ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ​ນິວ​ຊີ​ແລນ ໄທ ສ ເກົາ­ຫຼີ

281 01 ສ.ຫ. 2017 ຫົວຂໍ້ຂ່າວອື່ນໆ

ພົບ​ກັນ​ໃນ​ຄໍ​ລຳ​ປະ­ຈຳ​ວັນ​ນີ້ ມີ​ຂ່າວ​ກ່ຽວ​ກັບ​ກັນຊາ​ທຽມ​ລະ­ບາດ​ໃນ​ນິວ​ຊີ​ແລນ ການ​ຈັບ​ກຸມ​ນາຍໜ້າ​ແຮງ​ງານ​ເຖື່ອນ​ຢູ່ໄທ ແລະ ການ​ລົງ­ໂທດ​ຂັ້ນເດັດ­ຂາດ​ຕໍ່​ນັກ​ການ​ທູດ ສ ເກົາ­ຫຼີ.

ທີ່ ນິວ​ຊີ​ແລນ: ຂ່າວ​ໜັງ­ສື­ພິມ​ວຽງ​ຈັນ​ທາມ ສະ­ບັບ​ວັນ​ທີ 29 ເດືອນ​ກໍ­ລະ­ກົດ ປີ​ນີ້ ໄດ້​ໃຫ້​ຊາບວ່າ: ຢູ່​ປະ­ເທດ​ນິວ​ຊີ​ແລນ-ປະ­ເທດ​ຄູ່​ເຈລະ­ຈາ​ຂອງອາ​ຊຽນ​ພວກ​ເຮົາ ​ໄດ້​ມີ​ເຫດ​ຮ້າຍ​ເຖິງ​ແກ່​ຊີ­ວິດ ຍ້ອນ​ສູບ​ກັນ­ຊາ​ທຽມ ເອີ້ນ​ເປັນ​ພາ­ສາ​ອັງ­ກິດ​ວ່າ: “Synthetic Marijuana” ນັບ​ມາ​ຮອດ​ປັດ​ຈຸບັນ ຜູ້​ເສຍ​ຊີ­ວິດ​ຍ້ອນ​ຢາ​ເສບ​ຕິດ​ຊະ­ນິດ​ນີ້ມີ​ຈຳ­ນວນ 9 ຄົນ​ແລ້ວ ໂດຍ​ຜູ້​ຫຼ້າສຸດ​ແມ່ນ​ຍິງອາ­ຍຸ 31 ປີ ທີ່​ເສຍ​ຊີ­ວິດ​ລົງ​ໃນ​ວັນ​ທີ 27/07/2017 ນີ້​ເອງ ກັນ­ຊາ​ທຽມ​ແມ່ນ​ຢາ​ເສບ​ຕິດ​ທີ່​ມີ​ທາດ​ເຄ​ມີ​ຄ້າຍ­ຄືກັບ​ສານ​ໃນ​ກັນ­ຊາ​ແທ້ ແລະ ອອກ​ລິດ​ໃນ​ລະ­ດັບດຽວ​ກັນ ທາງ​ການ​ນິວ​ຊີ​ແລນ ​ໄດ້​ກຳ­ນົດ​ໃຫ້​ຢາເສບ​ຕິດ​ຊະ­ນິດ​ນີ້​ເປັນ​ສິ່ງຜິດ​ກົດ­ໝາຍ ເພາະ​ເປັນອັນ­ຕະ­ລາຍ​ຕໍ່​ສຸ­ຂະ­ພາບ.

ຂ່າວ​ໃຫ້​ລາຍ​ລະ­ອຽດ​ຕື່ມ​ວ່າ: ນອກ­ຈາກ​ຜູ້​ເສຍຊີ­ວິດ​ຈຳ­ນວນ 9 ຄົນ​ແລ້ວ ຍັງ​ມີ​ຜູ້​ໄດ້​ຮັບ​ຜົນ​ກະ­ທົບອີກ​ຈຳ­ນວນ​ບໍ່​ໜ້ອຍ​ທີ່ພວມ​ນອນ​ຮັກ­ສາ​ຕົວ​ຢູ່​ໂຮງພະ­ຍາ­ບານ ຍ້ອນ​ແນວ​ນັ້ນ​ເອງ​ທາງ​ການ​ນິວ​ຊີແລນ​ ຈຶ່ງ​ໄດ້​ອອກ​ປະ­ກາດ​ເຕືອນ​ຢ່າງ​ເປັນທາງ​ການກ່ຽວ​ກັບ​ໄພ​ອັນ­ຕະ­ລາຍ​ຂອງ​ກັນ­ຊາ​ທຽມ ​ໄປ​ພ້ອມໆກັບ​ການ​ຕິດ­ຕາມ​ຈັບ​ກຸມ​ຜູ້​ຜະ­ລິດ ແລະ ຜູ້​ຈຳ­ໜ່າຍ ຢາເສບ​ຕິດ​ປະ­ເພດ​ນີ້ ເພື່ອ​ມາ​ລົງ­ໂທດ​ຕາມ​ກົດໝາຍ.

ທີ່ ​ໄທ: ໃນ​ວັນ​ທີ 25 ເດືອນ​ກໍ­ລະ­ກົດຜ່ານ​ມາ ເຈົ້າ​ໜ້າ­ທີ່​ຕຳ­ຫຼວດ​​ໄດ້​ບຸກ​ເຂົ້າ​ກວດຄົ້ນ​ຮ້ານ​ຂາຍ​ເຂົ້າ­ຈີ່​ແຫ່ງ​ໜຶ່ງ​ ຢູ່​ເມືອງ​ອາ​ຣະ​ຢະປະ­ເທດ ແຂວງ​ສະ​ແກ້ວ ທີ່​ມີ​ຊາຍ​ແດນ​ຕິດ​ກັບ​ກຳປູ​ເຈຍ ການ​ບຸກ​ເຂົ້າ​ກວດ​ຄົ້ນ​ຄັ້ງ​ນີ້ ເຈົ້າ​ໜ້າ­ທີ່​ໄດ້ຈັບ​ກຸມ​ຄູ່​ຜົວເມຍ​ຄົນກຳ­ປູ­ເຈຍ​ ທີ່​ເປັນ​ເຈົ້າ​ຂອງ​ຮ້ານ ໃນ​ຄະ­ດີ​ຄ້າ​ມະ­ນຸດ ດ້ວຍ​ຮູບ​ການ​ຂົນ­ຂວາຍ​ແຮງງານ​ເຖື່ອນ​ຈາກ​ກຳ­ປູ­ເຈຍ ​ເຂົ້າໄປ​ເຮັດ​ວຽກ​ຢູ່​ໄທ ແບບ​ຜິດ​ກົດ­ໝາຍ ສະ­ຫຼຸບ​ຄວາມ​ແລ້ວ ສອງ​ຜົວເມຍ​​ຄູ່​ນີ້​ໄດ້​ນຳ​ໃຊ້​ຮ້ານ​ຂອງ​ຕົນ​ເປັນ​ສາກບັງ​ໜ້າ ​ເພື່ອປິດ​ບັງ​ການ­ເຄື່ອນ­ໄຫວ​ທີ່​ຜິດ​ກົດ­ໝາຍ ເຊັ່ນ: ການ​ຂົນ­ຂວາຍ ແລະ ໃຫ້​ທີ່​ພັກ​ແກ່​ແຮງງານ​ຜິດ​ກົດ­ໝາຍ ໃນ​ການ​ບຸກ​ເຂົ້າກວດ​ຄົ້ນ​ຄັ້ງ​ນີ້ ເຈົ້າ​ໜ້າ­ທີ່​ຕຳ­ຫຼວດ​ໄທ​ ສາ­ມາດ​ຈັບ​ແຮງ​ງານ​ກຳ​ປູເຈຍ ຈຳ­ນວນ 7 ຄົນ ທີ່​ບໍ່​ມີ​ເອ­ກະ­ສານ​ອະ­ນຸ­ຍາດທາງການ ແລະ ພວມ​ລໍ­ຖ້າ​ຖືກ​ຈັດ​ສົ່ງ​ໄປ​ແຂວງຢະລາ​ຂອງ​ໄທ.

ໃນ​ຍຸກ​ເຊື່ອມ​ໂຍງ​ອາ​ຊຽນ​ທີ່​ມີ​ການ​ເປີດ​ກວ້າງການ​ແລກ­ປ່ຽນ​ຄ້າ­ຂາຍ​ຕາມ​ເຂດ​ຊາຍ​ແດນ​ນີ້  ແຕ່​ລະ​ປະ­ເທດ​ຕ້ອງ​ມີ​ມາດຕະ­ການ​ຕິດ­ຕາມ​ກວດກາ​ບັນ­ຫາ​ແຮງ​ງານ​ເຖື່ອນ ແລະ ອາ​ຊະ​ຍາ​ກຳ​ໃນຫຼາຍ​ຮູບ​ແບບ ​ທີ່​ສວຍ​ໃຊ້​ໂອ­ກາດ​ຄວາມ​ສະ­ດວກສະ­ບາຍ​ໃນ​ການ​ເຂົ້າ-ອອກ​ປະ­ເທດ.

ທີ່ ສ ເກົາ­ຫຼີ: ມີ​ຂ່າວ​ກ່ຽວ​ກັບ​ຄວາມ​ກັງ­ວົນ​ໃຈຂອງ​ວົງ​ການການ​ທູດ ສ ເກົາ­ຫຼີ ກ່ຽວ​ກັບ​ການປະ­ພຶດ​ແບບ​ແຕກ​ປອກ​ນອກທາງ​ຂອງ​ນັກ​ການ​ທູດ​ເກົາ­ຫຼີ​ບາງ​ຄົນ​ ທີ່​ເກີດ​ຂຶ້ນ​ຢູ່​ຕ່າງ­ປະ­ເທດ ຂ່າວໜັງ­ສື­ພິມ The Nation ສະ­ບັບ​ວັນ​ທີ 16 ເດືອນ ກໍ­ລະ­ກົດປີ​ນີ້ ໃຫ້​ຮູ້​ວ່າ: ກະ­ຊວງ​ການ​ຕ່າງ­ປະ­ເທດ ສ ເກົາ­ຫຼີ ໄດ້​ຮຽກ​ຕົວ​ນັກ​ການ​ທູດ​ຂອງ​ຕົນ​ຢູ່​ປະເທດ​ເອ​ຕິ​ໂອ​ປີ ກັບ​ຄືນປະ­ເທດ​ໂດຍ​ດ່ວນ ຍ້ອນ​ຕິດແຮ້ວ​ຄະ­ດີ​ຂົ່ມ­ຂືນ​ຝືນ​ໃຈ​ນັກ​ການ​ທູດ​ເພດ​ຍິງ​ຊາດດຽວ​ກັນ ພ້ອມ​ດຽວ​ກັນ​ນີ້ ທາງ​ກະ­ຊວງການ​ຕ່າງປະ­ເທດ​ກໍ່​ໄດ້​ກ່າວ​ຂໍ​ໂທດ​ຕໍ່​ປະ­ຊາ­ຊົນ ສ ເກົາ­ຫຼີ ທີ່​ນັກ​ການ​ທູດ​ບາງ​ຄົນ​ໄດ້​ເຮັດ​ໃຫ້​ໃບ​ໜ້າ​ຂອງ​ປະເທດ​ຊາດເສື່ອມ​ເສຍ​ຢູ່​ຕ່າງ­ປະ­ເທດ ແລະ ໃຫ້​ຄຳໝັ້ນ​ສັນ­ຍາ​ວ່າ ນັກ​ການ​ທູດ​ທີ່​ກໍ່​ເຫດ​ຈະ​ໄດ້​ຖືກ​ລົງໂທດ​ຢ່າງ​ສາ​ສົມ.

ໃນ​ປີ 2016 ກໍ່​ໄດ້​ມີ​ເຫດ­ການ​ບໍ່​ດີ​ເກີດ​ຂຶ້ນ​ຢູ່​ສະຖານ​ທູດ ສ ເກົາ­ຫຼີ ໃນ​ຕ່າງ​ແດນ ຄື: ໃນ​ເດືອນທັນ­ວາ ເອກ​ອັກ​ຄະ​ລັດ​ຖະທູດ ສ ເກົາ­ຫຼີ ຢູ່​ປະ­ເທດເຂດ​ຕາ­ເວັນ​ອອກ​ກາງ ໄດ້​ລວນ​ລາມ​ທາງ​ເພດ​ຕໍ່ພະ­ນັກ­ງານ​ຍິງ​ປະ­ຈຳ​ສະ­ຖານ­ທູດ ຜູ້​ກໍ່​ເຫດ​ໄດ້ຮັບໂທດ​ດ້ວຍ​ການ​ຖືກ​ຕັດ​ເງິນ­ເດືອນ ແລະ ໃນ​ເດືອນກັນ­ຍາ​ປີ​ດຽວ​ກັນ​ນັ້ນ ນັກ​ການ​ທູດ​ອີກ​ຄົນ​ໜຶ່ງ​ປະຈຳ​ການ​ຢູ່​ປະ­ເທດຈີ​ເລ ໄດ້​ລວນ​ລາມ​ທາງ​ເພດ​ຕໍ່ຍິງ​ສາວ​ປະ­ເທດ​ເຈົ້າ­ພາບ ນັກ​ການ​ທູດ​ຄົນ​ດັ່ງກ່າວ​ຖືກ​ຮຽກ​ກັບ​ຄືນ​ປະ­ເທດ ແລະ ຖືກ​ໄລ່ອອກການ​ທັນ­ທີ.

ຂ່າວທີ່ກ່ຽວຂ້ອງ