ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ໄທ ສສ ຫວຽດ­ນາມ ຟີ​ລິບ​ປິນ

290 02 ສ.ຫ. 2017 ຫົວຂໍ້ຂ່າວອື່ນໆ

ມື້­ນີ້​ພວກ​ເຮົາ​ໄປ​ເບິ່ງ​ເນື້ອ​ໃນ​ກົດ­ໝາຍ​ຄວບຄຸມ​ຢາ­ສູບ​ສະ­ບັບ​ໃໝ່​ຂອງ​ໄທ ການ​ກຳ­ນົດ​ເສັ້ນທາງ​ສຳ­ລັບ​ໃຫ້​ຄົນ​ຍ່າງ​ຢູ່​ຮ່າໂນ້ຍ ສສ ຫວຽດ­ນາມ ແລະ ຄຳ​ຂູ່​ຍຸບ​ອົງ­ການ​ສິດ­ທິ​ມະ­ນຸດ​ໃນ​ຟີ​ລິບ​ປິນ.

ທີ່ ໄທ: ກົດ­ໝາຍ​ຄວບ​ຄຸມ​ຢາ­ສູບ​ສະ­ບັບຫຼ້າ​ສຸດ​ຂອງ​ໄທ ທີ່​ເລີ່ມ​ມີ​ຜົນ​ສັກ­ສິດ​ນັບ​ແຕ່​ວັນ​ທີ 4 ເດືອນ​ກໍ­ລະ­ກົດ​ປີ​ນີ້ ເປັນ­ຕົ້ນມາ (The Nation 5/7/2017) ນັ້ນ ໄດ້​ເພີ່ມ​ມາດ​ຕະ­ການ​ປ້ອງ​ກັນສິດ­ທິ​ຂອງ​ຜູ້​ບໍ່​ສູບ­ຢາ ແລະ ປ້ອງ​ກັນ​ຄົນ​ໃນ​ໄວ​ໜຸ່ມ ບໍ່ໃຫ້​ຕິດ​ນິ­ໄສ​ສູບ­ຢາ ລາຍ​ລະ­ອຽດ​ຂອງ​ມາດ​ຕະການ​ຈຳ­ນວນ​ໜຶ່ງ ລວມ​ມີ​ການ​ຫ້າມ​ຂາຍ​ຢາ­ສູບໃຫ້​ຄົນ​ທີ່​ມີ​ອາ­ຍຸ​ຕ່ຳ​ກວ່າ 20 ປີ ແລະ ຫ້າມ​ຜູ້​ທີ່​ອາຍຸ​ບໍ່​ເຖິງ 18 ປີ ຂາຍ​ຜະ­ລິດ​ຕະ​ພັນ​ຢາ­ສູບ ຫ້າມຂາຍ​ຜະ­ລິດ​ຕະ​ພັນ​ຢາ­ສູບ​ຕາມ​ສະ­ຖານ­ທີ່​ທາງສາສະ­ໜາ ໂຮງ­ພະ­ຍາ­ບານ ຮ້ານ​ຂາຍ​ຢາ​ປົວ​ພະ­ຍາດ ຕາມ​ສະ­ຖານ­ທີ່​ສຶກ​ສາ ສວນ​ສາ­ທາ­ລະ­ນະ ສວນສັດ ແລະ ສະ­ຖານ­ທີ່​ສຳ­ລັບ​ກິດ­ຈະ­ກຳ​ເພີດ­ເພີນພັກ­ຜ່ອນ​ຕ່າງໆ ນອກ­ຈາກ​ນັ້ນ ກົດ­ໝາຍ​ຍັງ​ໄດ້ເກືອດ​ຫ້າມ​ທຸກ​ຮູບ​ການ​ໂຄ­ສະ­ນາເຈາະ​ຕະ­ຫຼາດສຳ­ລັບ​ຢາ­ສູບ ແລະ ຫ້າມ​ບັນ­ດາ​ທຸ­ລະ​ກິດ​ຢາ­ສູບໃຫ້​ອຸ­ປະ­ຖຳ​ການ­ເຄື່ອນ­ໄຫວ​ກິດ­ຈະ­ກຳ​ທາງ​ສັງຄົມ ທີ່ແອບ​ແຝງ​ກັບ​ການ​ໂຄ­ສະ­ນາ​ຢາ­ສູບ ການຂາຍ​ຢາ​ເປັນ​ກອກກໍ່​ຖືກ​ເກືອດ​ຫ້າມ​ເຊັ່ນ​ກັນ ຂ່າວໃຫ້​ຮູ້​ຕື່ມ​ວ່າ ມູນ​ຄ່າ​ການ​ປັບໃໝ​ຜູ້​ລະ­ເມີດ​ກົດໝາຍ​ຄວບ​ຄຸມ​ຢາ­ສູບ​ນີ້ ໄດ້​ເພີ່ມ​ຂຶ້ນ​ຈາກ 2.000 ບາດໃນ​ເມື່ອ​ກ່ອນ ເປັນ 5.000 ບາດ ຕາມ​ສະຖິຕິ​ຂອງ​ກະ­ຊວງ​ສາ­ທາ­ລະ­ນະ​ສຸກ​ໄທ ໃນ​ແຕ່​ລະ​ປີ ຈຳ­ນວນ​ຜູ້​ເສຍ​ຊີ­ວິດ​ທີ່​ພົວ­ພັນ​ກັບ​ຢາ­ສູບ​ນັ້ນ​ມີສູງ​ເຖິງ 50.000 ຄົນ.

ທີ່ ສສ ຫວຽດ­ນາມ: ຂ່າວ​ວຽງ​ຈັນ​ທາມ ວັນ​ທີ 16 ເດືອນ​ກໍ­ລະ­ກົດ ຜ່ານ​ມາ​ໃຫ້​ຮູ້​ວ່າ ກອງ​ປະ­ຊຸມສະ­ພາ​ປະ­ຊາ­ຊົນ​ນະ­ຄອນ­ຫຼວງ​ຮ່າ​ໂນ້ຍ ໄດ້​ພິ​ຈາລະ​ນາ​ແຜນ​ສ້າງ​ລະ­ບຽບ​ການ ເພື່ອ​ກຳ­ນົດ​ເສັ້ນທາງ​ສະ­ເພາະ​ໃຫ້​ຄົນ​ຍ່າງ​ຕາມ​ບໍ­ລິ­ເວນ​ອ້ອມແອ້ມ​ໜອງ​ໃຫຍ່​ ຮວນ​ກຽມ (Hoan Kiem) ແຜນ­ການ​ດັ່ງ­ກ່າວ​ຈະ​ກວມ​ເອົາ​ຫຼາຍໆ​ໜ້າ​ວຽກ ເຊັ່ນ: ການ​ກຳ­ນົດ​ເຂດສຳ­ລັບ​ຍ່າງ ບັນ­ຫາ​ອະນາ​ໄມ ເຂດ​ສະ­ເພາະ​ຜູ້​ທີ່​ພາ​ໝາ​ຍ່າງ​ຫຼິ້ນ ເຂດ​ໃຫ້ເຊົ່າ​ລົດ​ເຄື່ອງ​ຫຼິ້ນ​ເພື່ອ​ຂັບ​ຂີ່ ນອກ­ຈາກ​ນັ້ນຍັງຈະໄດ້​ປັບ­ປຸງ​ຄືນລາຍ­ການ​ວັດ­ທະ­ນະ­ທຳ​ທີ່​ຍັງ​ບໍ່​ໄດ້ມາດ­ຕະ­ຖານ ກອງ​ປະ­ຊຸມ​ໄດ້​ມອບ​ໝາຍ​ໃຫ້​ສະພາ​ປະ­ຊາ­ຊົນ​ຄຸ້ມ​ໜອງ​ຮວນ​ກຽມ ເປັນ​ເຈົ້າ​ການຮ່າງ​ລະ­ບຽບ​ການ​ກ່ຽວ​ກັບ​ການ​ພັດ­ທະ­ນາ ແລະ ຄຸ້ມ​ຄອງ​ເຂດ​ຄົນ​ຍ່າງ​ໃຫ້​ທັນ​ຮັບ­ຮອງ​ເອົາ​ໃນເດືອນ​ສິງ­ຫາ​ປີ​ນີ້ ໜອງ​ໃຫຍ່​ຮວນ​ກຽມ ແມ່ນຈຸດ​ພັກ­ຜ່ອນ​ຍ່ອນ​ກາຍ ແລະ ໃຈ​ຂອງ​ຊາວ​ນະຄອນ​ຫຼວງ​ຮ່າ​ໂນ້ຍ ແລະ ທັງເປັນ​ປອດ​ຜະ­ລິດ​ອາກາດ​ສົດ​ທີ່​ສຳ­ຄັນ​ອີກ​ດ້ວຍ.

ທີ່ ຟີ​ລິບ​ປິນ: ໃນ​ອາ­ທິດ​ຂ້ອນ​ທ້າຍ​ຂອງ​ເດືອນ​ກໍລະ​ກົດ​ຜ່ານ​ມາ ມີ​ຂ່າວ​ທີ່​ໜ້າ​ສົນ­ໃຈ​ຈາກ​ປະ­ເທດນີ້ຄື: ເລື່ອງ​ຄຳ​ຂູ່​ຂອງທ່ານ ໂຣ​ດຼິກ​ໂກ ດູເຕັກ​ເຕ ປະ­ທາ­ນາ­ທິ­ບໍ­ດີ​ຂອງ​ປະ­ເທດ​ ວ່າ​ຈະ​ຍຸບຄະ­ນະ​ກຳ­ມະ­ການ​ສິດ­ທິ​ມະ­ນຸດ ຍ້ອນ​ອອກ­ສຽງ​ວິພາກ​ວິ­ຈານ​ມາດ​ຕະ­ການ​ຂອງ​ລັດ­ຖະ­ບານ​ ໃນການ​ປາບ​ປາມ​ອາ​ຊະ­ຍະ​ກຳ​ຢາ​ເສບ​ຕິດ ກໍ່​ຄືການວິ­ຈານ​ບັນ­ຫາ​ລະ­ເມີດສິດ­ທິ​ມະ­ນຸດ ທ່ານ​ປະ​ທາ​ນາທິ​ບໍ­ດີ​ບອກ​ວ່າ: “ເມື່ອ​ຮອດ​ເວ­ລາ ຄະ­ນະ​ກຳ​ມະການ​ນີ້​ຈະ​ຕ້ອງ​ຖືກ​ຍຸບ ຖ້ອຍ​ຖະ­ແຫຼງ​ດັ່ງ­ກ່າວ​ມີຂຶ້ນ​ໃນ​ກອງ​ປະ­ຊຸມ​ຂ່າວ​ຫວ່າງ​ບໍ່​ດົນ​ມາ​ນີ້ ທ່ານ​ຍັງ​ໄດ້​ກ່າວ​ຕື່ມ​ວ່າ ​ຈະ​ບໍ່​ອະ­ນຸຍາດ​ໃຫ້​ຄະ­ນະ​ກຳ­ມະ­ການ​ສິດ­ທິ​ມະ­ນຸດ​ສອບສວນ​ເຈົ້າ​ໜ້າ­ທີ່​ຕຳ­ຫຼວດ ແລະ ທະ­ຫານ​ເດັດ­ຂາດ ຖ້າ​ບໍ່​ໄດ້​ຮັບ​ອະ­ນຸ­ຍາດ​ຈາກ​ທ່ານ​ເອງ ນັບ​ແຕ່​ມື້​ຂຶ້ນບັນ­ລັງ​ອຳ­ນາດ​ເປັນ­ຕົ້ນ​ມາ ທ່ານ​ປະ­ທາ­ນາ­ທິ­ບໍ­ດີປາກ­ກ້າ​ວ່າ​ແຂງ​ທ່ານ​ນີ້ ​ໄດ້​ເອົາ​ຈິງ​ເອົາ​ຈັງ​ກັບການ​ປາບ​ປາມ​ຜູ້​ຄ້າຜູ້​ເສບ​ຢາ​ເສບຕິດ​ແບບ​ບໍ່​ໄວ້ໜ້າ ເປັນ​ເຫດ​ໃຫ້​ມີ​ຜູ້​ເສຍ​ຊີ­ວິດ​ຈຳ­ນວນ​ຫຼາຍ​ພັນຄົນ ມາດ​ຕະ­ການ​ດັ່ງ­ກ່າວ​ໄດ້​ຖືກ​ວິ­ພາກ​ວິ­ຈານຈາກຫຼາຍໆ​ປະ­ເທດ ແຕ່​ທ່ານ​ປະ­ທາ­ນາ­ທິ­ບໍ­ດີ​ບອກວ່າ ບໍ່​ສົນ ເພາະ​ຢາ​ເສບ​ຕິດ​ແມ່ນ​ໄພ​ອັນ­ຕະ­ລາຍຮ້າຍ​ແຮງ​ສຳ­ລັບ​ປະ­ເທດຊາດ ແລະ ປະ­ຊາ­ຊົນ​ຟີລິບ​ປິນ.

ຂ່າວທີ່ກ່ຽວຂ້ອງ