ລາວ​ ໂຕ​ໂຍ​ຕ້າ ຄອງ​ຂັນ ລາວ ພຣີ​ເມຍ ລີກ ສະ­ໄໝ​ທີ 2

432 02 ສ.ຫ. 2017 ວົງຈອນກີລາ
ລາວ​ ໂຕ​ໂຍ​ຕ້າ ຄອງ​ຂັນ ລາວ ພຣີ​ເມຍ ລີກ ສະ­ໄໝ​ທີ 2

ສະ­ໂມ­ສອນ​ ລາວ ໂຕ​ໂຍ​ຕ້າ ເອ​ັຟ​ຊີ ລົງ​ສະ­ໜາມ​ນັດ​ສຸດ​ທ້າຍ ​ຍັງ​ສ້າງ​ຜົນ­ງານ​ໄດ້​ຢ່າງ​ໂດດ​ເດັ່ນ​ຕໍ່​ເນື່ອງ ຫຼັງ​ສາ­ມາດ​ບຸກໄປ​ຖະ​ຫຼົ່ມ ສະ­ໂມ­ສອນ ດີ​ເຄ ເອ​ັຟ​ຊີ ໄດ້​ເຖິງ​ຖິ່ນ 6-2 ປະ­ຕູ ຍາດ​ໄດ້​ຂັນ​ຊະ­ນະ​ເລີດ ໃນ​ການ​ແຂ່ງ­ຂັນ​ເຕະ­ບານ ລາວ ​ພຣີເມຍ​ ລີກ 2017 ໄປ​ຄອງ​ໄດ້​ຢ່າງ​ຍິ່ງ​ໃຫຍ່ ແລະ ກໍ່​ເປັນ​ຂັນ​ຊະ­ນະ​ເລີດສະ­ໄໝ​ທີ 2 ຂອງ​ສະ­ໂມ­ສອນ ພ້ອມ​ຮັບ​ເງິນ​ລາ­ງວັນ 300 ລ້ານ​ກີບ.

ການ​ແຂ່ງ­ຂັນ​ເຕະ­ບານ ລາວ ພຣີ​ເມຍ ​ລີກ 2017 ນັດ​ສຸດ​ທ້າຍ​ຂອງ​ສະ­ໂມ­ສອນ ລາວ ໂຕ​ໂຢ​ຕ້າ ເອ​ັຟ​ຊີ  ທີມ​ນຳ​ຕາ­ຕະ­ລາງ ຈັດ​ຂຶ້ນ​ເມື່ອ​ວັນ​ທີ 29 ກໍ­ລະ­ກົດ 2017 ຜ່ານ​ມາ ທີ່​ສະ­ໜາມ​ເຈົ້າ​ອາ​ນຸ​ວົງ ນະ­ຄອນ­ຫຼວງ​ວຽງ​ຈັນ ໂດຍ​ໃຫ້​ກຽດ​ເຂົ້າຮ່ວມ ແລະ ມອບ​ຂັນ​ລາ­ງວັນ​ຂອງທ່ານ ສົມ​ພູ ພົງ­ສາ ຜູ້​ຊ່ວຍ​ລັດ­ຖະ­ມົນ­ຕີ ກະ­ຊວງ​ສຶກ​ສາ​ທິ​ການ ແລະ ກີ­ລາ ທັງ​ເປັນຮອງ​ປະ­ທານ ແລະ ເລ­ຂາ­ທິ­ການ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ ມີ​ຫົວ­ໜ້າ​ກົມ​ກີ­ລາ​ລະ­ດັບ​ສູງ ກະ­ຊວງ ສສກ ທ່ານ ວີ​ເພັດ ສີ​ຫາ​ຈັກ ປະ­ທານ​ສະ­ຫະ­ພັນ​ບານ­ເຕະ​ແຫ່ງ​ຊາດ​ ແລະ ທ່ານ ເຂັມ​ຊາດ ພິ­ລາ​ພັນ​ເດ​ຊ ປະ­ທານ​ສະ­ໂມ­ສອນ ລາວ ​ໂຕ​ໂຍ​ຕ້າ ເອ​ັຟ​ຊີ ພ້ອມ​ດ້ວຍ​ຄະ­ນະ​ນຳ ຄູ​ເຝິກ ແລະ ນັກ­ກີ­ລາ ຕະ­ຫຼອດ​ຮອດ​ກອງເຊຍ​ບານ​ເຂົ້າ​ຮ່ວມ.

ສະ­ຫຼຸບ​ຕາ­ຕະ­ລາງ​ ອັນ​ດັບ 1 ສະ­ໂມ­ສອນ ​ລາວ​ ໂຕ​ໂຍ​ຕ້າ ເອ​ັຟ​ຊີ ມີ 37 ຄະ­ແນນ ອັນ​ດັບ 2 ປກສ ມີ 26 ຄະ­ແນນ (ຍັງເຫຼືອ​ການ​ແຂ່ງ­ຂັນ​ອີກ 1 ນັດ) ອັນ​ດັບ 3 ມຊ ມີ 25 ຄະ­ແນນ (ຍັງ​ເຫຼືອ​ການ​ແຂ່ງ­ຂັນ​ອີກ 1 ນັດ) ອັນ​ດັບ 4 ດີ​ເຄ ມີ 20 ຄະ­ແນນ ອັນ​ດັບ 5 ທິບ ສະ­ຫວັນ ມີ 17 ຄະ­ແນນ (ຍັງ​ເຫຼືອ​ການ​ແຂ່ງ­ຂັນ​ອີກ 1 ນັດ) ອັນ​ດັບ 6 ສະ­ຫວັນ ຢູ​ໄນ​ເຕັດ ມີ 14 ຄະ­ແນນ (ຍັງ​ເຫຼືອ​ການ​ແຂ່ງ­ຂັນ​ອີກ 1 ນັດ) ອັນ​ດັບ 7 ນະ­ຄອນ­ຫຼວງ ຢູ​ໄນ​ເຕັດ ມີ 10 ຄະ­ແນນ ແລະ ອັນ​ດັບ 8 ໄອ​ດີ​ຊີ ຈຳ­ປາ​ສັກ ຢູ​ໄນ​ເຕັດ ມີ 6 ຄະ­ແນນ.

ຂ່າວທີ່ກ່ຽວຂ້ອງ