ຂ່າວຫຼ້າສຸດ

ສົກຮຽນ 2017-2018 ຈະຮັບນັກຮຽນເຂົ້າມະຫາວິທະຍາໄລໃນທົ່ວປະເທດ 11.000 ຄົນ

190 09 ສ.ຫ. 2017 ຂ່າວໜ້າ​ໜຶ່ງ

ສົກຮຽນ​ປີ 2017-2018 ທີ່​ຈະ​ເຖິງ​ນີ້ ຈະ​ມີ​ການ​ຮັບ​ເອົາ​ນັກ​ສຶກ​ສາ​ໃໝ່​ເຂົ້າ​ຮຽນ​ໃນ​ລະດັບ​ປະລິນຍາຕີ ຢູ່​ມະຫາວິທະຍາໄລ​ແຫ່ງ​ຕ່າງໆໃນ​ທົ່ວ​ປະເທດ ປະມານ 11.000 ກວ່າ​ຄົນ.

ແຫຼ່ງ​ຂ່າວ​ກົມ​ແຜນການກະຊວງ​ສຶກ​ສາ​ທິ​ການ ແລະ ກີລາ ໄດ້​ເປີດເຜີຍ​ໃຫ້​ຮູ້​ໃນ​ວັນ​ທີ 8 ສິງຫາ 2017 ນີ້​ວ່າ: ລັດຖະບານ​ໄດ້​ພິຈາລະນາ​ຮັບ​ເອົາ​ຕົວ​ເລກ​ປະມານ 11.000 ກວ່າ​ຄົນ​ເຂົ້າ​ຮຽນ​ຢູ່​ມະຫາ​ວິ​ທະຍາ​ໄລ​ແຫ່ງ​ຕ່າງໆ​ທົ່ວ​ປະເທດ ສົກ​ປີ 2017-2018 ໃນ​ນັ້ນ ມະຫາວິທະຍາໄລ​ແຫ່ງ​ຊາດ (​ມຊ) ປະມານ 6.000 ຄົນ ສ່ວນ​ທີ່​ເຫຼືອ​ແມ່ນ​ແບ່ງປັນ​ໃຫ້​ມະຫາວິທະຍາໄລສຸ​ພານຸ​ວົງ ແຂວງ​ຫຼວງ​ພະ​ບາງ ມະຫາວິທະຍາໄລຈຳປາ​ສັກ ມະຫາວິທະຍາໄລສະຫວັນ​ນະ​ເຂດ ຕົວ​ເລກ​ຮັບ​ເອົາ​ນັກຮຽນ ສົກ​ປີ 2016-2017 ແມ່ນ 10.000 ຄົນ ໝາຍ​ຄວາມ​ວ່າ​ເພີ່ມ​ຂຶ້ນ 1.000 ກວ່າ​ຄົນ ໃນ​ສົກ​ປີ 2017-2018 ຍ້ອນ​ວ່າຢູ່​ມະຫາວິທະຍາໄລ​ແຫ່ງ​ຕ່າງໆ​ ໄດ້​ເພີ່ມ​ຄະນະ ແລະ ຫຼັກສູດ​ໃໝ່​ຂຶ້ນ ຈຶ່ງ​ຈຳເປັນ​ຕ້ອງ​ເພີ່ມ​ຕົວ​ເລກ​ຂຶ້ນ​ຕື່ມ.

ແນວໃດ​ກໍ່​ດີ ຈຳນວນ​ນັກຮຽນ​ສອບເສັງ​ຈົບ ມ7 ປີ​ນີ້ ມີ 60.000 ກວ່າ​ຄົນ ໃນ​ເວລາ​ສອບເສັງ​ເຂົ້າຮຽນ​ລະດັບ​ປະລິນຍາ​ຕີ ມະຫາວິທະຍາໄລ​ແຫ່ງ​ຊາດ ເຊິ່ງ​ຈັດ​ຂຶ້ນ​ວັນ​ທີ 25 ກໍລະກົດ​ຜ່ານ​ມາ ມີ​ຜູ້​ລົງທະບຽນ​ເຂົ້າ​ສອບເສັງ​ທັງ​ໝົດ 18.000 ກວ່າ​ຄົນ.

ຂ່າວທີ່ກ່ຽວຂ້ອງ