະການຕອບໂຕ້.

ຂ່າວທີ່ກ່ຽວຂ້ອງ