ປຶກສາດ້ານສຸຂະພາບໂທຫາສາຍດ່ວນ 166

167 09 ສ.ຫ. 2017 ຂ່າວໜ້າ​ໜຶ່ງ

ກະຊວງ​ສາທາລະນະ​ສຸກ ​ໄດ້ເປີດ​ສາຍ​ດ່ວນ 166 ເພື່ອ​ຊ່ວຍ​ໃນການ​ຄົ້ນ​ຫາ​ກໍລະນີ​ເກີດ​ເປັນ​ຈຸ້ມຂອງ​ພະຍາດ ຫຼື ໄພ​ຂົ່ມຂູ່​ອື່ນໆ​ຕໍ່ສຸຂະພາບ​ພາຍ​ໃນ​ປະເທດ ເພື່ອເປັນ​ຊ່ອງ​ທາງ​ສຳຄັນ​ໃນ​ການ​ໃຫ້ຂໍ້​ມູນ​ຂ່າວສານ​ແກ່​ປະຊາຊົນ ແລະ ເປັນ​ເສັ້ນທາງ​ໜຶ່ງ​ທີ່​ໃຫ້​ປະຊາ​ຊົນ​ສາມາດ​ອອກ​ຄຳ​ຄິດ​ເຫັນ ແລະ ສື່ສານ​ຄວາມ​ວິຕົກ​ກັງວົນ ຫຼື ບັນຫາ​ຂອງ​ເຂົາເຈົ້າ​ໃຫ້​ແກ່​ລັດຖະ​ບານ ແລະ ບັນດາ​ກະຊວງ​ທີ່ກ່ຽວຂ້ອງ​ໂດຍ​ກົງ​ອີກ​ດ້ວຍ.

ສາຍ​ດ່ວນ 166 ແມ່ນ​ແນໃສ່ພະຍາດ​ທີ່​ລັດຖະບານ​ໄດ້​ເອົາໃຈໃສ່​ຢູ່​ໃນ​ປັດຈຸບັນ ຄື: ພະຍາດ​ໄຂ້ຫວັດ​ສັດ​ປີກ ພະຍາດ​ໄຂ້ຍຸງ​ລາຍ ແລະ ເຫດການ​ກ່ຽວ​ກັບ​ສຸ​ຂະພາບ​ຂອງປະຊາຊົນ​ໃນ​ຊຸມຊົນ ເພື່ອ​ໃຫ້​ມີ​ລາຍ​ງານ​ຂໍ້​ມູນຈາກ​ທ້ອງຖິ່ນ​ຫາ​ຂັ້ນ​ສູນ​ກາງ​ນັ້ນ ກໍ່​ເພື່ອ​ເພີ່ມ​ຂີດ​ຄວາມ​ສາມາດ​ໃນການ​ຄົ້ນ​ຫາ​ກໍລະນີ​ພະຍາດ​ເກີດແບບ​ເປັນ​ຈຸ້ມ ໃນ​ລະດັບ​ຊຸມ​ຊົນ ອີກ​ຢ່າງ​ໜຶ່ງ​ເປັນ​ການ​ຕິດຕາມການ​ລະບາດ​ຂອງ​ພະຍາດ ​ເພື່ອການຈັດຕັ້ງ​ປະຕິບັດ​ມາດ​ຕະການຄວບ​ຄຸມ ແລະ ຕອບ​ໂຕ້​ໃຫ້​ທັນເວລາ ແລະ ເພື່ອ​ໃຫ້​ສຸ​ຂະ​ສຶກ​ສາ ແລະ ຄວາມ​ຮູ້​ໃນ​ການ​ປ້ອງ​ກັນພະຍາດ​ໄຂ້​ຫວັດ​ສັດ​ປີກ ພະຍາດຕິດຕໍ່​ຕ່າງໆ ແລະ ເຫດການ​ກ່ຽວກັບ​ສຸຂະພາບ​ຂອງ​ປະຊາຊົນ​ໃນຊຸມ​ຊົນ ໂດຍ​ມີ​ຄວາມ​ມຸ່ງ​ໝາຍ ທີ່ຈະ​ຂະຫຍາຍ​ໃຫ້​ກວ້າງ​ອອກ ​ເພື່ອຮັບ​ມື​ກັບ​ເຫດການ​ສຸກ​ເສີນ ແລະ ໄພ​ຂົ່ມຂູ່​ຕ່າງໆ​ທີ່​ພົວພັນ​ເຖິງ​ດ້ານສຸຂະພາບ​ສຳລັບ​ໝາຍ​ເລກ​ດັ່ງກ່າວ​ແມ່ນ​ໂທ​ບໍ່​ເສຍ​ຄ່າ ສະນັ້ນ ຖ້າ​ພົບ​ການ​ເກີດ​ພະຍາດ​ຕ່າງໆໃນ​ຊຸມ​ຊົນ ຫຼື ຕ້ອງການ​ຂໍ​ຄຳ​ປຶກສາ​ດ້ານ​ພະຍາດ​ກໍ່​ສາມາດ​ໂທເຂົ້າ​ໄປ​ໄດ້​ທີ່​ສາຍ​ດ່ວນ 166.

ຂ່າວທີ່ກ່ຽວຂ້ອງ