ສົ່ງເສີມຢ່າງແຂງແຮງ ການລ້ຽງລູກດ້ວຍນ້ຳນົມແມ່ ມີຄວາມຍືນຍົງ

174 09 ສ.ຫ. 2017 ຂ່າວໜ້າ​ໜຶ່ງ
ສົ່ງເສີມຢ່າງແຂງແຮງ ການລ້ຽງລູກດ້ວຍນ້ຳນົມແມ່ ມີຄວາມຍືນຍົງ

ການ​ລ້ຽງ​ລູກ​ດ້ວຍ​ນົມ​ແມ່ເປັນ​ສ່ວນ​ສຳຄັນ ​ໃນ​ການ​ທີ່​ຈະເຮັດ​ໃຫ້​ເດັກ​ທຸກ​ຄົນ​ໄດ້​ມີ​ຊີວິດ ແລະ ມີ​ສຸຂະພາບ​ທີ່​ດີ ເພາະ​ມັນເປັນ​ຢາ​ວັກ​ແຊັງ​ທຳ​ອິດ​ຂອງ​ເດັກ ແລະ ເປັນ​ແຫຼ່ງ​ອາຫານ​ທີ່​ອຸດົມສົມບູນ​ທີ່​ສຸດ ນ້ຳ​ນົມ​ແມ່​ຍັງ​ສາມາດ​ຊ່ວຍ​ໃນ​ການ​ພັດທະນາ​ສະໝອງ​ຂອງ​ເດັກ ແລະ ຊ່ວຍ​ຊີວິດເດັກ​ໄດ້.

ສັບປະດາ​ລ້ຽງ​ລູກ​ດ້ວຍ​ນ້ຳ​ນົມແມ່ ວັນ​ທີ 1-7 ສິງຫາ 2017 ພາຍ​ໃຕ້​ຫົວຂໍ້ “ຮ່ວມ​ແຮງ​ຮ່ວມໃຈ​ເຮັດ​ໃຫ້ການ​ລ້ຽງ​ລູກ​ດ້ວຍ​ນ້ຳນົມ​ແມ່​ມີ​ຄວາມ​ຍືນ​ຍົງ” ທ່ານນາງ ຈູ​ລຽດ ໄຟລ​ໂຊຄ ຜູ້​ຕາງໜ້າ​ອົງການ​ອະນາໄມ​ໂລກ​ປະຈຳລາວ ໄດ້​ກ່າ​ວວ່າ: ການ​ລ້ຽງ​ລູກດ້ວຍ​ນົມ​ແມ່​ແຕ່​ຢ່າງ​ດຽວ​ແຕ່​ມື້ເກີດ​ຮອດ 6 ເດືອນ ແມ່ນ​ສາມາດ​ປ້ອງ​ກັນ​ການຕາຍ​ຂອງ​ເດັກ​ໄດ້​ເຖິງ 13% ເຊິ່ງແມ່ນ​ໜຶ່ງ​ໃນ​ບັນດາ​ວິທີ​ການ​ທີ່​ມີປະ​ສິດທິ​ຜົນ​ທີ່​ສຸດ ເພື່ອ​ຫຼີກ​ລ່ຽງການ​ຕາຍ​ຂອງ​ເດັກ ທີ່​ສາມາດປ້ອງ​ກັນ​ໄດ້ ແລະ ບໍ່​ມີຄ່າ​ໃຊ້​ຈ່າຍ.

ຂ້າພະເຈົ້າ​ຂໍ​ສະແດງ​ຄວາມຊົມເຊີຍ​ຕໍ່​ບັນດາ​ແພດ ​ຜູ້​ໃຫ້​ບໍ​ລິການ​ເບິ່ງແຍງ​ສຸຂະພາບ​ທີ່​ມີຄວາມ​ພະຍາຍາມ​ໃນ​ການ​ສົ່ງເສີມ ແລະ ສະໜັບສະໜູນ​ໃຫ້ແມ່​ທີ່​ເກີດ​ລູກ​ໃໝ່ ​ຮັບ​ຄວາມ​ອົບອຸ່ນ​ຈາກ​ການ​ສຳຜັດ​ຜິວໜັງ​ຂອງແມ່​ກັບ​ລູກ ໂດຍ​ໄດ້​ລິ​ເລີ່ມ​ໃຫ້​ລູກກິນ​ນົມ​ແມ່​ຕັ້ງແຕ່​ໄລຍະ​ທຳ​ອິດ​ທີ່ລູກ​ເກີດ ແລະ ເປັນ​ສ່ວນ​ໜຶ່ງ​ຂອງແຜນ​ງານ​ການ​ດູ​ແລ​ທີ່​ຈຳເປັນ ​ໃນໄລຍະ​ທຳ​ອິດ​ຂອງ​ເດັກ​ເກີດ​ໃໝ່ ເຊິ່ງ​ແມ່ນ​ບາດກ້າວ​ທຳ​ອິດ​ສູ່​ການລ້ຽງ​ດ້ວຍ​ນ້ຳ​ນົມ​ແມ່​ພຽງ​ຢ່າງດຽວ​ ແຕ່​ເກີດ​ຈົນ​ເຖິງ 6 ເດືອນ.

ນອກຈາກ​ນີ້ ເພື່ອ​ແນໃສ່​ຄວາມສຳຄັນ​ຂອງ​ການ​ລ້ຽງ​ລູກ​ດ້ວຍນ້ຳ​ນົມ​ແມ່​ ອົງການ​ອະນາໄມ​ໂລກປະຈຳ​ລາວ ໄດ້​ຈັດ​ຫ້ອງ​ປ້ຳ​ນ້ຳນົມ​ຢູ່​ໃນ​ຫ້ອງການ​ ເພື່ອ​ໃຫ້​ພະນັກງານ​ທີ່​ເປັນ​ແມ່ລູກອ່ອນ​ສາມາດປ້ຳ​ນ້ຳ​ນົມ​ເກັບ​ໄວ້​ໃຫ້​ລູກ​ກິນ​ຢູ່ເຮືອນ​ໄດ້.

ທ່ານ​ນາງ ກິ່ນ​ເກສອນ ອິນສີ​ຊຽງ​ໃໝ່ ຜູ້​ຊ່ວຍ​ພະ​ແນກ​ບໍ​ລິຫານ​ອົງການ​ອະນາໄມ​ໂລກ ໄດ້ໃຫ້​ສຳພາດ​ກ່ຽວ​ກັບ​ປະສົບ​ການ ໃນ​ການ​ສືບຕໍ່​ລ້ຽງ​ລູກ​ດ້ວຍ​ນົມແມ່ ແລະ ການ​ນຳ​ໃຊ້​ຫ້ອງ​ປ້ຳນົມ​ວ່າ: ພາຍຫຼັງ​ຄົບ​ກຳນົດ​ເວລາ​ພັກ​ເກີດ​ລູກ​ກໍ່​ໄດ້​ກັບ​ຄືນ​ມາເຮັດ​ວຽກ ເຊິ່ງ​ຕອນ​ນັ້ນ​ລູກ​ໄດ້ 6 ເດືອນ ແລະ ຍັງ​ສືບຕໍ່​ໃຫ້​ນົມ​ລູກ ເຊິ່ງ​ມີ​ຄວາມ​ກັງວົນ​ວ່າ ຈະ​ຈັດສັນ​ເວລາ​ແນວໃດ​ເພື່ອ​ຈະ​ກັບ​ໄປໃຫ້​ນົມ​ລູກ ແຕ່​ກໍ່​ໂຊກ​ດີ​ທີ່​ອົງການອະນາໄມ​ໂລກ ​ໄດ້​ອຳນວຍ​ຄວາມສະດວກ ແລະ ຈັດ​ສັນ​ຫ້ອງ​ສຳລັບ​ປ້ຳ​ນ້ຳ​ນົມ ​ໃຫ້​ພະ​​ນັກ​ງານ​ໄດ້ນຳ​ໃຊ້​ສະເພາະ​ຫ້ອງ​ປ້ຳ​ນ້ຳ​ນົມ ບໍ່​ຈຳເປັນ​ຕ້ອງ​ກວ້າງຂວາງ ໃຫ້ຄວາມ​ສະດວກ ມີ​ຄວາມ​ເປັນສ່ວນ​ຕົວ ງຽບ ແລະ ຮູ້ສຶກ​ຜ່ອນຄາຍ​ໃນ​ເວລາ​ປ້ຳ​ນ້ຳ​ນົມ ພ້ອມກັນ​ນັ້ນ​ຍັງ​ເຮັດ​ໃຫ້​ນ້ຳ​ນົມ​ໄຫຼອອກ​ດີ.

ຂ່າວທີ່ກ່ຽວຂ້ອງ